Đơ̆ng rŏng khei ‘năr iŏk yoa lơ kơloăi phŏng, pơgang sơdrông ăn pơgar ‘long chĕh phe, ƀok Ama Hồng (Y Đức Êban) tơ̆ plei Sút M’grư, xăh Cư Suê, apŭng Cư M’gar ƀôh pơgar ‘long jing ‘lơ̆ng mă lei jơhngâm pran roi jur yoa đơ̆ng đa jĭ kơ̆l, ving măt. Yoa thoi nŏh, mưh kăn ƀô̆ pơtho choh jang xa truh roi tơƀôh trong jang rong kơtu iŭ vă tang găn sơdrông, ƀok chih măt jang kiơ̆ hloi.

Đơ̆ng rŏng 1 sơnăm jang kiơ̆, ƀok ƀôh tôch đei yoa đơ̆ng tơdrong rong kơtu iŭ lơ̆m pơgar chĕh phe: “Inh ưh kĕ krơ̆ng hăm pơgang sơdrông yoa drol sơ̆ ‘long chĕh phe inh hơnơ̆ng pruih pơgang, mă loi jĭ vă pơlôch kơnu kuer dơng, đang ‘nŏh jĭ pơgang yă de. Mă lei đơ̆ng rŏng kơ đei kơtu iŭ inh ƀôh pơgar ‘long ưh kăl pruih pơgang, chĕh phe oei jing ‘lơ̆ng, ưh đei sơdrông, kơnu kuer dơng. Mă 2 dơ̆ng ‘nŏh săy phŏng kŭm tŏ sĕt ƀiơ̆, sơnăm ‘nâu inh săy phŏng tŏ sĕt đĕch.”

Oei ƀok Đặng Văn Huy tơ̆ thôn 3, xăh Cư Suê, apŭng Cư M'gar, bơngai hơnơ̆ng tơtămn chă trong jang chĕh phe hăm mơr, tơdrong iŏk yoa kơtu iŭ vă tang găn sơdrông phă ‘nŏh jĭ trong jang kơjăp đunh păng tôch ‘lơ̆ng hăm cham char: “1 sơnăm athei pruih pơgang sơdrông dang 10 ‘măng ‘nŏh dang ei rong kơtu iŭ, pruih pơgang jur pă 2 - 3 ‘măng đĕch, sư mong đei jên tôch lơ. Mă loi mưh pruih pơgang sơdrông ‘nŏh pruih kơloăi pơgang ưh gan kơtang ‘năi. Kơchơ̆t pơnhŭl kŭm jur tŏ sĕt ƀiơ̆, ưh pă đei kơtang nhen adrol sơ̆ bơih”.

Kiơ̆ ƀok Huỳnh Văn Tấn, Phŏ Lăm bơ̆ jang ki thuơ̆t – pơtho tơƀôh găh Anih vei lăng ‘long pơtăm tơring Tŏk bŏk: tơdrong kăl hlŏh đơ̆ng kơtu iŭ ‘nŏh vei lăng sơđơ̆ng ‘lơ̆ng rim tơmam đei yoa ăn pơgar ‘long. Mă tơpă ăn ƀôh, kơtu iŭ chă xa bơ̆n sơdrông, đei hloi kơnu kuer dơng, sơdrông, yă de. Găh noh dơ̆ng, kơtu iŭ đei băt truh jĭ ƀônh arih, gơ̆h arih kiơ̆ tôch hrĕnh hăm cham char tơplih. Dôm pơgar ‘long tơ̆ Tây Nguyên jĭ anih tôch ‘lơ̆ng vă tơgŭm ăn kơtu iŭ chek lar. Anih vei lăng ‘long pơtăm tơring Tŏk bŏk vă hơnơ̆ng tơchĕng hơlen, roi tơƀôh păng pơih xă trong jang âu ưh lăp tơ̆ pơgar chĕh phe đĕch mă oei hăm dôm kơloăi ‘long kăp gĭt nai hai tơ̆ hơnăp kơnh.

Ƀok Huỳnh Văn Tấn ăn tơbăt: “Tơ̆ Tây Nguyên dôm kơloăi ‘long kơ ti đô ‘nŏh, ‘ngoăih kơ chĕh phe oei đei ‘long sầu riêng hai, sơnăm ‘nâu nhôn jang tơ̆ ‘long chĕh phe tơ̆ 2 dêh char Đắk Nông păng Đắk Lắk. Sơnăm truh, nhôn vă jang tơ̆ ‘long sầu riêng. Tơdrong tơm ‘nŏh vă tơgŭm ăn kon pơlei jang chŭn mir hlôh vao kơjăp ƀiơ̆ găh tơdrong đei yoa đơ̆ng kơtu iŭ lơ̆m tơdrong tang găn sơdrông phă, ưh lăp hăm pơgar chĕh phe đĕch mă oei hăm pơgar ‘long sầu riêng hai”

Gơ̆h ƀôh, rong kơtu iŭ lơ̆m pơgar cheh phe tŏk bŏk jing 1 trong jang ‘lơ̆ng tôch đei yoa, da ƀiơ̆ hiong jên jang păng kăl loi ‘nŏh ưh đei pơm ‘mê̆ ‘mach cham char, lăp hăm trong jang choh jang xa kơjăp ‘lơ̆ng. Anih choh jang xa Đắk Lắk oei pơlung kon pơlei jang kiơ̆ păng pơih xă trong jang rong kơtu iŭ vă tang găn sơdrông phă ăn ‘long pơtăm.