Đơ̆ng rŏng kơ pơgơ̆r choh hơmet teh, pơtăm tơđăh đơ̆ng khei 12/2023 truh dang ei, năr hơyơ tơ̆ Pơgar sâm Ngọc Linh mă Thủ tướng teh đak asong tơđăh ăn ŭnh hnam dơnuh hin kơ apŭng Tu Mơ Rông, dêh char Kon Tum kŭm đei kon pơlei răp gak, vei lăng. ‘Nhŏng A Phai, plei Tân Ba, xăh Tê Xăng tơbăt, plei sư đei 22 ŭnh hnam dơnuh hin đei apŭng klăih song 1 ŭnh hnam 40 tơnơm sâm Ngọc Linh tơđăh mă Thủ tướng asong ăn. Vă dôm tơnơm sâm kăp gĭt bluh jing ‘lơ̆ng, đĭ đăng dôm ŭnh hnam dơnuh hin đei tơgŭm sâm tơđăh adoi ‘măn tơdrong bơngơ̆t truh, vei lăng pơ ‘lơ̆ng rim tơm sâm:

“Kon pơlei 22 ŭnh hnam tŏk pơm hơdrao pĕng tơpuh kơne, sem. Đang kơ ‘noh iŏk pŭk vă vei sơđơ̆ng ăn sâm. Pơm đang ‘lơ̆ng bơih ‘noh 3 ŭnh hnam jĭ 1 grŭp tŏk tơ ruih đak, đang kơ ‘noh hơlen lăng sâm, vei sơđơ̆ng ăn sâm đơ̆ng kon pơlei.”

‘Nhŏng A Phát, bơngai lơ̆m prăt dôm năr Tết Nguyên đán âu ki ling lang đei măt lơ̆m pơgar vei lăng sâm Ngọc Linh, pơma thoi âu:

“Đei Thủ tướng teh đak asong ăn tơđăh sâm nhôn tôch kơ chhôk hơiă yua kơ nhôn jĭ găh ŭnh hnam dơnuh hin. Đơ̆ng rŏng âu sâm ‘lơ̆ng, đei iŏk yua nhôn dă ƀiơ̆ kơ dơnuh hin thoi âu vă đei klăih đơ̆ng dơnuh hin nhen dôm ŭnh hnam nai.”

Pơm tơdrong hiôk vă 300 ŭnh hnam dơnuh hin tơ̆ 23 pơlei găh 8 xăh lơ̆m apŭng đei teh pơtăm 12.000 tơnơm sâm Ngọc Linh Thủ tướng teh đak asong ăn, khŭl kơdră apŭng Tu Mơ Rông hlôi pơjao ăn 1 xăh tŏ sĕt hloh 0,5 héc ta teh lơ̆m kông Ngọc Linh tơ̆ tơƀôt 6, Tiểu khu 218 găh xăh Măng Ri. Hơgăt teh âu kơ jung hloh 1.500m pơting hăm măt đak dơ sĭ, tơ̆ hơ la yơ̆p bri brăh tôch kơ hiôk ăn tơdrong pơtăm sâm Ngọc Linh. Khŭl kơdră apŭng kŭm hlôi chih răk tơdrong đơ̆ng pơgar 12.000 tơnơm sâm đei Thủ tướng asong, dôm ŭnh hnam dơnuh hin lơ̆m dôm sơnăm truh gô đei tôm teh vă pơm tơđăh pơih să pơgar sâm, hơdai hăm tơgŭm ki thuơ̆t pơtăm vei sơđơ̆ng pơgar sâm bluh jing ‘lơ̆ng, pơm tơdrong jang sa đunh đai ăn kon pơlei.

Ƀok Võ Trung Mạnh, Kơdră Anih vei lăng kon pơlei apŭng Tu Mơ Rông, dêh char Kon Tum tơbăt:

“Thủ tướng asong sâm ăn ŭnh hnam dơnuh hin pơm tơdrong jang sa đunh đai păng klăih đơ̆ng dơnuh hin kơjăp ăn kon pơlei. Kiơ̆ lơ̆m tơdrong tơgŭm đơ̆ng Thủ tướng apŭng hlôi pơ jao ăn Anih vei lăng choh jang sa, Anih pơvih pơvăn choh jang sa pơtho găh ki thuơ̆t ăn kon pơlei vă kon pơlei jang akŏm, vei sơđơ̆ng ki thuơ̆t pơtăm iŏk đei jơnei ‘lơ̆ng hloh. Pơjing trong jang vei lăng sâm kiơ̆ đơ̆ng noh klăih song jang hơdăh ăn hăm khŭl kơdră dôm xăh pơlơh băl vei lăng pơgar sâm. Kiơ̆ đơ̆ng jên jang, tơmam jang đơ̆ng Tơdrong jang tơm teh đak tơlĕch dôm kon jên tơgŭm vă pơjing dur var vei lăng”.