Iung pơma pơtôch hop akŏm, Kơdră chĕp pơgơ̆r Kuô̆k hô̆i Vương Đình Huệ tơbăt, đơ̆ng rŏng 1 năr bơ̆ jang kơtang, tĕnh koăng, Hop akŏm hlôi keh đang đĭ đăng trong jang tơlĕch ăn hăm 18 nơ̆r tơgop pơma dơnuh.

Kơdră chĕp pơgơ̆r Kuô̆k hô̆i hôn bơnê kơtang, Jơnŭm vei lăng kon pơlei rim tơring hlôi tơgop lơ lơ̆m tơdrong iŏk đei jơnei kơ teh đak, lơ̆m tơdrong atŏk tơ iung mŭk drăm, tơpôl kơ tơring; pơma hơdăh, tơdăh lơ̆m sơnăm 2022 hlôi đei hơyuh hle lơ̆m tơdrong jang kơ Jơnŭm vei lăng kon pơlei rim hơnih ‘noh sơnăm au sơkơ̆t hơdăh, hơyuh ‘lơ̆ng hơ iă au sa roi lang să hloh dơ̆ng, iŏk đei jơnei ‘lơ̆ng hơ iă lei lăi dih băl hloh dơ̆ng.

Tơdrong jang kơ Jơnŭm vei lăng kon pơlei roi năr roi jơnei, tơpă, tơgop gĭt kăl lơ̆m jang kiơ̆ tơdrong jang atŏk tơ iung mŭk drăm-tơpôl. Dôm tơring đei Jơnŭm vei lăng kon bơ̆ jang ‘lơ̆ng ‘noh tơdrong jang thuê̆ ăn hơnih bơ̆ jang teh đak păng đei tŏk mŭk drăm kơtang. Jơnŭm vei lăng kon pơlei rim tơring hlôi jang kiơ̆ ƀlep kơjăp hăm khôi luơ̆t, tơlĕch jang rim tơdrong bơ̆ jang pơjing khôi luơ̆t, tơdrong tơchơ̆t, dăr lăng păng kĭ tơchơ̆t rim tơdrong kăl, iŏk kơphĭu drơ̆ng lăp đon; jang kiơ̆ ‘lơ̆ng bơ̆ jang tơplih kơsô̆, tơbôl; đei lơ trong jang tơplih ‘nao, ‘lơ̆ng hơ iă hloh dơ̆ng lơ̆m bơ̆ jang, mă kăl ‘nŏh ‘măng hop akŏm kơ Jơnŭm vei lăng kon pơlei; tơdrong bơ̆ jang kơ rim hơnih lơ̆m Jơnŭm vei lăng kon pơlei roi năr roi đei lăng kơjăp; bơ̆ jang sơng pơma dơnuh hăm kon pơlei, bơngai tăh hla ‘lơ̆ng hơ iă hloh pơtêng hăm trong tơlĕch jang vă atŏk tơ iung păng kơ yuơ tơdrong atŏk tơ iung kơ tơring; bơ̆ jang tơbăt ăn đei lăng kơjăp.

Vă iŏk đei jơnei au, kiơ̆ đơ̆ng Kơdră chĕp pơgơ̆r Kuô̆k hô̆i Vương Đình Huệ, Jơnŭm vei lăng kon pơlei rim hơnih hlôi tơklep kơjăp hăm nơ̆r pơrô̆ jang đơ̆ng hơnih đảng, tơdrong tơchơ̆t đơ̆ng Trung ương, Kuô̆k hô̆i, Khul kơdră teh đak. Mă kăl, Kuôk hô̆i hlôi tơlĕch ăn rim tơdrong tơchơ̆t pơjing đei trong jang trŏ lăp hloh vă tơplih ‘nao bơ̆ jang dăr lăng kơ Jơnŭm vei lăng kon pơlei, dôm tơdrong tơhlăk tơhlĭn kơ Jơnŭm vei lăng kon pơlei rim dêh char hlôi đei Khul kơdră chĕp pơgơ̆r Kuô̆k hô̆i tơl hơdăh hăm hla bơar tôm tong. ‘Ngoăih kơ ‘noh tơdrong hơdrin tơchă, tơplih ‘nao đơ̆ng rim hơnih bơ̆ jang kơ Jơnŭm vei lăng kon pơlei; tơdrong jang hơdoi kơjăp đơ̆ng khul kơdră chĕp pơgơ̆r tơring păng Jơnŭm vei lăng kon pơlei; iung jang hơdoi hăm rim hơnih bơ̆ jang tơring, rim hơnih bơ̆ jang kơ Kuô̆k hô̆i…

