Lơ̆m kơ ‘năr tŏ hlơ hlĕng năr blung khei 4 kơ pơyan phang Tây Nguyên, nhôn tơƀơ̆p đảng viên Y Tuyên B.krông (hơdrung Êđê), 53 sơnăm, oei tơ̆ ƀuôn Dray H’ling, tơring Hòa Xuân, pơlei tơm Buôn Ma Thuột (Đắk Lắk), lơ̆m mă ƀok hăm dôm bơngai jang ăn kơ ƀok tŏk bŏk tuh phŏng mơ̆r lơ̆m kơthŭng mong đak vă tơruih ‘măng mă 3 ăn mir pơgar chehphe pơtăm hrau hăm tiu păng sâu riêng. Ƀok tơroi, hăm hơnăp jang jĭ bơngai đảng viên, kơdih kăl yŭk trong hơlau lơ̆m choh jang sa, xut xa pơngot rơvĕt tơjur dơnuh.

Đơ̆ng rŏng lơ sơnăm jang sa, ŭnh hnam ƀok jang sa iŏk đei hloh 200 triu hlak jên lơ̆m 1 sơnăm đơ̆ng 1.500 dơnơm chehphe, 400 tơm tiu păng 40 dơnơm ‘long sâu riêng. Mư̆h muk drăm ŭnh hnam sơđơ̆ng, ƀok tơchĕng truh chă tơgŭm djru rim bơngai anai lơ̆m khul hơrih sa oei tơnap tap păng kon pơlei lơ̆m pơlei. Ƀok Y Tuyên B.krông tơbăt: “Ba jĭ bơngai vang năm hloi hŏk pơhrăm tơ̆ tơring găh kih thuơ̆t pơtăm chehphe păng sâu riêng. Lơ̆m jơ ‘năr hŏk pơhrăm ‘nŏh ba tơchĕng truh tơdrong mưh hŏk đang ‘noh chă pơtho tơbăt hloi ăn kon pơlei găh tơdrong khoa hŏk kih thuơ̆t vei lăng năng tông chehphe”.

‘Nhŏng Y Vinh H’đơk (hơdrung Êđê) 38 sơnăm, oei lơ̆m ƀuôn Cư Dluê, tơring Hòa Xuân, pơlei tơm Buôn Ma Thuột, dêh char Đắk Lắk jei bơngai đảng viên tôch tơnăp, tôch pơnam. Atŏk jơhngơ̆m đon đảng viên "Nơ̆r pơma, tơ-‘ngla jang hloi”,mĭnh sơnăm ‘nhŏng jang sa iŏk đei hloh 200 triu hlak jên đơ̆ng choh jang sa păng pơm tơ-‘ngla iŏk jang pơm hnam đe. Đơ̆ng rŏng lơ sơnăm hơdrin jang sa, vă đĭ sơnăm 2023 sơnăm au ki, ‘nhŏng hlôi ming man đei hnam ‘lơ̆ng liĕm, să 100 m2, kơ jă kơjên kơ hrĕng triu hlak jên. ‘Nhŏng Y Vinh tơbăt:“Lăp pơm ƀô̆ đô̆i đang brŏk vih tơ̆ hnam ‘noh ba rơ̆ih tơdrong jang ming man hnam, đơ̆ng noh chă jang ăn kơ đe păng iŏk chĕp kơ̆l pơm hnam man hmă, đei sơnăm iŏk pơm ăn 3-4 pơbŭng hnam, đei sơnăm tŏ sĕt hloh ‘noh 2 tŏ hnam. Ba chă hơvơn dôm bơngai jang lơ̆m pơlei, dang 7-8 ‘nu, 4 ‘nu bơngai man tơm păng 3 ‘nu dăh mă 2 ‘nu bơngai chă lŭk chuơ̆h xi măng, ba hơpăh ăn dôm bơngai jang man tơm lơ̆m 1 năr ‘noh đơ̆ng 400-450.000 hlak jên lơ̆m 1 ‘nu, bơngai jang chă lŭk chuơ̆h xi măng joăt jang đơ̆ng 320.000 hlak jên păng bơngai ‘nao mơ̆t ‘noh 300.000 hlak jên lơ̆m 1 năr 1 ‘nu. Akŏp chă jang sa đơ̆ng jang chehphe hăm jang pơm hnam đe iŏk đei đơ̆ng 15 truh 200 triu hlak jên lơ̆m 1 sơnăm.”

