‘Nau nơ̆r athei đơ̆ng Khul dăr lăng kơ Jơnŭm vei lăng kon pơlei dêh char Dak Lăk lơ̆m jơ bơ̆ jang hăm Hơnih vei lăng kon pơlei dêh char găh jang kiơ̆ Tơdrong tơchơ̆t đơ̆ng Jơnŭm vei lăng kon pơlei găh “Atŏk tơ iung chehphe kơjăp ‘lơ̆ng kơ dêh char truh sơnăm 2020 păng lăng truh sơnăm 2030”(krao vă kơ đeh ‘noh tơdrong tơchơ̆t 24).

Đơ̆ng rŏng 7 sơnăm jang kiơ̆ Tơdrong tơchơ̆t 24 (2017 - 2023), lơ trong jang hlôi iŏk đei jơnei ƀlep trong tơlĕch ăn nhen: găh plei iŏk đei hloh 510.000 tân/sơnăm, lơ̆m 1ha đei plei 27 tân găr, tŏk 14% pơtêng hăm Tơdrong tơchơ̆t. Akŏp hơgăt teh chephe đei drơ̆ng nơ̆r ‘noh 30.300 héc ta, akŏp iŏk đei 100.000 tân, đei dang 90% plei chehphe đei chă phĕ sơ̆k păng vei lăng ƀlep hăm trong pơkăp kih thuơ̆t. Tơ̆ jơ bơ̆ jang, rim kơdră tang măt akhan, tơdrong tơlĕch jang kiơ̆ Tơdrong tơchơ̆t 24 oei đei lơ tơdrong tim mă trŏ lăp, tơhlăk tơhlĭn, mă kăl tơdrong chă tŏk iŏk jên vă pơtăm ming chehphe, tim mă đei trong iung jang hơdoi kơjăp ‘lơ̆ng ƀar păh rim hơnih mơdro sa pơm tơlĕch chehphe hăm tơring. Atŭm hăm ‘noh, tơdrong tơlĕch rim trong pơkăp kơ Tơdrong tơchơ̆t 24 truh hăm rim hơnih kơdro sa tim mă tơtom, mĭnh ƀar tơring tim mă lăng kơjăp kơna tơlĕch jang kiơ̆ bơ̆ jang hơdoi tim mă jơnei, hơgăt teh chehphe iŏk đei drơ̆ng nơ̆r ‘lơ̆ng oei tŏ sĕt…Khul dăr lăng athei, rim hơnih bơ jang păng tơring lăng ba kơjăp hloh dơ̆ng tơlĕch jang kiơ Tơdrong tơchơ̆t 24 đơ̆ng Jơnŭm vei lăng kon pơlei dêh char. Lơ̆m au, Hơnih vei lăng kon pơlei dêh char  Dak Lăk kăl hrôih pơgơ̆r lăng hơlen pơtôch jang kiơ̆ Tơdrong tơchơ̆t au.