Tŏk bŏk chă hơmet ƀai chih vă chih tơmơ̆t lơ̆m trang chonongsandaklak.vn, ‘nhŏng Y Pốt Niê, Kơdră chĕp pơgơ̆r Kŏng ty Êđê chehphe tơbăt, trang mơdro sa điên tư au đei pơjing tôch ‘lơ̆ng kơmăt, rơvơn ăn bơngai tĕch păng răt kơ yuơ đei nơ̆r chih tơbăt hơdăh kơ rim tơmam drăm.“Mă blŭng pơjing ăn tơdrong rơvơn ăn bơngai răt păng mă ƀar ‘nŏh hơnih mơdro sa nhen nhôn au gô tơƀôh tơbăt tơmam drăm lơ̆m au tôch kơ ƀônh, tơdrong bơ̆n chih tơmơ̆t lơ̆m au jei tôch kơ ƀônh, truh hloi bơngai ưh kơ măt găh kmăi kmŏk kơtơ̆ng ang jei gơh iŏk yua smartphone dăh mă laptop gơ̆h jang hloi, kơna kơnih ba tôch chhôk hơ iă păng hơmŏ akhan chonongsandaklak.vn roi năr roi atŏk tơ iung păng đei lơ bơngai băt truh, ưh khan lăp hơdrô̆ tơ̆ Đăk Lăk mă lei pơđĭ lơ̆m teh đak Việt Nam, pơđĭ lơ̆m apŭng plĕnh teh jei băt găh kơchơ tơmam drăm choh jang sa au.”

Kiơ̆ kơ mŏ Lê Thị Nga, chĕp pơgơ̆r Kŏng ty chehphe Vương Thành Công, ‘ngoăih tơdrong hơ iă pơjing đei hơnih vă bơngai răt păng bơngai tĕch pơma dơnuh dih băl kơtă, ưh kơ ‘moi kiơ̆ kơdranh tĕch mơdro, Kơchơ choh jang sa Đăk Lăk online oei jing hơnih vă rim hơnih mơdro sa mơ̆t lăng lơ̆m kmăi chă lăng vă băt hơdăh tơring pơtăm, hơnăn tơmam drăm tĕnh koăng păng trŏ ƀlep.“Nhôn hơmŏ tôch kơtang lơ̆m kơchơ au păng hơmŏ kơchơ au gô pơih trong hle ăn tơmam drăm choh jangs a Việt Nam pơma atŭm păng Đak Lăk pơma hơdrô̆.”

Kiơ̆ đơ̆ng yă Lại Thị Loan, Kơdră chĕp pơgơ̆r Khul kon pơlei choh jang sa dêh char Dak Lăk, tơdrong vang tĕch mơdro lơ̆m Kơchơ tơmam drăm choh jang sa dăk Lăk online gô pơtrŭt rim hơp tak xah, khul jang hơdoi, kon pơlei choh jang sa iung jang pơm hơtŏk kơjă tơmam drăm, chă jang sa pơjing đei tơmam drăm rơgoh ‘lơ̆ng kiơ̆ tơdrong pơkăp ‘lơ̆ng păng apĭnh pơjing hơnăn tơmam drăm. Adoi tơgŭm ăn kon pơlei băt hơdăh đe ‘meh vă răt iŏk yă kiơ kơna chă hơlen rei pơtăm ‘long pơtăm trŏ lăp, hơnhăk đei tĕch mơdro hlot; tơgop tơƀôh hơdăh dôm tơdrong đei, tơdrong rơvơn, trong choh jang sa kơ dêh char, đơ̆ng noh krao hơvơn tơmơ̆t jên jang, choh jang sa kiơ̆ hơtŏk kơjă kăp gĭt tơmam drăm choh jang sa.“Nhôn pơjing Khul chĕp pơgơ̆r Kơchơ gô dăr lăng hơlen hơnơ̆ng vă dôm tơmam drăm trŏ lăp hăm hlôi kĭ pơkăp adoi nhen tơgŭm djru ăn bơngai tĕch lơ̆m tơdrong tĕch răt sơđơ̆ng ƀlep trong tơlĕch jang păng sơđơ̆ng đei iok yua ăn bơngai tĕch păng bơngai răt. Trong tơlĕch tuch luch ‘noh pơm hơtŏk jang sa iŏk đei, hơtŏk tơdrong hơrih sa kơ kon pơlei choh jang sa tơgop pơm hơtŏk tơ iung choh jang sa kơ dêh char ‘noh choh jang sa rơgoh ‘lơ̆ng, choh jang sa tŭh mơ̆r păng atŏk tơ iung kơjăp ‘lơ̆ng adoi nhen jang kiơ̆ kmăi kmŏk kơsô̆ lơ̆m choh jang sa, lơ̆m tĕch mơdro tơmam drăm vă rim răih kon pơlei choh jang sa mĭnh păh ‘noh bơngai choh jang sa adoi jĭ mĭnh ‘nu bơngai mơdro sa kơtă lơ̆m chŭn mir kơ dih bơ̆n hloi.”

