Đăk Lăk dang ei đei 803 Hơp tak xah, hơvơn pơhlom 71.000 anih vang jang păng 23.000 ‘nu bơngai jang. Tơdrong iŏk yua hăm rim Hơp tak xah đei pơhlom 1 tih 800 trĭu hlj minh sơnăm. Dôm Hơp tak xah, jơnŭm jang hadoi kơ dêh char mă blŭng tơguăt hăm kơjă pơm tơlĕch tơmam drăm, jang hadoi hăm dôm anih jang mŭk drăm păng đei jơnei.

Kiơ̆ kơ ƀok Huỳnh Bài, Kơdră Jơnŭm jang Hơp tak xah dêh char Đăk Lăk dang ei, vă dôm Hơp tak xah pơm jang đei jơnei, lơ̆m khei năr truh jơnŭm pơgơ̆r tơring kăl đei trong tơgŭm dôm Hơp tak xah pơklaih tơnap tap lơ̆m tơdrong jang tĕch pơdro. Atŭm hăm noh, hơdrin tơgŭm dôm Hơp tak xah lơ̆m tơdrong hơtŏk jang tĕch pơdro, tơbang tơmam drăm, tơguăt pơm tơlĕch hăm tơdrong hiôk kơ rim tơring teh.