Tơdrong pơlong đei vang pơlong đơ̆ng hloh 2.800 ‘nu hŏk tro, hăm hloh 200 ƀai hơri hơsoang truh đơ̆ng dôm hnam trưng hŏk phổ thông păng hơnih vei lăng pơtho pơhrăm lơ̆m dêh char Đắk Lắk. Hăm hơnăn ƀai hơri pôk pơ ư kơ pơlei pơla, teh đak, Đảng, Ƀok Hồ, lăng găh tơm a păng tơdrong ‘mêm đơ̆ng ƀok thây - hŏk tro, tơdrong pơ long đei lơ ƀai pơcheh hơgei, tơƀôh tơdrong ‘lơ̆ng hơiă hơdrĕch hơdrŭng... Đei lơ ƀai đei pơm tôch kơ hơlen đơ̆ng chih hơmet, pơm tơƀôh, hơbăn ao hrŭk...

Hơdai hăm tơdrong hơgăt hơlen lăng pơtôch tơdrong jang joh ayŏ lơ̆m hnam trưng, tơdrong pơlong “Tơdrong hơri hơsoang kơ đe hŏk tro: oei jing ‘măng vă đe thây kô păng hŏk tro tơ̆ Đắk Lắk hŏk pơhrăm, tơroi băl tơdrong hlôh vao, vei kơjăp tơdrong 1 ƀơ̆r đon, pơm jơ năr chơt hơiă, ‘nă hal pơjing “Hnam trưng hiôk rơhâu - hŏk tro ‘lơ̆ng”.