Hloh 200 ‘nu kon pơlei jang chŭn mir, hơp tak xăh tơ̆ dêh char Dak Nông hlôi đei năr tơƀơ̆p, pơma dơnuh, tơchă nơ̆r pơma hơdai hăm dôm anih mơdro sa lơ̆m păng ‘ngoăih dêh char. Truh dang ei, Dak Nông hlôi hơtŏk tơiung đei 23 tơmam tơm, tơmam pran, tơmam ‘lơ̆ng hăm đei lơ păng ‘lơ̆ng đơ̆ng tơmam choh jang sa ƀrư̆ ƀrư̆ sơkơ̆t hơdăh anih dơ̆ng lơ̆m anih tĕch mơdro.

Lơ̆m noh đei 140.000hek tar cheh phe, plei hloh 350.000 tấn, hơgăt teh tiu 34.000 hek tar dơ̆ng hơdrol lơ̆m teh đak. Hơdai hăm ‘noh oei đei dôm kơ loăi ‘long sa plei nhen sầu riêng, ƀơ, mắc-ca hăm hơgăt teh să păng tơmam lơ. Tơ̆ hop akŏm, dôm anih mơdro sa truh đơ̆ng lơ dêh char pơlei tơm kŭm hăm dôm hơp tak xăh, kon pơlei jang chŭn mir tơ̆ dêh char Dak Nông hlôi tơpăt pơma dơnuh, tơchă nơ̆r pơma vă jang hơdai yak truh pơjing dôm trong jang hơdai pơm tơlĕch - tĕch tơmam choh jang sa.