ɃokNguyễn Thiên Văn, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk tơbăt, lơ̆m dêh char đei 152 tơmam drăm choh jang sa đei hơlen pơkăp ‘lơ̆ng đơ̆ng 3 sao năm tơ̆ kơpal, kơ yuơ lơ loh tơdrong tơƀôh tơbăt tơgoăt dih băl ƀar păh bơngai choh pơtăm hăm bơngai răt yua ‘moi kiơ̆ tĕch mơdro lơ̆m điên tư ‘noh jĭ tôch kơ kăl hloh. Ƀok Nguyễn Thiên Văn sơkơ̆t hơdăh, lơ̆m khei năr kơnh, rim tơdrong jang tĕch mơdro lơ̆m hơnih tĕch mơdro điên tư gô đei jing trŏ lăp hloh, ‘lơ̆ng hơ iă hloh păng pơjei dih băl kơtang hloh. Khul kon pơlei choh jang sa kăl tơgŭm djru rim hơp tak xah, ŭnh hnam mơdro sa, kon pơlei choh jang sa hơmet mă brĕ, mă tôm tong đơ̆ng tơdrong choh pơtăm, rong kon tơrong, phĕ iŏk, mong răk … vă tơmam drăm ‘lơ̆ng, pơm pơkeh trong pơkăp tơchă băt hơdăh tơm a la chă tơmam drăm.“Khul kon pơlei choh jang sa dêh char kăl hơnơ̆ng pơrô̆ pơrôp tơƀôh tơbăt jơ̆p jang trang kơtơ̆ng ang điên tư adoi nhen tơƀôh tơbăt dôm tơdrong tơchơ̆t đei ƀơm truh tơmơ̆t tơmam drăm lơ̆m hơnih tĕch mơdro kơ bơ̆n. Mă ƀar lơ̆m khei ‘năr tơlĕch jang kiơ̆ tơdrong tơmam drăm ‘lơ̆ng, tơdrong kơjă, tơdrong pơm hơtŏk iŏk đei kơjăp tơmam drăm ‘noh jei athei Khul kon pơlei choh jang sa hơnơ̆ng chĕp pơgơ̆r, pơrô̆ jang kiơ̆ kơtang hloh dơ̆ng vă rim bơngai lơ̆m khul ling lang pơjing đei ‘lơ̆ng tơmam drăm bơ̆n găh kơ loăi tơmam drăm, chih tơbăt hơdăh tơring pơtăm adoi nhen hơnăn tơmam drăm.”

Bơngai chih kơtơ̆ng ang hlôi đei jơ pơma dơnuh hăm yă Lại Thị Loan, Kơdră vei lăng khŭl kon pơlei jang chŭn mir dêh char Dak Lak - anih tơ ‘ngla vei lăng kơ Chonongsandaklak.vn găh dôm hơtơdrong hơgăt vang jang lơ̆m kơchơ tơmam đơ̆ng choh jang sa online kŭm nhen hơnăp jang đơ̆ng Khŭl lơ̆m vei lăng trang tĕch mơdro lơ̆m điện tử âu.

