Dôm năr pơyan choh jang rơhơi, vă jê̆ 30 ‘nu mŏ oh bơngai Bahnar lơ̆m khul tang brai thôn 5, xăh Pờ Tó, apŭng Ia Pa, dêh char Gia Lai vang tanh brai tơ̆ hơla rih rôm hnam. Bơngai kră ‘nŏh đĭ hlŏh 50 sơnăm bơih, đei hloi đe hơdruh păh iung ‘năi. Đe sư chă pơtho tơƀôh ăn băl đơ̆ng vai khăn, hơbăn ao truh tơ̆ tanh.

Mŏ Đinh Như, tơ̆ thôn 5, xăh Pờ Tó, ăn tơbăt: “Sơ̆ đe yă chă pơtho ăn đe duch nă. Chă hlei hrei ‘nâu ‘nŏh đe mŏ oh chă hŏk pơhrăm đơ̆ng băl dơ̆ng. Ning mônh kơnh nhôn chă pơtho dơ̆ng ăn jơhnơr mơlôh, đe mon 16, 18 sơnăm chă hŏk pơhrăm dơ̆ng".

Oei tơ̆ xăh Ia M'nông, apŭng Chư Păh, dêh char Gia Lai, đe mŏ oh bơngai Jrai lơ̆m khul tang brai plei Kép 2 rơih 1 pôm hnam tŏk bok pơlei pơm anih tanh brai vai khăn. ‘Nâu jĭ anih truh kiơ̆ trong chă tơmang lăng lơ̆m tơpôl kơ plei Kép 2. Truh tơ̆ âu, tơmoi chă tơmang lăng gơ̆h ƀôh hơdăh tơdrong ‘lơ̆ng đơ̆ng ding dông, ƀrông ƀrôt tanh lơ̆m rim blăh khăn, hơbăn ao, kơdŭng..., đei vai tanh tôch hơlen, gơ̆h tanh pơlong năng ƀât không dăh mă chă rơih ăn kơdih dôm tơmam tanh 'lơ̆ng hơiă hlŏh. Mŏ H’Uyên Niê- Bơngai vei lăng Khul tanh brai ăn tơbăt, dang ei đĭ đei anih tĕch mơdro kĭ jang hơdoi hăm khul tanh, pơih đei tơdrong 'lơ̆ng vă chĕp vei, atŏk tơiung tơdrong tanh brai vai khăn. Gơnơm tanh đei lơ tơmam 'lơ̆ng, lăp đon bơngai chă tơmang lăng, mă dôm bơngai tanh hơnơ̆ng đei iŏk yoa dang 5 triu 1 'nu 1 khei.

“Khul drŏ kăn nhôn tơplih ming trong jang xa, atŏk tơiung tơmam đơ̆ng tanh sĭt vă tĕch ăn tơmoi chă tơmang lăng. Pơtih gia dôm tơmam tanh âu nhôn pơm bơ̆n kơdŭng ƀăk, kơdŭng tăh jên, pơm bơ̆n hơle,... đơ̆ng noh pơm lăp hăm tơdrong ‘mĕh vă đơ̆ng tơmoi mưh truh tơmang lăng tơ̆ âu. Bơngai tanh đei xa yoa đơ̆ng dôm tơmam mă kơdih tanh đei, đơ̆ng noh đe sư jang roi tơnăp, vă chĕp vei ‘lơ̆ng dôm tơmam tanh đơ̆ng sơ̆.”

Lơ̆m dêh char Gia Lai đei 106 khul tanh brai vai khăn, akŏm đei hlŏh 1.600 ‘nu mŏ oh drŏ kăn. Kơsô̆ âu oei tŏk hơnơ̆ng mưh tơdrong tanh brai vai khăn đei dêh char roi tơƀôh nhen thoi 1 tơmam kăp gĭt vă atŏk tơiung chă tơmang lăng. Dêh char Gia Lai hlôi tơmât tơdrong tanh brai jing 1 tơdrong gĭt kăl lơ̆m tơdrong jang "Chĕp vei, atŏk tơiung kơjă kăp gĭt ‘lơ̆ng hơiă đơ̆ng sơ̆ kơ dôm hơdrĕch kon kông tơklep hăm atŏk tơiung chă tơmang lăng" găh Tơdrong jang tơm kơ teh đak atŏk tơiung mŭk drăm – tơpôl tơ̆ tơring kon kông păng groi kông đơ̆ng 2021 - 2030. Dang ei tơmam tanh đei ming pơdă, roi tơƀôh tơ̆ dôm ‘măng pơgơ̆r tôn chĭng hơtuch giĕng, pơgơ̆r hơnơ̆ng tơ̆ Cham xă Đại đoàn kết, tŏk bŏk plt Pleiku.

Yă Nguyễn Thị Thanh Lịch- Phŏ Kơdră vei lăng kon pơlei dêh char Gia Lai ăn tơbăt, tơdrong tơm đơ̆ng dêh char ‘nŏh chĕp vei, roi tơbăt păng hơnhăk tơmât tơmam khăn, hơbăn ao tanh jing tơmam tơm pơ ‘nhŏ ăn tơdrong chă tơmang lăng tơ̆ tơring: “Kiơ̆ đơ̆ng âu nhôn ‘mĕh pôk pơ ư bơngai tanh, bơngai tơchĕng hơlen hơnơ̆ng chă trong tanh đei dôm tơmam ‘lơ̆ng hlŏh. Nhôn ‘mĕh hơnơ̆ng roi tơƀôh, pơm ăn tơmam tanh jing mŭk drăm, chă tech ăn bơngai chă tơmang lăng, đei trong tĕch mơdro kơjăp ‘lơ̆ng, vang tơgop ăn tơdrong jang tŏk tơiung mŭk drăm đơ̆ng Gia Lai “