Dang ei Trung Quốc hlôi ƀơk vă jê̆ 1.400 mã tơring pơtăm păng 188 mã anih tăh tơmam lơ̆m tơpu ăn teh đak Việt Nam. 1 puăt blŭng sơnăm ‘nâu, tĕch mơdro tơ̆ teh đak tơƀâp pơmat tat yoa jâu đei lơ kơchơ̆t pơgang kơnê̆ pơm ăn plei sầu riêng ‘lơ̆ng păng kơchơ̆t Cadimi, lơ nơ̆r akhan, athei pơjing anih set hơlen plei sầu riêng tơ̆ dôm tơring pơtăm tơm. Ƀok Trần Minh Châu, bơngai tang măt ăn Công ty TNHH Hơlen năng tơmam ‘lơ̆ng Vinacontrol, ăn tơbăt công ty hlôi tơlĕch trong jang ăn tơdrong ‘nâu bơih.

Tơ̆ hop akŏm, lơ nơ̆r pơma akhan, athei vei kơjăp tơdrong iŏk yoa phŏng, pơgang păng jăh pơjing anih set hơlen plei sầu riêng tơ̆ dôm tơring pơtăm tơm. Dôm bơngai tang măt oei athei hơmet pơ ‘lơ̆ng tơdrong hơgăt găh kơsô̆ tơring pơtăm, anih tăh tơmam lơ̆m tơpu; hơtŏk tơdrong tơchĕng hơlen, pơtho tơƀôh kơmăy kơmŏk, tơplih ‘nao kơmăy lơ̆m tơdrong jang xa, ‘măn răk tơmam vă hơtŏk tơdrong ‘lơ̆ng, kơjă tĕch păng kơsư̆k pơjei ăn tơmam.