Kiơ̆ kơ ‘noh, Hơnih vei lăng kon pơlei dêh char Dak Lăk athei Kơdră chĕp pơgơ̆r Hơnih vei lăng kon pơlei rim apŭng, thĭ xah, pơlei tơm pơrô̆ athei rim hơnih bơ̆ jang ƀơm truh, rim khul, rim bơngai jang, tĕch mơdro chehphe lơ̆m tơring pơprŏ trong vă jang păng atŏk kơtang vei lăng kơtang hơgăt teh chehphe truh khei ‘năr phĕ; atŏk kơtang bơ̆ jang pơrô̆ pơrôp, hơvơn rim khul, rim bơngai ưh kơ gơ̆h chă phĕ chehphe kơsĕ, sơđơ̆ng ăn chehphe đum hloh 85% (tơdăh dôm hơgăt chehphe phĕ hơtuch pơyan ‘noh gơ̆h phĕ chehphe đum truh 80%).

Adoi, đei trong jang xek tơlang hăm rim bơngai phĕ kơsĕ, phĕ chehphe ‘lơ̆p; pơtho ăn kon pơlei hơmet ăn cham sơ̆k, kmăi sơ̆k vă sơđơ̆ng ăn chă sơ̆k tơdăh đei khei ‘năr chă phĕ tơƀơ̆p hê̆ ‘mi đunh năr pơm kơnê̆ truh plei, găr chehphe.