          Lơ̆m khei năr kơnh, Kơdră chĕp pơgơ̆r Kuô̆k hô̆i Vương Đình Huệ athei, Jơnŭm vei lăng kon pơlei, jang kiơ̆ kơjăp lơ̆m trong chĕp pơgơ̆r đơ̆ng khul kơdră chĕp pơgơ̆r đảng hăm tơdrong pơgơ̆r iung jang kơ Jơnŭm vei lăng kon pơlei, ‘nau jĭ tơdrong kăl hloh lơ̆m jang kiơ̆ ƀlep hơnăp jang, tơdrong jang đei pơjao.“Nhôn athei hơnơ̆ng atŏk kơtang jang kiơ̆ hơnăp jang kơ hơnih bơ̆ jang tang măt kon pơlei tơring kiơ̆ tơdrong tơchơ̆t đơ̆ng khôi luơ̆t vă jang keh đang rim tơdrong jang lơ̆m sơnăm 2024. Lơ̆m au hơnơ̆ng dăr lăng, pơm pơkeh rim hla bơar tơchơ̆t khôi luơ̆t kơ tơring. Hloh đơ̆ng tơdrong jang kơ dih hlôi bơ̆ jang, Jơnŭm vei lăng kon pơlei hơnơ̆ng tơgop kơtang hloh dơ̆ng păng tơnăp hloh dơ̆ng ăn tơdrong jang tơ iung pơjing khôi luơ̆t păng rim tơdrong tơchơ̆t, mă kăl ‘nŏh rim khôi luơ̆t đei ƀơm truh tơdrong hơrih sa, mŭk drăm, tơpôl tơring. Lơ̆m sơnăm au đei tôch kơ lơ tơdrong tơchơ̆t gĭt kăl gô đei lăng hơlen păng tơlĕch jang kiơ̆. Nhôn athei Jơnŭm vei lăng kon pơlei rim tơring, lăng kiơ̆ rim khôi luơ̆t, tơdrong Tơchơ̆t hlôi pơjing đei vă pơprŏ tơlĕch jang kiơ̆ kơtang hloh dơ̆ng hăm rim trong vă pơjing khôi luơ̆t, mă kăl tơdrong vă pơjing Khôi luơ̆t groi teh sơnăm 2024, Khôi luơ̆t tech răt teh, Khôi luơ̆t Hnam oei, Khôi luơ̆t Cham char đak, Khôi luơ̆t kăn kươk, Khôi luơ̆t khul vang jang vei lăng sơđơ̆ng dơ̆ng kơjăp tơring…Lơ̆m rim khôi luơ̆t au đei lơ trong jang hơdăh pơjao ăn tơring”.

Pơma hơdăh kăl tơlĕch trong lăp hloh dơ̆ng kơna mă iung jang kĕ ‘lơ̆ng rim khôi luơ̆t, Tơdrong tơchơ̆t đơ̆ng Kuô̆k hô̆i, Kơdră chĕp pơgơ̆r Kuô̆k hô̆i athei Jơnŭm vei lăng kon pơlei rim tơring kăl tơlĕch jang đơ̆ng dang ei hloi, lơ̆m au đei Tơdrong tơchơ̆t găh 3 tơdrong jang tơm Teh đak. Truh au kơnh, Kuô̆k hô̆i gô pơgơ̆r dăr lăng hơlen rim hla bơar tơchơ̆t bơ̆ jang, kơ yuơ lơ loh, Jơnŭm vei lăng kon pơlei rim tơring kăl dăr lăng rim tơdrong tơchơ̆t bơ̆ jang kơ yuơ dêh char pơjing, tơlĕch ăn, sut hŭt dôm trong jang pă trŏ lăp; adoi dăr lăng hơlen dơ̆ng tơdrong teh đak tơmơ̆t jên jang.

Kơdră chĕp pơgơ̆r Kuô̆k hô̆i pơkă, Jơnŭm vei lăng kon pơlei hơnơ̆ng tơplih ‘nao tôm tong rim tơdrong jang ‘noh tơplih ‘nao ‘măng hop akŏm kơ Jơnŭm vei lăng kon pơlei ‘noh hơnih tơm, lăng ba kơjăp Jơnŭm vei lăng kon pơlei apŭng, lăng kơjăp truh Jơnŭm vei lăng kon pơlei tơring; atŏk kơtang tơdrong jang pơting dih băl jang pran kơtang; pơm hơtŏk bơ̆ jang ‘lơ̆ng kơ rim Kơdră tang măt Jơnŭm vei lăng kon pơlei, lăng kơjăp truh bơ̆ jang pơtho ming; atŏk kơtang bơ̆ jang pơrô̆ pơrôp tơ̆ tơring, mă kăl dôm tơdrong kăl, tơdrong tơkêng lơ bơngai, tơdrong kơtang, adoi atŏk kơtang tơplih ‘nao trong pơgơ̆r tơƀơ̆p pơma dơnuh hăm bơngai tăh hla.