Bơngai tăh hla dêh char Long An athei Anih tơm vei lăng găh Choh jang sa păng Hơtŏk tơiung tơring tơrang, Anih tơm vei lăng tơmam drăm  - cham char kŭm hăm dôm anih tơm, anih jang ƀơm truh hơnơ̆ng bơngơ̆t truh tơdrong phang pơđang, đak ƀoh hrơm tơ̆ dôm dêh char găh Pơbăh. Kiơ̆ đơ̆ng noh đei dôm tơdrong tơgŭm ‘lơ̆ng hơiă.

Lơ̆m tơdrong jang mŭk drăm tơpôl, bơngai tăh hla dêh char Long An tơbăt, tơring tŏk bŏk pơjing dôm hơp tak xăh choh jang sa vă pơm trong jang hơdai đơ̆ng tơdrong pơm tơlĕch sơđơ̆ng truh iŏk yua, tĕch, pơm tơlĕch đơ̆ng rŏng kơ iŏk yua....

Mă lei lơ̆m tơ doă đơ̆ng khŭl jang hơp tak xăh ưh tam kĕ pran yua kơ đei lơ kơ sô̆ khŭl kơdră chĕp kơ̆l hơp tak xăh ‘noh kon pơlei jang chŭn mir kơna ưh kơ hơtŏk tơiung đei nhen tơdrong hơmĕng. Thoi noh dôm Anih tơm, anih jang Trung ương, mă loi ‘noh jĭ Anih tơm vei lăng Choh jang sa păng Hơtŏk tơiung tơring tơrang kăl kơ đei dơ̆ng trong jang hơdăh tơgŭm ăn mŭk drăm tơpôl tơpă jing tơm hơdrol kơ mŭk drăm choh jang sa, nhen kiơ̆ tơdrong tơchơ̆t 150 đơ̆ng khŭl kơdră teh đak ‘noh jĭ tơplih đon tơchĕng đơ̆ng pơm tơlĕch choh jang sa jing đon tơchĕng mŭk drăm choh jang sa.

Lơ̆m hơtŏk tơiung choh jang sa, ƀok Lê Văn Nam, bơngai tăh hla apŭng Bến Lức, dêh char Long An akhan, kăl hloh oei jing roi tơbăt tơtom găh anih tĕch mơdro lơ̆m teh đak păng apŭng plĕnh teh. Roi tơƀôh tơ̆ tơring, ƀok Nam tơbăt, apŭng Bến Lức đei 100.000 hek tar chănh ưh kơ đei găr. Tơdrong jang tĕch chănh tơ̆ teh đak cđei pơjing trong jang hơdai ‘lơ̆ng, tĕch tơ̆ anih tĕch mơdro châu Âu păng Trung Đông. Mă lei dôm hơp tak xăh răt iŏk kŭm lăp jing trong răt păh lăp đĕch... kơna kon pơlei jang chŭn mir mơ mat kơchăng găh kơjă:

“‘Nâu kŭm jing tơdrong pơgăn tih. Kơlih thoi noh bơngai tăh hla Long An kŭm ‘meh vă đei pơtruh dơ̆ng lơ tơdrong kơtơ̆ng ang vă băt hơdăh đei dôm anih tĕch mơdro teh đak đe tơroi kơpal. Đơ̆ng noh kon pơlei gơh kơchăng năm tơ̆ teh đak đe tơƀơ̆p pơma dơnuh kơtă vă gơh kơchăng găh kơjă ăn tơmam đơ̆ng choh jang sa đei.”

Lơ̆m hơtŏk tơiung choh jang sa anih kơ drơ̆m hăm dôm tơdrong jang choh jang sa kơmăy kơmŏk hơgei kăl kơ jên tooch kơ lơ. Bơngai mơdro sa lơ̆m anih choh jang sa kăl kơ đei tơgŭm jên cheh tŏk iŏk kiơ̆ tơdrong jang gĭt kăl đơ̆ng pơlei tơm. Dôm hơp tak xăh choh jang sa, tơ ‘ngla jang pơgar să kŭm đei tơgŭm găh jên cheh tŏk iŏk vă tơplih ming ‘long pơtăm, kon tơrong jang iĕ păng păh lăp.