-Apĭnh ih roi tơbăt, mưh vang jang lơ̆m chonongsandaklak.vn bơngai tĕch kăl kơ athei vei sơđơ̆ng tơdrong pơkăp kiơ ưh?

-Bà Lại Thị Loan: “Mưh vang jang lơ̆m trang tĕch mơdro điện tử kơchơ tơmam đơ̆ng choh jang sa Đắk lắk.vn ‘noh hăm bơngai lơ̆m kon pơlei jang chŭn mir dôm hơp tak xăh, anih mơdro sa khŭl tơdrong jang păng grŭp tơdrong jang krao vă kơđêh ‘noh bơngai tĕch athei đei mă mônh ‘noh jĭ tơdrong ‘lơ̆ng đơ̆ng tơmam, dôm tơmam tĕch lơ̆m mạng athei vei sơđơ̆ng tơdrong pơkăp dôm tơdrong hơgăt ‘lơ̆ng kiơ̆ tơchơ̆t atŭm păng hơdai hăm ‘noh gô athei pơm kiơ̆ dôm tơdrong tơchơ̆t đơ̆ng khôi luơ̆t kŭm nhen tơchơ̆t đơ̆ng Kơ chơ găh trong pơm hla ar kŭm nhen tĕch mơdro; mă pêng dơ̆ng ‘noh jĭ mưh vang jang lơ̆m kơchơ ‘noh bơngai tĕch gô đei trong vă pơm liơ ‘noh hơtŏk tơiung tơmam đơ̆ng kơ dih ‘lơ̆ng hloh vă pơm lăp hăm ‘meh vă đơ̆ng anih tĕch mơdro. Oei hăm bơngai răt ‘noh mư̆h vang bơ̆jang kiơ̆ dôm tơdrong mơdro sa kŭm athei vei sơđơ̆ng tơdrong tơpăt rơđăh păng kơjăp kŭm nhen vei sơđơ̆ng dôm tơdrong jang hơdai hăm bơngai tĕch gô đei pơm kiơ̆.

-Mưh lei vang jang lơ̆m Kơchơ tơmam đơ̆ng choh jang sa online âu sư gô đei iŏk yua kiơ hă yă?

-Bà Lại Thị Loan: “Tơdrong đei yua mă mônh ‘noh jĭ hăm bơngai tĕch, ưh khan lăp tĕch đei dôm tơmam hơdăh mă tơdrong gĭt kăl ‘noh jĭ ba roi tơƀôh đei tơdrong tơroi găh tơmam đơ̆ng bơ̆n truh hăm đĭ đăng rim bơngai; tơdrong mă 2 dơ̆ng ‘noh jĭ ƀơ̆t vang jang tĕch lơ̆m mạng ‘ngoăih kơ tơdrong roi tơƀôh găh tơmam ‘noh bơngai tĕch gơh băt kơtơ̆ng ang găh anih tĕch mơdro tơ̆ lơ̆m dêh char lơ̆m teh đak kŭm nhen ‘meh vă găh pơyan jang vă bơ̆n hơdăh đei ‘meh vă anih tĕch mơdro lơ liơ pơyan jang lơ liơ vă đơ̆ng noh bơ̆n băt hơdăh đei ‘noh jĭ hrei ‘nâu ‘meh vă anih mơdro sa thoi yơ pơyan jang lơ liơ vă gơh hơmet ming pơm tơlĕch; mă pêng dơ̆ng ‘noh jĭ đei hơnih vă jang hơdai pơm tơlĕch hăm anih mơdro sa vă pơjing trong jang kơjă tơmam đơ̆ng choh jang sa păng mă loi ‘noh jĭ anih mơdro sa gô đei tôch kơ lơ iŏk yua ‘noh jĭ tơdrong rơđăh đơ̆ng tơmam, tơ̆ âu tôch kơ lơ tơmam gơh pơting băl găh kơjă ‘lơ̆ng păng anih pơm tơlĕch păng sơđơ̆ng găh tơmam ‘lơ̆ng.

