Pơgê 11-1, Anih vei lăng găh Choh jang sa Hơtŏk tơiung tơring tơrang dêh char Dak Lak pơgơ̆r pơma đam “Trong jang tôm ƀa rơgoh tơlĕch ‘mê̆ ‘mach păng hơtŏk iŏk yua: vă pơma dơnuh tơdrong hlôh vao, chă đei grŭp trong jang lăp vă pơtrŭt tơdrong jang choh jang sa kơ dêh char hơtŏk tơiung kơjăp vei sơđơ̆ng phe ƀa, tơmam sa tơklep hăm tơdrong vei lăng cham char bri brăh. Pơm tơlĕch ƀa kơ Dak Lak dang ei dơ̆ng hơdrol tơring Tơ ter đak dơsĭ Pơbăh tŏk păng Tây nguyên hăm chŭn na rei pơtăm dang hloh 100 rơbâu hek tar, đei vă jê̆ 35% hơgăt teh rei pơtăm ‘long rim sơnăm kơ dêh char; iŏk yua jô̆ păh lăp đei hloh 69 tạ lơ̆m 1 hek ter, sơnăm 2023 tơmam jô̆ pơhlom đei dang 800.000 tấn.

Dak Lak hlôi pơjing đei dôm tơring pơm tơlĕch phe ƀa tơmam, pơm lăp hăm ‘meh vă răt yua lơ̆m teh đak kŭm nhen tĕch ăn teh đak đe. Mă lei, tơ̆ jơ pơma đam, dôm bơngai tang măt hlôi lăng ƀôh: pơm tơlĕch phe ƀa hrei ‘nâu tŏk bŏk tơƀơ̆p ưh kơ tŏ sĕt mơmat tat, long nol yua đơ̆ng tơplih tŏ ‘mi kial. Vă pơm tơlĕch ƀa kơjăp ‘lơ̆ng lơ, tơ jur tơlĕch ‘mê̆ ‘mach hnam kơmĭl, kăl kơ lăng kăl tơmơ̆t lơ̆m pơm tơlĕch dôm hơdrĕch ƀa lăp, yua phŏng, tơmam mă lăp, bơ̆jang choh jang sa gơh yua dơ̆ng, bơngơ̆t truh hloh dơ̆ng truh ki thuơ̆t pơtăm ƀa ‘nao.