Tơƀôh ah hơbăn tanh oei hrŭk, pơmai K’Hều, tơ̆ thôn 1, xah Đưng Knớ, apŭng Lạc Dương, dêh char Lâm Đồng chơt hơ-iă tơroi, âu noh hơbăn ao tanh kơdih pơmai tanh mah đĭ 2 giĕng. Pơmai K’Hều tơroi, lơ pơmai oh lơ̆m thôn pơtơm băl pơhrăm tanh brai, ah tơbang dôm tơmam tanh đei lơ̆m mang tơpôl noh đei minh ƀar bơngai băt truh păng chih măt răt tơmam: “Inh tơbang lơ̆m facebook ‘noh, đei bơngai akhan mưh inh tanh đe chih măt athei inh tanh minh ƀar hlak che tanh. Inh ƀôh tĕch ƀônh hloh noh inh kơdih chă tanh vă chă jên yua ăn kơdih po inh. Noh jĭ tơdrong mă inh lăp, ‘meh tanh khŏm mă đei. Truh âu kơnh inh gô pơtoi chă pơhrăm dơ̆ng”.

Oei pơmai Bon Niêng K’Huyên, oei atŭm thôn tơroi, gơnơm băt tanh brai noh pơmai chă đei thêm jên lơ̆m khei năr rơvơn: “Inh pơhrăm păng gơh tanh brai 1 sơnăm kơ âu bơih. Hơnơ̆ng ah khei rơvơn noh tanh tĕch truh tơ̆ Lạc Dương đe adoi chă răt, hăm kơjă pơhlom 550-600 rơbâu hlj 1 hlak che tanh, 1 khei tanh đei 4 hlak che. Dang ei inh hăt hot hăm tơdrong pơhrăm tanh, ‘meh pơih lăm pơtho tanh brai vă tơdrong jang juăt jue âu ưh đei hiơt hiong”.

Ah mă roi năr roi đei lơ bơngai răt yua, đe pơmai akŏm jing khul tanh vă pơm tơlĕch tơmam drăm kơ po đei lơ anih tĕch răt hloh. Pơmai Bon Niêng K’Gut, tơ̆ thôn 1, xah Đưng Knớ ăn tơbăt, gơnơm jang hadoi hăm Caritas Đà Lạt, khul tanh brai kơ pơmai hlôi đei lơ bơngai băt truh chă răt tơmam tanh vă sĭt hơbăn ao pơkong, pơrŏ lơ̆m unh hnam, sĭt hơbăn ao kiơ̆ um ‘nao hrei âu... Pơmai oei kơdih pơih lăm pơtho tơ̆ hnam vă đei iŏk yua lơ hloh đơ̆ng tơdrong tanh brai pơm tơlĕch tơmam drăm: “Inh ‘meh pơtoi rok kiơ̆, pơlan să truh hăm đe hơmuh hơmong nai, tơgop pơjing um ai joh ayŏ kơ po. Hlôi pơih lăm đơ̆ng sơnăm sơ̆ bơih, pơih lăm đei 15 ‘nu hŏk noh 5 ‘nu dang ei kơdih băt tanh păng tĕch tơlĕch tơmam po tanh đei. Gah Caritas jang hadoi pơjing minh khul jang atŭm. Đei bơngai nhôm đak kơ-ang, đei bơngai dui brai, đei bơngai jang mă âu mă to vă ăn tơmam pơm tơlĕch đei ‘lơ̆ng, trŏ hăm tơdrong tĕch răt lơ̆m tơring mă lei ưh kơ đei lê̆ hiong joh ayŏ juăt jue kră sơ̆ kơdih po”.

Tơ̆ tơring hơtaih yaih kơ apŭng Lạc Dương hăm hloh 90% kơsô̆ măt kon pơlei kon kông, khei năr âu ki, xah Đưng Knớ iŏk đei lơ tơdrong tơgŭm đơ̆ng Đảng păng Teh đak, ming man ăn anih pơm jang, unh hơyuh, trong nơnăm, hnam trưng hŏk, hnam pơgang. Xah đei sơkơ̆t xah tơring tơrang ‘nao ah sơnăm 2021. Đơ̆ng khei 7 sơnăm âu, apŭng Lạc Dương tơbang Tơdrong jang pơjing Pơlei joh ayŏ tơmang pơhiơ̆ tơpôl xah Đưng Knớ hlôi pơih đei lơ trong hiôk gah vei răk tơƀăk mong joh ayŏ juăt jue tơguăt hăm hơtŏk jang tơmang pơhiơ̆ kơ tơring.

Yă Phi Srônh K’Ham, Kơdră Jơnŭm jang đe drăkăn xah Đưng Knớ ăn tơbăt, đơ̆ng sơkơ̆t jang kơ apŭng, jơnŭm jang đe drăkăn hlôi hơvơn, akŏm pơmai oh pơtoi hơtŏk tơdrong jang tanh brai, dar deh pơjing đei pơlei jang tơmang pơhiơ̆:  “Pơtoi rok kiơ̆ joh ayŏ kon kông vă vei răk tơƀăk mong ăn kôn mon kon sau ning nai kơnh, noh đe pơmai tơ̆ âu adoi đei pơhrăm, đei pơdjoi tơdrong jang tanh brai, tơmam drăm đei pơm tơlĕch noh đei tĕch hlot, hơtŏk iŏk yua ăn đe pơmai oh. Dang ei đei tơchơ̆t chă tơgŭm, Jơnŭm jang đe drăkăn tŏk bŏk oei hơvơn akŏm đei 20 pơmai oei kăl jên vă pơtơm tơdrong jang tanh brai, rim unh hnam đei asong tŏk iŏk 50 trĭu hlj ”.

Hăm dôm tơchơ̆t jang hơdah đơ̆ng jơnŭm pơgơ̆r tơring gah vei răk tơƀăk mong tơdrong jang juăt jue, lơ pơmai oh bơngai K’Ho tơ̆ tơring hơtaih yaih Đưng Knớ tŏk bŏk vih hơlơ̆k hăm không tanh, tanh đei lơ tơmam drăm ‘lơ̆ng, pơjing đei lơ tơmam drăm trŏ hăm tơdrong hơrih ‘nao dang ei pơm đơ̆ng che tanh kon kông. Tanh brai ưh hơdrô̆ tơgŭm ăn kon pơlei chă đei jên, mă tŏk bŏk pơih pơjing pơlei jang joh ayŏ tơmang pơhiơ̆ tơpôl tơ̆ tơring tơrang ‘nao.