Khul ƀô̆ đô̆i so pơlei tơm Buôn Ma Thuột hrei au đei 8.080 ‘nu bơngai, lơ̆m au đei 2.691 ‘nu ‘noh bơngai đảng viên, dang vă jê̆ 600 ‘nu ‘noh bơngai kon kông Êđê, M’nông, Tày, Nùng, Dao, Thái, Mông…. Ƀok Nguyễn Công Tình – Kơ iĕng Kơdră chĕp pơgơ̆r Khul ƀô̆ đô̆i so pơlei tơm Buôn Ma Thuột hơlen, dôm sơnăm au ki, rim đảng viên lơ̆m khul jei iung jang ‘lơ̆ng hơnăp jang pơm jŭk yŭk trong hơlau, atŏk jơhngơ̆m đon “Đảng viên pơm jŭk, yŭk trong hơlau, kon pơlei kơdau kiơ̆ đơ̆ng rŏng". Dôm bơngai lơ̆m khul au jei jang kiơ̆ ‘lơ̆ng jơhngơ̆m đon nuih mơng kơ dom bơngai ƀô̆ đô̆i kơ “Ƀô̆ đô̆i Ƀok Hô” lơ̆m chăl hle hăm jơhngơ̆m đon pơnam, ưh kơ ‘nhoen tơnap tap hrat hrĭn hơdrin choh jang sa, xut xa pơngot rơvĕt, tơjur dơnuh. Đơ̆ng noh, hlôi tơgop kơtang lơ̆m tơdrong jang atŏk tơ iung mŭk drăm-tơpôl kơ pơlei tơm Buôn Ma Thuột, tơ iung pơjing khul roi năr roi pran kơjăp iăp kơtang tôm tong, pơjing đei tơdrong jang ăn lơ bơngai lơ̆m tơring hăm jang sa iŏk đei sơđơ̆ng. Rim đảng viên Y Tuyên Bkrông păng Y Vinh H’đơk ‘noh jĭ dôm bơngai lơ loh. Ƀok Nguyễn Công Tình tơbăt: “Lơ̆m rim ‘măng hop akŏm, nhôn hlôi pôk pơ ư dôm bơngai ‘lơ̆ng jang sa hơgei ‘noh Y Vinh păng Y Tuyên vă rim khul lăng kiơ̆, hŏk kiơ̆ lơ̆m atŏk tơ iung muk drăm. Mă kăl vă rim bơngai lơ̆m khul ‘noh bơngai kon kông pơ̆n hŭt jơhngơ̆m đon tơchĕng ưh hơnhŏ, hơdrin hloh dơ̆ng lơ̆m choh jang sa xut xa pơngot rơvĕt tơjur dơnuh nhen lĕ ƀar ‘nu bơngai lơ̆m khul ‘noh Y Vinh hăm Y Tuyên. Đơ̆ng noh, pơjing đei jơhngơ̆m pran lang să lơ̆m Khul Ƀô̆ đô̆i so pơlei tơm păng lơ̆m rim pơlei pơla.”

Rŏ năng vă chă pơma, rim đảng viên bơngai Êđê lơ̆m Khul Ƀô̆ đô̆i so pơlei tơm Buôn Ma Thuột nhen ƀok Y Tuyên dăh mă ‘nhŏng Y Vinh hlôi păng tok bŏk pơjing jơhngơ̆m pran, jơhngơ̆m đon lui păng jơhngơ̆m đon lang să vă rim bơngai anai lơ̆m khul dăh mă kon pơlei pơla rim hơdrĕch hơdrung oei lơm pơlei tơm Buôn Ma Thuột kiơ̆ yok rok jơ̆ng, hơdrin yak hloh dơnuh hin dăh mă đei ‘măng pơm pơdrŏng, tơgop lơ̆m tơ iung pơjing pơlei tơm Buôn Ma Thuột pơma hơdrô̆ păng dêh char Đắk Lắk pơma atŭm roi năr roi pơdrŏng pran kơtang hloh dơ̆ng.