Pơm lêh pơgơ̆r blŭng a đei pơgơ̆r ‘lơ̆ng rŏ hăm hloh 100 ‘nu bơngai tôn chĭng chêng chă tôn chĭng chêng, hơsoang sơng hơvơn bơngai tang măt păng tơmoi ‘lơ̆ng rŏ. Atŭm hăm rim khul tôn chĭng chêng ‘noh rim khul hơsoang, khul hơsoang meo, hơsoang brêm brai ‘lơ̆ng rŏ kơ hơdrung Jrai păng Bahnar. Tơ̆ hơnih pơgơ̆r, Khul chep pơgơ̆r oei hơmet ăn lơ hơnih chă tĕch mơdro tơmam drăm pơsư̆, tơmam drăm kăl kơ tơring, tơmam drăm choh jang sa kăl nhen chehphe, tiu, prit jơi, tơdrô ge, tơƀăng kro, ka đak kroong Sê San; rim hơdrơ̆r tơmam drăm pơjing tơdrong jang kơ hơdruh tơdăm lơ̆m apŭng Chư Păh. Giĕng lêh Pơkao Dur-Kông ŭnh Chư Đăng Ya sơnăm 2024 gô pơgơ̆r truh đĭ năr 10/11. Atŭm hăm chă tơmang lăng cham char ‘lơ̆ng rŏ kơ kông ŭnh păng pơkao dur ƀrông ƀrang, tơmoi oei đei rơvơn chă pơhrăm tanh broong jak, tanh brai atŭm hăm kon pơlei, đei vang pơchơt pơhiơ̆ kră sơ̆ nhen: Tơdrŭt ‘long, hao sơng, tơdui, plŏng ƀi hơrĭng, tŏk kông.