‘Nhŏng Phạm Đức Dậu oei tơ̆ phường Đoàn Kết jĭ bơngai jang hơdrol hơnhăk Đào Nhật Tân đơ̆ng pơlei tơm Hà Nội mơ̆t lơ̆m Buồn Hồ, Dak Lak pơtăm đơ̆ng vă jê̆ 10 sơnăm hơdrol. Sơnăm ‘nâu, ŭnh hnam sư đei 800 tơnơm đào, tơchĕng hơdrol tĕch đơ̆ng 400 - 600 rơbâu hlak jên 1 tơ nơm. Kiơ̆ kơ ‘nhŏng Dậu, pơtăm đào ưh kơ hơnat, mă lei kăl kơ tơdrong mă hơlen. Vă ‘long lĕch ƀlep năr Têt ‘noh athei răp hơmet pơ ‘lơ̆ng, pơvei hngôm sơđơ̆ng, săy phŏng ƀlep trong păng tang găn hơdrông pơrang jĭ phă ăn hla ‘long: “Teh gôh Tây Nguyên ‘noh rơmuăn, ưh kơ hơrăng kơna lăp hăm pơtăm đào bắc, ‘long ling lang bluh jing ‘lơ̆ng. Lăp kăl kơ bơ̆n athei vei pơm liơ vă săy phŏng, pruih pơgang vei lăng ‘long pơtăm, tang găn hơdrông pơrang jĭ ƀlep khei ‘năr ‘noh ‘long lĕch pơkao hơnơ̆ng băl. Tŏ ‘mi kial âu ‘noh pơkao bluh jing ‘lơ̆ng, hơnơ̆ng, bơngai pơtăm pơkao gô đei iŏk yua ‘lơ̆ng ăn Tết tơnŏ hiôk hăm ŭnh hnam.”

Jĭ bơngai pơlei tơ̆ dêh char Hà Tây so păng mơ̆t tơ̆ apŭng Krông Pắk jang sa arih sa đơ̆ng hloh 10 sơnăm hơdrol, ‘nhŏng Nguyễn Văn Tâm tơbăt sơnăm hơyơ kŭm răt đào brŏk pơm ngôi Tết. Đào pơtăm tơ̆ âu ‘lơ̆ng ưh kơ pha kiơ dôm ‘long đào tơring găh tu, hăm pơkao tơlang hơdai, kơmâu ƀrĭu, hơyơ̆l ‘lơ̆ng, mă lei ‘noh kơjă tĕch tôch kơ lăp: “Kơjă đào tơ̆ thị xã Buôn Hồ tôch kơ lăp, re păng tôch kơ ‘lơ̆ng. Pơkao ling lang chôh lơ̆m ƀlep năr Tết vă kon pơlei pơrŏ Tết kơna ĭnh răt tơgŭm. Pơting hăm đào tơ̆ dôm dêh char găh Tu, ‘noh đào tơ̆ âu kŭm tôch kơ ‘lơ̆ng lei lăi băl năi.”

Dang ei, tơ̆ thị xã Buôn Hồ đei 36 ŭnh hnam pơtăm pơkao đào păng hlôi jang hơdai pơjing Hơp tak xăh, hăm akŏm teh xă hloh 17 hek tar. Dôm bơngai jang pơgar sơnăm ‘nâu tơchĕng hơdrol tĕch ăn anih tĕch mơdro dang 18.000 – 20.000 tơnơm nhen: Đào Nhật Tân, Đào Bích, Đào Phai păng Đào Tuyết. Kiơ̆ kơ ƀok Nguyễn Văn Thắng - Kơdră vei lăng Hơp tak xăh mơdro sa păng pơvih pơvăn Pơkao Đoàn Kết, tơmam “ ‘Long pơkao đào Buôn Hồ” dang ei hlôi đei asong OCOP 3 sơ nglŏng păng tŏk bŏk hơdrin tŏk 4  sơnglŏng vă yak truh tĕch tơ̆ teh đak đe: "Hơp tak xăh hlôi bơ̆jang tơdrong kĭ pơkăp hơvơn dôm nghệ nhân hơgei mơ̆t tơ̆ âu tơgŭm ăn dôm ŭnh hnam jang lơ̆m hơp tak xăh vei lăng ‘lơ̆ng dôm ‘long đào tih ‘lơ̆ng vă tĕch ăn teh đak đe, păng roi tơƀôh lơ̆m anih tĕch mơdro apŭng plĕnh teh. Hơp tak xăh kŭm gô pơjao kơmăy kơmŏk, hơdrĕch ăn kơ kon pơlei tơ̆ dôm dêh char nai păng dêh char Dak Lak, mă đơ̆ng bu đei ‘meh vă adoi gơh tơgŭm hơtŏk iŏk yua ngăl.”

Lơ̆m lêh tơlĕch jang pơtăm ‘long “Ling lang ƀlŏk bơnê kơ Ƀok Hồ" sơnăm 2023 thị xã Buôn Hồ (Dak Lak) hlôi pơtăm 400 tơm đào vă pơm ‘lơ̆ng kơ phô̆ phường. Kiơ̆ đơ̆ng yan âu tơ̆ tơring ăn ƀôh, hơnih ‘nâu đei tơdrong pran găh tŏ ‘mi kial, teh păng tôch kơ lăp hăm ‘long pơkao đào. Ƀôh hơdăh ‘noh jĭ đĭ đei lơ ŭnh hnam tơ̆ lơ̆m thị xã Buôn Hồ pơtăm păng ƀrư̆ ƀrư̆ pơm pơdrŏng gơnang đơ̆ng tech pơkao đào lơ̆m năr Tết, pơyan puih mak vih. Yua thoi noh, tơdrong tơlĕch jang pơtăm vă jê̆ 400 tơm pơkao đào gô jing 1 tơdrong pơih blŭng ‘nao, pơih mĭnh trong năm ‘nao ăn tơdrong jang sa kơ kon pơlei. Buôn Hồ gô đei 1 “ Trong pơkao đào”, 1 hơnih lăng ‘lơ̆ng rŏ pơyan puih mak ƀĕnh tơdrong hơmĕng. Ƀơ̆t doh, kon pơlei gô đei tơdrong hiôk vă pơih să hơgăt teh. ‘Nâu jĭ tơdrong ‘lơ̆ng ăn tơdrong pơjing pơkao đào Buôn Hồ jing tơmam OCOP păng đei hơnăn ‘lơ̆ng hơdrô̆, tơgop tơgŭm thị xã iŏk đei tôch ai 10 tơmam OCOP lơ̆m sơ năm 2025.

Lơ̆m khei ‘năr pă đei đunh, mưh tôm tơdrong ‘lơ̆ng, thị xã Buôn Hồ gô pơgơ̆r “Năr pơkao đào”, yak truh “Lêh pơkao đào Buôn Hồ” vă sơng đei lơ jên tơmơ̆t jang păng hơtŏk tơiung tơmang lăng ăn thị xã tơ̆ hơnăp kơnh. Gĭt kăl hloh, tơdrong hơtŏk tơiung ‘long pơkao đào gô pơm jing tơdrong ‘lơ̆ng hơdrô̆ kơ 1 tơring teh ‘lơ̆ng rŏ, hơgei, ƀĕnh tơdrong ‘mêm.