-Apĭnh kơ kuh kơ ih ‘nhŏng Alưnh, chơt hơiă đei tơƀơ̆p, pơma dơnuh hăm ih ƀlep ƀơ̆t blŭng sơnăm ‘nao. Ah ‘nhŏng Alưnh ăi, sơnăm 2023 âu ki, jĭ sơnăm ŭnh hnam bơ̆n hiôk chơt, ƀơ̆t đei pơgơ̆r et tŏk hnam ‘nao man đei kơjă truh 1,4 ti. Ih tơroi ăn kơ bôl buăl mơ̆ng brŏ găh tơdrong jang sa lơ̆m ŭnh hnam bơ̆n lăng?

-Anh Alưnh: “Blŭng a tơdrong hơrih iŏk đơ̆ng jur kơdih, iŏk ŭnh om ‘noh đei tơdrong mơmat tat yua ưh kơ băt trong jang sa. Kơplăh sơnăm 2005, ŭnh hnam tôch kơ mơmat tat, jang kiơ kŭm ưh kơ troh ‘lơ̆ng, đơ̆ng rŏng ‘noh gơnang đơ̆ng đei tŏk iŏk jên đơ̆ng anih mong jên tơgŭm tơpôl tơdrong hơrih sa dă ƀiơ̆ kơ mơmat tat bơih. Sơnăm 2010 tơdrong arih sa ŭnh hnam đei păi bơih, pơtơm đei mŭk tơmam đei mong răh...đơ̆ng rŏng ‘noh dang 1,2 sơnăm dơ̆ng ĭnh mong răk, răt dơ̆ng teh, pơih dơ̆ng mir cheh phe vă đei dŏng jên yua ăn ŭnh hnam păng tŏk iŏk đơ̆ng anih mong jên vă tơiung mŭk tơmam. Kŭm hăm ‘noh ĭnh vang hŏk dôm lăm pơtho ki thuơ̆t yua đơ̆ng Khŭl vei lăng kon pơlei jang chŭn mir pơgơ̆r vă băt trong vei lăng cheh phe, pơtăm ƀa đei plei lơ".

-Đei nơ̆r pơma “Đei pơmat ‘mơ̆i mă gơh hlôh vao”, Ŭnh hnam bơ̆n jang tŏk đơ̆ng tôch kơ mơmat tat, mă lei hăm đon hơdrin kiơ̆ đơ̆ng chă hŏk pơhrăm jang kiơ̆ khoa hŏk ki thuơ̆t mă gơh iŏk yua kơjăp. Apĭnh ih tơroi hơdăh găh tơdrong jang sa đơ̆ng ih lăng?

-Anh Alưnh: “Lơ̆m tơdrong jang sa, mă mĭnh ‘noh kăl kơ đei jên, yua kơ tơdăh ưh kơ đei jên bơ̆n ‘meh vă ră mĕ lei tôch kơ mơmat, mă 2 ‘noh ki thuơ̆t, mă đơ̆ng bơ̆n đei jên ră mă lei tơdăh ưh kơơ băt đei ki thuơ̆t ‘noh kŭm ưh kơ plei lơ, athei băt trong săy phŏng, pruih pơgang ƀlep khei ‘năr,săy phŏng thoi yơ, pruih thoi yơ vă rong ‘long bluh jing ‘lơ̆ng, đei plei lơ.”

- Đơ̆ng mĭnh ŭnh hnam mơmat tat jang tŏk jing pơdrŏng đei ƀôh, ih tơroi găh trong vei mong jên lơ̆m ŭnh hnam bơ̆n thoi yơ?

-Anh Alưnh: “Lơ̆m tơdrong arih sa rim năr vă kơ bơ̆n roi đunh roi net net ƀiơ̆,gơh pơvei tơmam mong, ‘mơ ‘met ‘noh jĭ tơdrong gĭt kăl, tơdăh bơ̆nđei dôm yơ sa dôm noh lei tơdrong hơrih sa bơ̆n vă pơ pôi ưh kơ vơ̆ tŏk lơ̆m hnam dơnŏ, kăl kơ pơvei ‘mơ ‘met lơ̆m hơrih sa vă tơgŭm ăn lơ̆m hnam dơnŏ roi đunh roi kơjăp, roi đunh roi vơ̆ lơ̆m tơdrong hơrih sa.”

 -Tơpă mơ̆n, lei hơdai hăm jang hơdai lơ̆m hnam dơnŏ ih oei bơngơ̆t ăn tơdrong hŏk pơhrăm kơ kon hơ ‘lơ̆p truh um truh tôch. Yua kơ kiơ mă ih lăng kăl tơdrong hŏk pơhrăm kơ đe kon?

