Dang ei tơdrong vă pơjing Khôi luơ̆t tŏk bŏk tơlĕch ăn apĭnh tơgop nơ̆r đơ̆ng kơdră tang măt Kuô̆k hô̆i 2 trong vă pơjing, trong vă pơjing 1: Tơchơ̆t ưh kơ ăn vơ̆r gre yak tơ̆ trong glung mư̆h đĭ et tơdrô hơlăk (tơgoăt iŏk tơdrong tơchơ̆t lơ̆m Khôi luơ̆t Tang găn hơlau, iung tơjră tang găn tơdrong ƀơm kơnê̆ đơ̆ng tơdrô hơlăk ƀier sơnăm 2019, pơlăp hăm rim gre kơdau tơ̆ trong nơnăm). Trong mă 2: Tơchơ̆t nhen Khôi luơ̆t Trong gre nơnăm sơnăm 2008 ‘noh ưh kơ ăn: "Vơ̆r gre bơbĭt tơdăh yŭh đak tơdrô hơlăk hloh 50 miligam/100 mililít pham dăh mă 0,25 miligam/1 kơlich yuh dui jơhngơ̆m". Adoi, kăl hơmet ming tơdrong tơchơ̆t đei ƀơm truh Khôi luơ̆t Tang găn hơlau, iung tơjră tang găn tơdrong đei ƀơm răm đơ̆ng tơdrô hơlăk, ƀier.

Găh lơ nơ̆r tơgop lăp đon hăm Trong vă jang mă 1 tơchơ̆t ưh kơ ăn vơ̆r gre yak tơ̆ trong glung mưh đĭ et tơdrô hơlăk, ƀier, yă Nguyễn Thị Thanh, Kơdră chĕp pơgơ̆r Hơnih bơ̆ jang vei lăng kơdră tang măt pơma: "Khei năr jang kiơ̆ tơchơ̆t ưh kơ ăn vơ̆r gre au hlôi mơ̆t lơ̆m tơdrong hơrih sa kơ ‘năr păng đei lơ kon pơlei lăp đon pơm kiơ̆ păng tŏk bŏk hlôi jing tơdrong joăt "đĭ et tơdrô huch hơlăk, ƀier ‘noh ưh kơ vơ̆r gre”, adoi pơm dă ƀiơ̆ đei tơdrong gre chă tơtơ̆m hơlŭk kơ yuơ tơdrô hơlăk, ƀier pơm ăn. Lơ̆m sơnăm 2023 lăp đơ̆ng rŏng khul bơ̆ jang atŏk kơtang xek phak hăm dôm bơngai vơ̆r gre pơm glăi đĭ et tơdrô hơlăk mă vơ̆r gre ‘noh tơdrong gre chă tơtơ̆m hơlŭk đei ƀơm truh hlôi et tơdrô hơlăk hlôi tơjur truh 25%; 50% măt bơngai lôch; 22% măt bơngai rơka. ‘Ngoăih kơ ‘noh hlôi pơm dă ƀiơ̆ tơdrong đei ƀơm răm kơnê̆ đơ̆ng tơdrô hơlăk, ƀier hăm dang 30 tơdrong jĭ jăn hli hlơt păng đei ƀơm kơtă truh hloh 100 tơdrong jĭ jăn anai".

Kơdră chĕp pơgơ̆r Hơnih bơ̆ jang Khôi luơ̆t kơ Kuô̆k hô̆i Hoàng Thanh Tùng jei lăp đon hăm trong vă pơjing ưh kơ ăn bơngai vơ̆r gre et tơdrô hơlăk ƀier. Mă lei, athei pơm hơdăh dơ̆ng rim nơ̆r se le găh tơdrong tơchơ̆t au păng tơblang hơdăh trŏ lăp găh “yuh tơdrô hơlăk lơ̆m hơkau jăn":"Pơm hơdăh dơ̆ng dôm trong jang khoa hŏk lơ̆m tơchơ̆t au. ‘Nau jĭ mĭnh lơ̆m dôm tơdrong mă lơ nơ̆r tơgop oei ƀơ ƀreh ‘noh kăl pơm hơdăh. ‘Moi kiơ̆ trong jang khoa hŏk ‘noh đei tơdrong ƀơm truh “Yuh tơdrô hơlăk lơ̆m hơkau jăn” lơ̆m rim mạng tơpôl jei pơma truh tơdrong au. Kăl đei nơ̆r tơblang mă hơdăh, vă pơm kơnăl ăn kơ bơ̆n hơlen vă tơgŭm djru hŭt hloi trong vă jang kiơ̆ pơchoh trong jang kiơ̆ nhen hrei au. Kơ yuơ, hlôi pơjing đei tơdrong joăt ‘lơ̆ng hơ iă, pơm dă ƀiơ̆ đei tơdrong hiong răm tih tên kơ yuơ chă et tơdrô hơlăk, ƀier pơm ăn đei tơdrong sar bar trong nơnăm".

