Lơ̆m noh, gah kaphê đei 490 trĭu đôlar, dôm tơmam drăm plei ‘long xa tĕch ăn teh đak đe đei 120 trĭu đôlar. Tơroi ah hop akŏm sơkơ̆t tơdrong jang tĕch pơdro, ƀok Đoàn Ngọc Có – Phŏ Kơdră Anih Choh jang xa păng Hơtŏk tơring tơrang Gia Lai ăn tơbăt, tơdrong mă âu kĕ đei gơnơm tơdrong jang hadoi kơjăp đơ̆ng dôm anih choh jang xa păng anih jang tĕch pơdro. Dang ei jâ̆p dêh char đei hloh 256.000ha ‘long pơtăm dơnơm đei pơtăm kiơ̆ tơchơ̆t tĕch ăn teh đak đe nhen GlobalGAP, Rain Forest, Oganic, 4C,…

Lơ̆m noh hloh 58.000 ha hlôi đei tơchơ̆t gah tơm a hla chă păng kơ hrĕng hectar hlôi oei lơ̆m pơkăp pơm jang đơ̆ng kon pơlei jang mir păng anih jang mŭk drăm, đei tơdrong vang jang đơ̆ng hloh 200 hơp tak xah, tơgŭm tơdrong tĕch răt tơmam choh pơtăm hiôk hian hloh. Lơ̆m sơnăm 2023, anih choh jang xa păng tĕch pơdro adoi pơgơ̆r lơ tơdrong hop akŏm păng hơtŏk dôm tơdrong pơm tơlĕch lơ tơmam choh pơtăm kiơ̆ pơkăp kơjăp sơđơ̆ng, pơgơ̆r pơih să tơring tĕch răt hăm dôm teh đak jang kiơ̆ Tơchơ̆t tĕch pơdro hiôk hian nhen EU, Nhật Bản, Hàn Quốc…; hơtŏk pran tĕch pơdro, chơ chă tơring tĕch răt.