Tơ̆ pơlei tơm Buôn Ma Thuột, dêh char Dak Lăk, Khul kơdră tang măt Kuô̆k hô̆i dêh char Dak Lăk hlôi pơgơ̆r tơƀơ̆p pơma dơnuh hăm bơngai tăh hla păng kŏng nhân jang. Vang năm tơƀơ̆p đei Bí thư Trung ương Đảng, Kơdră Hơnih pơrô̆ pơrôp Trung ương, kơdră tang măt Kuô̆k hô̆i jăl XV Bùi Thị Minh Hoài păng hăm 150 ‘nu bơngai tăh hla ‘noh kŏng nhân bơngai jang đơ̆ng rim hơnih jang, hơnih mơdro sa lơ̆m dêh char.

Lăp đơ̆ng rŏng tơroi tơbăt tơdrong kơ ‘Măng hop akom mă 7, Kuô̆k hô̆i jăl XV păng pơtôch bơ̆ jang kơ Khul kơdră tang măt Kuô̆k hô̆i dêh char đơ̆ng rŏng ‘măng hop akŏm mă 6 truh dang ei, rim bơngai tăh hla Dak Lăk hlôi pơma tơbăt dôm tơdrong găh ƀao hiêm, jên khei, hnam oei, tơdrong đei iŏk yua sa hơpăh kơ bơngai jang ... Mă hơdăh, bơngai tăh hla athei pơjing rơvơn vă rim bơngai  jang đei răt yua ƀao hiêm jang pơgang đei kla ăn kon jên chă khăm ming hơmet jĭ jăn tơ̆ rim hnam pơgang, tơjur sơnăm pơdơ̆h jang hăm mĭnh ƀar khul jang kăl nhen kô pơtho mâm non, kŏng nhân bơ̆ jang tơ̆ rim hnam kmăi pơm tơlĕch tơmam drăm jang trăp trĭn, hli hlơt ... Bơngai tăh hla Ngô Thị Ánh Đào, Hơnih jang tơgŭm pơtho pơhrăm hơ ioh hơven hơvo jo jăn dêh char Dak Lăk iung pơma:“Apĭnh Kuô̆k hô̆i, kơdră dêh char pơtruh nơ̆r ăn kơdră kơpal đei trong jang mă hơdăh găh tơdrong lăng tông nông gia hăm hơnih jang pơtho pơhrăm mâm non nhen găh sa jên khei, tơjur sơnăm pơdơ̆h jang, tơmơ̆t khul ƀok thây pơtho lơ̆m rim tơdrong jang trăp trĭn vă rim kô pơtho mâm non sơđơ̆ng jơhngơ̆m bơ̆ jang păng tơklep kơjăp hăm tơdrong jang”

Atŭm hăm ‘noh, lơ bơngai tăh hla jei athei Teh đak lăng ba, đei trong jang ming man hnam oei tơpôl, hnam oei kơjă re ăn kŏng nhân bơngai jang. Bơngai tăh hla Nguyễn Thị Thanh Thủy, Kŏng ty Tơmang pơhiơ̆ Dak Lăk pơma hơdăh, lơ̆m khei năr kơjă tŏk măt, kon jên răt sa kơ ‘năr vei lăng năng tông kon hơ ‘lơ̆p lơ, bơngai kŏng nhân ưh kơ đei chă mong răk kon jên hu vă răt đei hnam oei.“Apinh teh đak lăng ba, đei trong jang tơgŭm lơ̆m tơ iung pơjing hnam oei tơpôl, hnam oei kơjă re tĕch ăn dar deh dăh mă ăn asong kŏng nhân bơngai jang tŏk iŏk kon jên, hăm jên cheh tŏ sĕt vă răt hnam oei vă sơđơ̆ng hơrih sa, sơđơ̆ng bơ̆ jang.”

Jei tơ̆ Hop akŏm tơƀơ̆p pơma dơnuh hăm bơngai tăh hla, Khul kơdră tang măt Kuô̆k hô̆i dêh char Dak Lăk hlôi pôk ăn 100 tơnô̆ tơmam drăm pôk ăn kŏng nhân bơngai jang ŭnh hnam tơnap tap lơ̆m dêh char.

