Đơ̆ng rŏng hloh 2 sơnăm tơlĕch jang kiơ̆ Tơdrong tơchơ̆t 749 đơ̆ng Thủ tướng teh đak, truh dang ei 60% tơdrong jang hla bơar kơ tơring kơ dêh char Kon Tum hlôi bơ̆ jang kiơ̆ lơ̆m mạng, jang keh đang trong tơlĕch jang truh sơnăm 2025. ‘Ngoaih kơ ‘noh, hloh 16.800 hektar ‘long pơtăm, 142hơnih jang să đei tơlĕch jang kiơ̆ rim trong jang khoa hŏk păng kmăi kmŏk; hloh 116.600 ŭnh hnam choh jang sa đei tơƀôh tơbăt tĕch mơdro tơmam drăm lơ̆m điên tư; trong jang thôn 3, tơring Tân Lập, apŭng Kon Brăih jang ‘lơ̆ng đei tôm tơdrong pơkăp jing thôn gơ̆h hơgei … Mă lei, kiơ̆ đơ̆ng ƀok Đặng Trần Huân, Kơ iĕng Kơdră chĕp pơgơ̆r Hơnih vei lăng Choh jang sa păng Atŏk tơ iung tơring tơrang dêh char Kon Tum, dêh char oei tŏk bŏk tơjră muh măt hăm lơ tơdrong long mưh tơlĕch jang kiơ̆ tơplih kơsô̆ lơ̆m tơ iung pơjing tơring tơrang ‘nao:“Tơdrong hlôh vao găh tơplih kơsô̆ lơ̆m tơ iung pơjing tơring tơrang ‘nao ‘noh ưh kơ lei lăi dih băl. Tơdrong bơ̆ jang kơ kang ƀô̆ lơ̆m jang kiơ̆ tơdrong jang tơplih kơsô̆ oei tim gan gơ̆h. Hơnih jang păng kmăi kmŏk bơ̆ jang tơ̆ mĭnh ƀar tơring tim gan ‘lơ̆ng trŏ lăp hăm tơdrong bơ̆ jang tơplih kơsô̆”.

Hăm 68% măt bơngai kon pơlei kơ dêh char hơrih sa tơ̆ tơring choh jang sa păng 73% tơdrong jang lơ̆m găh choh jang sa, dêh char Kon Tum sơkơt hơdăh tơplih kơsô̆ ‘noh trong jang kăl hlŏh vă atŏk tơ iung choh jang sa, tơring choh jang sa kiơ̆ trong gơ̆h hơgei tơgŭm ăn kon pơlei choh jang sa hăm kon jên tơmơ̆t jang tŏ sĕt mă lei đei iŏk yua kơjăp hloh.

Kiơ̆ đơ̆ng ƀok Đặng Thanh Long, Kơdră chĕp pơgơ̆r Jơnum rim Khul Khoa hŏk păng Kih thuơ̆t dêh char Kon Tum, kơ yuơ tơdrong mŭk drăm-tơpôl oei tơnap tap, tơdrong tơplih kơsô̆ tơ̆ tơdrong jang choh jang sa păng lơ̆m tơring choh jang sa kơ dêh char mă blŭng kăl yak hloh rim tơdrong găn ga, ‘noh tơdrong choh jang sa hăm kmăk kmŏk, gre oei tŏ sĕt, rim tơdrong chă choh jang sa oei ‘moi kiơ̆ dôm tơdrong joăt joe kơ kon pơlei ...Pơma truh trong jang pơm hơtŏk tơplih kơsô̆ lơ̆m choh jang sa lăng truh atŏk tơ iung tơring choh jang sa gơh hơgei, ƀok Đặng Thanh Long, tơbăt:“Mă blŭng ‘nŏh găh bơ̆ jang tơroi tơbăt vă ƀôh hơdăh hơnih dơ̆ng, hơnăp jang, tơdrong kăl păng tơdrong trăp trĭn kơ tơdrong jang tơplih kơsô̆ lơ̆m atŏk tơ iung mŭk drăm choh jang sa ‘nou jing trong jang kăl hloh. Pơm hơtŏk gơ̆h hơgei khul jang truh hloi rim bơngai choh jang sa ‘nŏh pơđĭ rim ŭnh hnam kon pơlei, khul jang hơdoi, hơp tak xah, hơnih mơdro sa păng kơdih khul kang ƀô̆ dôm bơngai vang iung jang lơ̆m tơlĕch jang kiơ̆ tơplih kơsô̆ lơ̆m choh jang sa. Tơ iung pơjing hơnih, kmăi kmŏk chih tơmơ̆t dôm tơdrong. Tơdrong vang iung jang hơdoi đơ̆ng khul jang chinh trĭ, đơ̆ng rim kơdră chĕp pơgơ̆r Hơnih jang Đảng, khul kơdră chĕp pơgơ̆r tơring, kơ rim hơnih mơdro sa lơ̆m choh jang sa, pơm tơlĕch tơmam drăm”.

Truh dang ei, dêh char Kon Tum hlôi đei 48/86 tơring jang keh đang đei jing tơring tơrang ‘nao, lơ̆m ou đei 7 tơring tơrang ‘nao ‘lơ̆ng liĕm păng 2 tơring tơrang ‘nao pơm yă. Atŭm hăm ‘noh dêh char hlôi đei 21 pơlei iŏk đei jing pơlei pơla ‘lơ̆ng, 65/498 pơlei kon kông jang keh đang đei jing pơlei tơring tơrang ‘nao. ‘Nou jĭ mĭnh lơ̆m dôm hơyak gĭt kăl vă dêh char tơlĕch jang kiơ̆ rim trong jang hle, tơchăr hơ iă păng trŏ lăp vă pơtrŭt kơtang tơplih kơsô̆ lơ̆m choh jang sa păng atŏk tơ iung tơring tơrang gơ̆h hơgei.