Hăm hơnăn "Đắk Lắk – Hơmĕng păr ang", tơdrong thi đei pơgơ̆r đơ̆ng dang ei truh đĭ ‘năr dơning, ‘năr 9/11, hăm vă jê̆ 350 ‘nu kăn ƀô̆, bơngai jang roi tơbăt đơ̆ng 13 khul apŭng, thĭ xăh, plt lơ̆m dêh char Đắk Lắk vang thi. Kŭm hăm thi roi tơbăt hăm gre tơ̆ trong glung, rim khul oei thi roi tơbăt atŭm, hăm tơdrong pôk pơ ư Đảng, Ƀok Hô, jơhngâm đon ‘mêm kơ pơlei pơla, teh đak, tơdrong juăt jang kăch mang đơ̆ng khul linh păng kon pơlei dôm hơdrĕch hơdrung, dôm tơdrong jơnei mưh pơjing păng jang tŏk mŭk drăm, tơpôl, khul linh, vei sơđơ̆ng teh đak, vei lăng tơdrong pơm tơm tơ̆ tơring sơlam, kông đak dơsĭ.

Lơ̆m noh, pơma truh dôm tơdrong jơnei đơ̆ng 120 sơnăm dêh char Đắk Lắk đei pơjing păng jang tŏk păng jơhngâm đon tơguăt băl đơ̆ng 49 hơdrĕch hơdrung arih xa hơdai tơ̆ Đắk Lắk. ‘Nâu jĭ tơdrong jang đei pơgơ̆r 2 sơnăm 1 vât vă hơlen năng tơdrong đei yoa đơ̆ng bơ̆ jang roi tơbăt trong jang đơ̆ng Đảng, khôi luơ̆t teh đak truh hăm kon pơlei; pơjing tơdrong ‘lơ̆ng đei jơ tơƀâp, pơma nuh, hơtŏk tơdrong đei yoa mưh bơ̆ jang roi tơbăt tơ̆ tơring.