Vă tơgŭm ăn ‘măng hop akŏm mă 7, Kuô̆k hô̆i jăl XV truh au kơnh, Khul kơdră tang măt Kuô̆k hô̆i dêh char Lâm Đồng hlôi pơgơ̆r tơƀơ̆p pơma dơnuh hăm bơngai tăh hla tơ̆ lơ tơring lơ̆m dêh char. Tơ̆ ‘măng tơƀơ̆p, bơngai tăh hla hlôi tơbăt jơhngơ̆m đon lui kiơ̆ kơjăp păng hơmŏ lơ̆m dôm trong bơ̆ jang pơtrŭt kơtang atŏk tơ iung mŭk drăm-tơpôl, trong jang yak hloh tơnap tap kơ yuơ tơdrong tŏk jur kơjă đơ̆ng Khul kơdră Teh đak, Kuô̆k hô̆i lơ̆m rim jăl au ki tơlĕch ăn. Adoi, hơnơ̆ng chă apĭnh lơ tơdrong đei ƀơm truh bơ̆ jang teh đak lơm rim tơdrong jang.

Tơ̆ tơring Rô Men, apŭng Đam Rông, bơngai tah hla ‘meh vă Đảng, Teh đak kăl hơnơ̆ng lăng ba tơlĕch jang rim Tơdrong jang tơmơ̆t jên jang lơ̆m tơring kon kông, tơdrong hơrih sa tơpôl, xek tơlang ăn tŏk iok kon jên vă tơmơ̆t choh jang sa, atŏk kơtang pơm keh đang ƀơk ăn hla bơar pơm tơ-‘ngla teh, pơjing hnam oei ăn rim ŭnh hnam dơnuh, hơmet ming păng pơih să trong glung 27, dăng tơlei ŭnh hơyuh, pơm trong nơnăm, đak sŏ nhă rơgoh tơring choh jang sa...

Lơ̆m mă noh, bơngai tăh hla tơring Mê Linh, apŭng Lâm Hà lăng ba kơjăp truh tơdrong tang găn sa pơgơ̆m pơjĭp kăl đei atŏk kơtang, lăng ba kơjăp bơ̆ jang dăr lăng tơdrong pơm kiơ̆ khôi luơ̆t kơ kang ƀô̆ tơring; jang kiơ̆ hrơ̆p mĭnh ‘măng rim trong jang tơmơ̆t jên jang atŏk tơ iung tơring kon kông, sơđơ̆ng hơrih sa tơpôl ... Bơngai tăh hla Trương Văn Trình, oei tơ̆ thôn 5, tơring Mê Linh, huyện Lâm Hà, pơma:“Tang găn sa pơgơ̆p pơjĭp ‘noh tơ̆ dêh char đei khul dăr lăng hơlen bơih. Mă lei mưh bơ̆ jang dăr lăng hơlen apŭng ayơ, tơring ayơ khul dăr lăng hăm đei chă tơroi tơbăt ưh? Hăm tơroi ăn khul chih kơtơ̆ng ang ăn kơ nhôn băt? Găh tơjê̆ au hloh ‘noh apŭng ‘noh kăl dăr lăng, pơrô̆, lăng hơlen khul kơdră hơla kơ bơ̆n jang gơ̆h ưh vă hơmet ming, pơjing rơvơn, kăl iung jang mă tơnăp vă pơjing đei kon pơlei lui kiơ̆ kơjăp. Ưh khan mưh bơngai tăh hla chă pơma pơtruh ‘noh kơdră apŭng ưh kơ chă pơrô̆, chă pơma yă kiơ ôh”.

Tang măt ăn rim hơnih bơ̆ jang, kơdră rim tơring kơ dêh char Lâm Đồng hlôi tơl hơdăh dôm tơdrong mă bơngai tăh hla lăng truh. Khul kơdră tang măt Kuô̆k hô̆i dêh char Lâm Đồng jei hlôi chih iŏk, tơgoăt iŏk dôm nơ̆r tơgop vă athei rim hơnih bơ̆ jang ƀơm truh lăng hơlen, xek tơlang, hơmet pơ ‘lơ̆ng lơ̆m khei năr kơnh.