Pơma dơnuh trong vă pơjing Khôi luơ̆t Trong nơnăm, Kơdră chĕp pơgơ̆r Hơnih jang Jên hu, kon jên bơ̆ jang Lê Quang Mạnh tơbăt, khei năr au ki tơdrong iung jang hơdoi rim kon jên bơ̆ jang Trung ương păng tơring vă tơ iung pơjing rim trong glung lơ̆m tơring rim dêh char. Tơdrong mă au iŏk đơ̆ng mă dôm sơnăm au ki, rim tơring thuê̆ ăn hơnih bơ̆ jang đei lơ, đei rơvơn hloh. Mă lei, găh đunh đai, kon jên jang Trung ương ‘noh jĭ kăl hloh. Kơ yuơ lơ loh, ‘nĕ kơ yuơ tơdrong mă ‘noh kơna pơm ăn truh hơmet ming trong pơkăp lơ̆m Khôi luơ̆t kon jên bơ̆ jang Teh đak:"Lơ̆m mĭnh khei ‘năr ayơ ‘noh, rŏ năng mĭnh jăl jang, 2 jăl jang vă akŏm đĭ jơhngơ̆m kơ teh đak vă iung jang keh đang đei trong hlung păng trong grung rĕnh. Mă lei bơ̆n jei ưh kơ tơ iung pơjing hơnơ̆ng trong glung păng trong glung rĕnh. Kơ yuơ ‘noh trong tơlĕch jang kăl kơ Pơm lêh hop akŏm tơlĕch ăn jăl jang au, jăl jang đơ̆ng rŏng. Kiơ̆ kơ inh, truh mĭnh khei năr ayơ ‘noh 5-10 sơnăm đơ̆ng rŏng, găh kon jên bơ̆ jang Trung ương; găh tơdrong kĕ jang ming man kơ rim hơnih jang găh Hơnih tơm vei lăng Trong nơnăm; tơdrong kĕ vei lăng adoi nhen sơđơ̆ng đei Trung ương gô lăng ba tơlĕch jang hơnơ̆ng găh trong nơnăm".

Kiơ̆ đơ̆ng Kơ iĕng Kơdră chĕp pơgơ̆r Kuô̆k hô̆i Nguyễn Đức Hải tơdrong kăl hloh ‘noh kĭ tơchơ̆t trong pơprŏ jang găh atŏk tơ iung trong glung teh đak vă lơ̆m jăl jang păh ai păng đunh sơnăm klăh asong kon jên jang vă iung jang keh đang kiơ̆ tơlĕch jang dôm tơdrong kăl hơdrol rim trong glung rĕnh tơm dơnơm vă yak kloh klĕch dih băl lơ̆m tơring. Kơ yuơ lơ loh, kon jên jang teh đak kăl akŏm sơđơ̆ng ƀlep tơdrong pơkăp, sơđơ̆ng, pơjing đei jơhngơ̆m pran atŏk tơ iung:“Bơ̆n kăl akŏm kon jên hu lơ hloh dơ̆ng. Kơ yuơ hrei au trong glung 1 jăl trong gĭt kăl hloh yak găn hloh Cà Mau dăh mă rim trong năm tơ̆ Hà Giang. Trong lơ loh ưh khan chă krao akhan trong glung rĕnh ôh. Kiơ̆ kơ ĭnh tơchĕng akŏm drơ̆ng mĭnh nơ̆r bơ̆ jang teh đak vei lăng păng hơnăp jang kơ Kon jên bơ̆ jang teh đak kăl akŏm rim trong jang đunh đai tai sơnăm vă tơmơ̆t jên jang ming man trong glung tơm ƀlep tơchơ̆t ‘lơ̆ng sơđơ̆ng. Hrei au tơdrong klăh asong kon jên bơ̆ jang tim gan hơtŏ dih băl. Tơdrong klăh asong trŏ lăp jĭ lăp đei jĭt dôm dêh char đĕch. Dôm tơring au gơ̆h iŏk yua kon jên bơ̆ jang vă iung jang hơdoi hăm teh đak vă iŏk tơvih teh dăh mă tơmơ̆t jên jang pơtrŭt kơtang rim tơdrong vă jang".