Pơlei tơm Hồ Chí Minh tơlĕch tơdrong hơgăt pơm trong jang hơdai kon pơlei jang chŭn mir, hơp tak xăh păng anih mơdro sa pơtruh tơmam đơ̆ng choh jang sa kiơ̆ trong hơtŏk tơiung tơdrong jang hơdai logistics choh jang sa. Trong jang âu vă hơtŏk tơiung tơdrong jang mơdro sa, răt tĕch tơmam pơyua ăn pơm tơlĕch choh jang sa nhen: Tơmam, phŏng, pơgang hơdrông, tơmam sinh học đơ̆ng pơlei tơm Hồ Chí Minh păng dôm tơring.... Trong năm âu gô tơgŭm hơmet ming dơ̆ng choh jang sa đơ̆ng pơlei tơm Hồ Chí Minh păng tơring păih pơbăh. Mă lei ‘meh hơtŏk tơiung choh jang sa anih kơdrơ̆m kăl kơ pơjing tơdrong jang tơ̆ teh choh jang sa, tơdrong ‘nâu dang ei tŏk bŏk tơvŏk lơ tơdrong hơgăt mă pơlei tơm Hồ Chí Minh ưh kơ gơh hơmet pơ ‘lơ̆ng. Ƀok Võ Hoàng Vũ, bơngai tăh hla xăh Hưng Long, apŭng Bình Chánh, pơlei tơm Hồ Chí MInh apĭnh:

“Kon pơlei apĭnh gơh pơjing tơdrong jang pơgia tơ̆ teh choh jang sa, pơyua ăn pơm tơlĕch, iŏk yua kơmăy kơmŏk, nhen hnam tăh mong tơmam, hnam hơdra, hnam mơ ker.... trong jang âu oei đei 1,2 tơdrong tơhlăk tăk găh hla ar ƀơm truh pơjing, hơmơt kơ đei ƀôh ưh kơ ‘lơ̆ng hơnhăk truh dôm tơdrong jang bơ̆jang glăi hlôi luơ̆t. Kơlih thoi noh tơdrong tŭn pran choh jang sa anih kơdrơ̆m tŏk bŏk tơƀơ̆p mơmat tat. Tôch kơ kăl Anih tơm vei lăng Choh jang sa, hơtŏk tơiung tơring tơrang păng dôm anih tơm anih jang ƀơm truh đei trong jang hơmet pơ ‘lơ̆ng vă kon pơlei jang chŭn mir pơ̆n nuih, sơđơ̆ng jơhngơ̆m tơmơ̆t jên jang hơtŏk tơiung mŭk drăm tơ̆ hơnăp kơnh.”

Tơ̆ ‘măng tơl nơ̆r apĭnh jet kơ sơ̆ ‘năr 6/11, Kơdră Anih tơm vei lăng Choh jang sa păng hơtŏk tơiung tơring tơrang Lê Minh Hoan akhan, 1,2 kon pơlei pơtăm bri tơ̆ tơring 2, tơring 3 (dôm xăh mơmat tat păng tôch kơ mơmat tat găh tơring kon pơlei kon kông păng tơring groi kông), mă hơdăh ‘noh jĭ tơ̆ dêh char Bắc Kạn păng 1,2 dêh char đei bri, mă trŏ ‘noh đei iŏk jên pơjao bri, vei lăng bri sơnăm 2021, mă lei truh dang ei tam mă đei iŏk ‘mơ̆i. Hơdai hăm ‘noh, Anih tơm kŭm apĭnh găh tơdrong hơmet ming 31 tơdrong hơgăt tơring tơrang ‘nao lăp hăm dôm tơdrong kăl đơ̆ng dôm tơring mơmat tat dêh hloh.