-Anh Alưnh: “Kon hơ ‘lơ̆p dang ei oei đei hŏk, mĭnh 1 ‘nu ‘noh hŏk đăi hŏk sơnăm mă 4, oei 2 ‘nu dơ̆ng ‘noh 1 ‘nu hŏk lăm 11, 1 ‘nu hŏk lăm 10. Mă tơpă ĭnh ‘noh bơngai ưh kơ hlôh vao lơ, kơ na lăp pơtho kơ kon hơ ‘lơ̆p hơdrin hŏk đĕch, hŏk vă gơh hlôh vao, đơ̆ng rŏng kơnh truh kiơ̆ tom ‘nhŏng oh, bôl buăl vă jing bơngai, vă tơdrong arih sa ‘lơ̆ng hơiă.”

- Sơnăm 2023 âu ki jĭ sơnăm chhôk ‘nă hăm kon pơlei kŭm nhen  hnam dơnŏ bơ̆n mưh cheh phe păng 1,2 tơmam đơ̆ng choh jang sa đei kơjă tŏk. Bĭ Têt ‘nâu, hnam bơ̆n pơgơ̆r thoi yơ?

-Anh Alưnh: “Hlôi mĭnh sơnăm bơ̆n bơ̆ jang gleh glăn, ƀơ̆t têt âu krao ‘nhŏng oh ngôi hơdai, pơtho băl dôm tơdrong hơiă, tơdrong ‘lơ̆ng, pơkă kơ kon hơ ‘lơ̆p hơdrin hŏk, jang kiơ athei mă hơdrin, bôl buăl jê̆ hơtăih kŭm thoi noh mơ̆n. Oei kơdih kâu ĭnh, ơơ̆ng rŏng kơ ngôi hơdai kŭm ‘nhŏng bôl buăl 1,2 năr ‘noh gô jang cŭn mir, jang ƀa, năm vei lăng pơgar ‘long , tơruih đak ăn ‘long pơtăm, bơ̆n ưh kơ đei vei lăng ‘lơ̆ng ‘noh đơ̆ng rŏng âu gô ưh kơ đei iŏk yua; athei vei lăng ƀơ̆t kơplăh ‘năr tŏ ‘long tôch kơ kăl kơ đak thoi âu, athei tơruih, săy phŏng tôm, thoi noh pơyan đơ̆ng rŏng gô đei ‘lơ̆ng ƀiơ̆, tơdrong hơrih sa ŭnh hnam sơđơ̆ng, hiôk ƀiơ̆.”

-Mĭnh sơnăm ‘nao truh bơih, ih hăm đei đon tơchĕng kiơ vă hơnơ̆ng jang tŏk mŭk drăm lơ̆m ŭnh hnam ưh?

-Anh Alưnh: “Hnam dơnŏ ưh kơ đei mir plơ̆ng vă jang thim dơ̆ng, mă lei lơ̆m mir bơ̆n đei đăi dôm yơ vă pơvei tuh thim phŏng, tơmơ̆t dơ̆ng jên jang vă kơ sư roi ‘lơ̆ng, vă plei roi lơ, tơgŭm hnam dơnŏ đei tôm măh ƀiơ̆. ‘Ngoăih kơ jang chŭn mir, hnam dơnŏ hơnŏng rong dơ̆ng nhŭng yŏng, hơdrol kơ âu gơnang đơ̆ng rong nhŭng kŭm tơgŭm hnam dơnŏ đei jên răt phŏng xăy ăn kơ cheh phe, ƀa, dă ƀiơ̆ kơ tŏk iŏk tơ̆ ‘ngoăih. Tơdăh bơ̆n răp gô tơmam đơ̆ng mir cheh phe, ƀa ‘noh athei gô kơtĕch kơ sơnăm ‘mơ̆i mă iŏk đei pă jor gô kơmăh. Kơna ba athei rong nhŭng dơ̆ng vă tơoing lơ̆m tơdrong hơrih sa. Sơnăm ‘nao âu ĭnh ‘meh vă rong pơtho kon hơ ‘lơ̆p hŏk truh trong, ‘meh đe kon hơdrin hŏk mă ‘lơ̆ng, yua kơ dang ei đe kon oei tŏk bŏk hŏk, 1 ‘nu hŏk  Đại học Quy Nhơn, oei 2 ‘nu tŏk bŏk hŏk lăm 10, lăm 11, vă kơ đe kon pơvei ăn kơ dih kâu đe sư, đei yua ăn kơ pơlei pơla.”

- Lei ah, bơnê kơ ih! Hmach thơ thâu ăn ih mơ̆t lơ̆m sơnăm ‘nao pran jăng grăng hơkâu, jang sa đei, arih sa hiôk jơnap hloh dơ̆ng!