Sơnăm 2023, găr Mắc ca đơ̆ng Công ty Damaca Nguyên Phương, apŭng Krông Năng, dêh char Đắk Lắk đei măt tơ̆ đĭ đăng dêh char, plt lơ̆m teh đak păng tĕch mơdro kiơ̆ trong tơm truh tơ̆ teh đak Nhật Bản. Yă Nguyễn Thị Thu Phương, Kơdră chĕp kơ̆l công ty ăn tơbăt, vă yak hlŏh dôm tơdrong pơmat tat, pơlong nol đơ̆ng mŭk drăm jur tŏk, anih tĕch mơdro kơchăng mong akŏm tôm tơmam đơ̆ng tơring pơtăm, hơtok tơdrong jang hơdoi, pơih xă anih tĕch mơdro. Sơnăm 2024, hơdai hăm pơm hơtŏk tơmam ‘lơ̆ng, anih tĕch mơdro hơnơ̆ng năng kăl roi tơbăt tơmam truh tơ̆ anih tĕch mơdro tơ̆ teh đak đe: “Nhôn oei bơ̆ jang hăm 1,2 anih tĕch mơdro tih nhen Trung Quốc păng 1,2 teh đak tơ̆ Ả Rập tôch hơmĕng tơ̆ hơnăp kơnh gô iŏk đei lơ tơdrong ‘lơ̆ng găh anih tĕch mơdro vă gơ̆h tĕch mơdro, jang xa hiôk sơđơ̆ng”.

Sơnăm ‘nâu, hơdai hăm atŏk tơiung anih tĕch mơdro lơ̆m teh đak, HTX choh jang xa, pơvih pơvăn Công bằng Ea Tu, xăh Ea Tu, plt Buôn Ma Thuột, dêh char Đắk Lắk, hơnơ̆ng hue lăng truh tơdrong tĕch mơdro tơ̆ teh đak đe hăm dôm tơmam chĕh phe ‘lơ̆ng. Ƀok Trần Ðình Trọng, Kơdră vei lăng HTX tơroi, tơdrong pơm tơlĕch chĕh phe ‘lơ̆ng hlôi pơm hơtŏk đei kơjă đơ̆ng găr cheh phe, hơnhăk ba tơdrong đei yoa tôch lơ ăn kon pơlei mưh kơjă cheh phe sơđơ̆ng ‘lơ̆ng păng lơ ƀiơ̆ tơ̆ ‘ngoăih đơ̆ng 2 - 2,5 triu hlak jên 1 tân. Dang ei, HTX choh jang xa pơvih pơvăn Công bằng Ea Tu oei tơlĕch trong pơm lơ tơmam kiơ̆ tơdrong ‘mĕh vă tơ̆ anih tĕch mơdro, tơmam roi đunh roi ‘lơ̆ng kiơ̆ đơ̆ng sơ̆k, hơdrĕng, ot pơm dôm tơmam chĕh phe 'lơ̆ng.

" 'Nao âu nhôn pơm đei mã tăh tơpu ăn chĕh phe hơdrĕng, cheh phe ƀôt păng chĕh phe hach vă tech tơ̆ Trung Quốc. Hăm chĕh phe 'lơ̆ng, roi đunh roi đei lơ bơngai răt yoa sư jing tôch hiôk hian păng tôch đei yoa hăm bơngai pơtăm. Nhôn pơlung kon pơlei, bơngai pơtăm vei kơjăp trong jang rơgŏh 'lơ̆ng, lê̆ pruih pơgang sơdrông lơ, lê̆ pruih pơgang 'ngiĕt 'nŏh tơdrong jang xa gơ̆h kơjăp 'lơ̆ng”.

Kiơ̆ ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk, sơnăm 2023 jĭ 1 sơnăm jang xa đei yoa lơ đơ̆ng anih choh jang dêh char mưh jang tŏk truh 4,88%. ‘Nâu jĭ kơsô̆ tŏk lơ hlŏh lơ̆m dôm anih jang mŭk drăm tơ̆ dêh char. Kŭm hăm ‘nŏh, tơdrong kơjă 1,2 tơmam choh jang xa nhen: sầu riêng, cheh phe, tiu, ƀa tŏk păng Đắk Lắk hơtŏk tơdrong tĕch mơdro tơ̆ teh đak đe kiơ̆ trong tơm kơna hlôi pơm hơtŏk đei kơjă tơmam, hơnhăk ba iŏk yoa kơjăp ăn kon pơlei, dôm bơngai jang đei tơmam drăm, kơjă tơmam tŏk truh 15.000 ti pơting hăm sơnăm 2022. Jên tĕch mơdro tơ̆ teh đak đe đơ̆ng dêh char ‘măng mă blŭng iŏk đei truh 1,6 ti đô la Mi.

Sơnăm 2024, dêh char Đắk Lắk hơnơ̆ng tưk tơiung tơdrong pran ‘lơ̆ng đơ̆ng choh jang xa, mă loi năng kăl tơdrong pơih xă anih tĕch tơmam tơ̆ teh đak đe, dêh char hơmĕng vang tơgop hơnhăk mŭk drăm, tơpôl dêh char roi tŏk ‘lơ̆ng. Vă jang đei tơdrong hơmĕng âu, ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk ăn tơbăt:

"Anih tĕch mơdro tơmam ‘nŏh kăl hlŏh. Sơnăm 2024, anih jang vă tơchĕng hơlen 16 tơdrong tơchơ̆t tĕch mơdro hiôk hian mă Việt Nam kĭ hăm dôm tơring, dôm teh đak vă tơgĕch iok dôm tơdrong ‘lơ̆ng đơ̆ng tơdrong tơchơ̆t tĕch mơdro hiôk hian âu păng tơchĕng hơlen dôm tơring ‘mĕh răt iŏk tơmam đơ̆ng Việt Nam mă Đắk Lắk đei lơ, vă đơ̆ng noh tơlĕch trong jang xa, pơm lăp hăm tơdrong ‘mĕh vă, lăp hăm tơdrong hơgăt tơmam ‘lơ̆ng đơ̆ng dôm teh đak, đơ̆ng noh pơm hơtŏk đei kơjă tơmam păng tĕch mơdro sơđơ̆ng ‘lơ̆ng”.