Mă kăl, đơ̆ng rŏng 6 sơnăm atŏk tơ iung rim tơmam drăm OCOP truh dang ei ‘măng rơih hơlen au, Dak Lăk ‘nao đei 2 tơmam drăm blŭng a đei tôm rơvơn ăn rơih hơlen drơ̆ng nơ̆r OCOP 5 hơnglŏng (lơ̆m teh đak), ‘noh Cà phê Chồn Kiên Cường kơ Kŏng ty Kiên Cường, pơlei tơm Buôn Ma Thuột păng găr Mắc ca Đắk Lắk ‘lơ̆ng kơ Kŏng ty Damaca Nguyên Phương, apŭng Krông Năng. ‘Nau jĭ tơmam drăm mă blŭng kơ dêh char Dak Lăk vang pơtruh ăn vă rơih hơlen jing tơmam drăm OCOP teh đak sơnăm au, tơƀôh hơdăh tơdrong hơdrin đơ̆ng dêh char lơ̆m pơm hơtŏk tơdrong kăp gĭt păng tơƀôh tơbăt tơmam drăm OCOP ăn lơ hơnih tĕch răt lơ̆m teh đak păng tơ̆ teh đak đe.

Hloh 6 sơnăm jang kiơ̆ Tơdrong jang mĭnh tơring mĭnh tơmam drăm tơklep kơjăp hăm tơ iung pơjing tơring tơrang ‘nao, truh dang ei, dêh char Dak Lăk đei 237 tơmam drăm OCOP. Sơnăm 2024, Jơnŭm chĕp pơgơ̆r OCOP dêh char gô hơlen, rơih hơlen 44 tơmam drăm ‘lơ̆ng 4 hơnglŏng kơ yuơ tơring pơtruh ăn.