- Hăm hơnăp jang ‘noh jĭ Anih jang tơ ‘ngla vei lăng đơ̆ng trang tĕch mơdro điện tử âu, Khŭl vei lăng kon pơlei jang chŭn mir dêh char gô vei lăng, păng tơgŭm dôm tơ ‘ngla tơmam lơ̆m trang thoi yơ vă vei sơđơ̆ng ‘lơ̆ng tơmam hai kŭm nhen dôm tơdrong tơchơ̆t đơ̆ng khôi luơ̆t hai hă yă?

-Bà Lại Thị Loan: Khŭl vei lăng kon pơlei jang chŭn mir dêh char pơjing Khŭl vei lăng kơchơ păng hlôi đei tơchơ̆t hơdăh hăm hơnăp jang đơ̆ng dôm bơngai jang lơ̆m khŭl gô đei hơnăp jang hơdăh lơ̆m tơdrong vei lăng kơtơ̆ng ang vei lăng dôm tơdrong mơdro sa lơ̆m trang mơdro sa điện tử vă vei sơđơ̆ng răh bơngai tĕch păng bơngai răt kơchăng mă lei hăm tơdrong vei lăng dăr lăng tôch kơ jăp dôm tơdrong kơtơ̆ng ang dôm tơmam păng tơdăh đei pơm glăi gô sek phak kiơ̆ tơdrong tơchơ̆t păng ưh kơ đei tơdrong ‘noh jĭ gô lê̆ dôm tơdrong glăi găh tơdrong hơgăt ‘lơ̆ng đei ƀôh. Đon tơchĕng ‘nâu jĭ hơnih mơdro sa mă Khŭl vei lăng kon pơlei jang chŭn mir dêh char jang đei vă pơjing yua kơ tơdrong đei yua ưh kơ sĭ đei lơi mă ‘meh roi tơƀôh hơnăn tơmam đơ̆ng dêh char pơjing hơnăn tơmam kơ dêh char đơ̆ng noh sơkơ̆t hơdăh hơnăn tơmam đơ̆ng choh jang sa kơ  Việt Nam

          -Găh đunh đai, Khŭl jang gô đei dôm trong jang păng pơih să trang tĕch mơdro điện tử âu thoi yơ hă yă?

-Bà Lại Thị Loan: Hăm 1 trong jang mơdro sa điện tử dăh mă 1 mĭnh ứng dụng găh kơmăy kơmŏk kơsô̆ hơ yơ ‘noh roi ‘năr roi athei tơplih ‘nao vă lăp hơdai hăm tơdrong hơtŏk tơiung kơtơ pôl ‘noh Trang tĕch mơdro điện tử Chonongsandaklak.vn kŭm gô thoi noh, gô athei đei tơdrong tơplih ‘lơ̆ng, tơdrong hơtŏk ming ‘lơ̆ng. Tơdăh nhen 500 kơdeng tơmam ưh kơ pơm lăp hăm ‘meh vă ‘noh gô pơih să dơ̆ng păng nhôn klăih song trong tơlĕch jang kiơ̆ rim jăl jang păng đei tơlĕch jang hơtŏk ‘lơ̆ng kŭm nhen pơih să kơdeng tơmam tơdăh ‘meh vă đơ̆ng bơngai vang jang pơih să păng ling lang hơmet ming păng tơdrong jang vei lăng ‘noh kŭm gô kơjăp hloh dơ̆ng vă pơm liơ ‘noh hơnih mơdro sa điện tử bơ̆jang đei yua hloh ưh kơ sĭ đei dôm yơ tơmam lơ̆m năr mă ‘noh jĭ roi tơƀôh đei tơmam đơ̆ng choh jang sa kơ dêh char kŭm nhen kơ Việt Nam păng dôm tơmam OCOOP kơ 63 dêh char pơlei tơm.

- Lei ah, bơnê kơ ih găh dôm tơdrong tơroi âu hơ!