Đăk Lăk: Jang kaphê tơguăt hăm pơtăm 'long bri vă pơtrŏ hăm hơyuh tŏ 'mi tơplih
Thứ bảy, 10:06, 16/12/2023
VOV Tây Nguyên/Lan tơblơ̆
VOV Tây Nguyên/Lan tơblơ̆
VOV4.Bahnar - Hơmet pơ-'lơ̆ng bri lơ̆m tơdrong jang kaphê, pơtăm kaphê tơguăt hăm pơtăm 'long bri vă pơtrŏ hăm hơyuh tŏ 'mi tơplih. 'Nâu jing minh lơ̆m lơ trong jang đei tơlĕch lơ̆m 'măng pơma đam “Hơmet pơ-'lơ̆ng cham char tơ̆ Đăk Lăk: Trong hiôk păng tơnap tap” kơyuơ Anih jang gah 'long bri nhiê̆t đơ̆i pơgơ̆r ah năr 15/12, tơ̆ pơlei tơm Buôn Ma Thuột.
Đăk Lăk dang ei đei hloh 657 rơbâu ha teh choh jang, pơtăm lơ hơdrĕch 'long kŏng ngĭp nhen kaphê, kơsu, tiu, găr điu, păng 'long xa plei. Lơ̆m noh kaphê đei jê̆ 213 rơbâu ha, hăm tơdrong đei yua truh 550 rơbâu tâ̆n rim sơnăm.
Tơ̆ pơma đam, rim bơngai tang măt sơkơ̆t, tơdrong đei jơnei đơ̆ng dôm tơdrong jang hơmet pơ-'lơ̆ng bri, mă kăl noh hăm tơdrong jang kaphê tơguăt hăm pơtăm 'long bri. Rim bơngai tang măt akhan, trong jang âu pơyua lơ gah mŭk drăm, hơtŏk pơyua lơ hloh ăn bơngai pơm jang. Tơdrong kăp gĭt gah tơpôl kiơ̆ tơdrong hơvơn bơngai jang păng hơtŏk kơjă 'năr pơm jang. Atŭm hăm noh pơm jang pơ-'lơ̆ng cham char, tơjur ƀiơ̆ đak ruih ăn pơgar 'long pơtăm, vei sơđơ̆ng teh hơ-iuch, mă kăl noh lơ̆m pơyan phang.
Viết bình luận