Anih vei lăng kon pơlei apŭng Phú Thiện đei hla ar chih apinh Anih vei lăng kon pơlei dêh char Gia Lai krao hơvơn dôm anih tĕch mơdro vang răt ƀum yoăn, tơgŭm ăn bơngai pơtăm yak hlŏh pơmat tat. Tơ̆ apŭng Phú Thiện, dang ei đei hlŏh 3.440ha, ƀum đei dang 68.800 tân, đĭ rô̆ đei 60% teh pơtăm bơih.

Đơ̆ng blŭng pơyan rô̆ truh dang ei, yă ƀum yoăn jur tôch reh. Mă hơdăh đơ̆ng 10.000 mĭnh kĭ, dang yă jur pă 3.500 hlak 1 kĭ. Yă reh, anih tĕch mơdro răt tơtơng, pơm ăn kon pơlei tôch pơmat tat. Hơtuch sơnăm sơ̆, Anih vei lăng choh jang xa păng atŏk tơiung tơring tơrang apŭng Phú Thiện hơlen năng, ƀôh teh pơtăm ƀum yoăn tơ̆ apŭng lơ ƀiơ̆ sơnăm sơ̆ dang 1.000 ha, păng tơtă ăn kon pơlei mưh pơih xă teh pơtăm mă lei ưh đei anih răt, ƀônh pơm ăn kon pơlei jang xa lôh, tơƀâp pơmat tat lơ̆m pơyan rô̆ ƀum.