Hăm cham char bri brăh păng anih dơ̆ng ‘lơ̆ng dang ei, Gia Lai đĭ pơjing đei păng atŏk tơiung lơ pơgar xă vă choh jang xa akŏm mĭnh ƀôh. Lơ tơmam đơ̆ng choh jang xa tơm đei kơjă kăp gĭt hlôi tĕch tơ̆ truh 40 tĕh đak. Hrei ‘nâu dêh char đei 3 Tơring jang kơmăy, păng chĕng hơmet 23 tơring vă jang kơmăy kơmŏk. Tơmam đơ̆ng choh jang xa tơ̆ dêh char đei tôch lơ, sơđơ̆ng ‘lơ̆ng nhen: Cheh phe, cao su, kơtao, ƀum, hla che, plei ‘long... pơih trong vă atŏk tơiung kơmăy pơm tơmam. Lơ̆m dêh char đei hlŏh 8.000 anih jang kơmăy pơm tơmam…

Tơdrong ‘lơ̆ng tih mă lei kiơ̆ ƀok Phạm Văn Binh, Kơdră Anih vei lăng jang kơmăy, tĕch mơdro Gia Lai, dôm tơdrong pơvih pơvăn logistics tơ̆ dêh char tam mă tŏk pran yoa oei đei lơ tơdrong găn trong: “Tơ̆ tơdrong jang yơ kŭm pơmat tat, chĕng hơmet, tơprŏh trong jang ‘nŏh tam mă ‘lơ̆ng, mă 2 dơ̆ng mă đơ̆ng đei trong jang hơdoi ‘lơ̆ng ră mă lei anih jang vă pơyoa ăn logistics oei tam gan ‘lơ̆ng. Khul bơngai jang oei tŏ sĕt, jô̆ hloi đon hlôh vao tam mă tôm găh logistics ‘nŏh jĭ dôm tơdrong tam mă ‘lơ̆ng.”

Tơ̆ Hop akŏm, bơngai dơ̆ng tang ăn dôm anih jang găh Anih tơm vei lăng jang kơmăy, tĕch mơdro, khul grŭp jang hơdoi păng dôm bơngai tơmât jên jang, anih tĕch mơdro pơma tơlĕch lơ nơ̆r vă atŏk tơiung tơdrong pơvih pơvăn logistics tơ̆ Gia Lai. Dôm bơngai tang măt akhan, athei hơtŏk hlŏh dơ̆ng đon hlôh vao găh logistics, tơdrong pơvih pơvăn logistics hăm tơdrong atŏk tơiung mŭk drăm tơpôl, tơƀôh trong jang xa, tĕch mơdro hơdai hăm atŏk tơiung anih jang logistics păng jang hơdoi đơ̆ng dôm anih tĕch mơdro lơ̆m păng ‘ngoăih kơ dêh char.

Ƀok Lê Quang Trung, Phŏ Kơdră vei lăng Khul jang pơvih pơvăn Logistics Việt Nam đei nơ̆r pơma: “Hăm Gia Lai dăh mă Tây Nguyên tĕh, tơmam bri brăh oei lơ, dôm anih jang athei tơgĕch iŏk tơdrong ‘lơ̆ng đơ̆ng tơring groi kông, tơgĕch iŏk tơdrong tơgŭm đơ̆ng tĕh đak lơ̆m tơdrong tơgŭm vă atŏk tơiung dôm anih jang xa kơ kon pơlei kon kông. Tơdrong jang hơdoi kiơ̆ trong tơgŭm păng bơ̆ jang tơ̆ yăn âu ‘nŏh jĭ ‘long tưk tôch gĭt kăl vă năm truh tơdrong jang hơdai kơjăp ‘lơ̆ng. Kăl đei trong jang hơdoi ‘lơ̆ng đơ̆ng dôm anih jang Logistics mưh pơtruh tơmam, jang hơdoi hăm dôm anih pơm tơlĕch tơmam đơ̆ng rŏng kơ chơ chuĕn păng man anih mong”

Kiơ̆ ƀok Trần Thanh Hải – Phŏ Kơdră Anih vei lăng tơdrong tĕch tơmam tơ̆ tĕh đak đe, găh Anih tơm vei lăng jang kơmăy, tĕch mơdro, ‘mĕh tưk tơiung dôm tơdrong pran ‘lơ̆ng, đei yoa, Gia Lai athei đei trong tơgŭm mă ‘lơ̆ng ‘mơ̆i, gơ̆h jang kiơ̆ tơ̆ yăn âu vă sơng iŏk lơ jên jang đơ̆ng tơpôl, grŭp jang, anih tĕch mơdro đei bưng ai, jang xa gơ̆h hơgei truh tơmât jên jang, atŏk tơiung anih jang logistics:

“Sơng dôm anih tĕch mơdro pơih anih jang tơ̆ Gia Lai gô tơgŭm pơih đei trong tĕch tơmam. Vă krao hơvơn anih jang truh dêh char athei đei trong jang mă hơdăh krao hơpơi đe truh păng đei trong tơgŭm ‘lơ̆ng hai. Pơtih gia gơ̆h pơgơ̆r lơ khukl roi tơbăt, tơlĕch trong tĕch tơmam đơ̆ng dêh char tơ̆ dôm tơring tih kơ Việt Nam kŭm nhen chă trong jang hơdoi hăm dôm dêh char tơ̆ tĕh đak Lào, Campuchia jĭ tơdrong tôch gĭt kăl vă kŭm hăm băl vang iŏk yoa dôm tơdrong ‘lơ̆ng”.

Vă hơnơ̆ng bơ̆ jang, iŏk yoa dôm tơdrong pran ‘lơ̆ng, tưk tơiung anih jang logistics jang tŏk hrĕnh păng kơjăp, vang tơgop ‘lơ̆ng, đei yoa ƀiơ̆ ăn tơdrong jang tŏk atŭm kơ dêh char, hăm hơnăp jang đơ̆ng anih vei lăng tĕh đak găh pơvih pơvăn logistics, găh Anih tơm vei lăng jang kơmăy, tĕch mơdro, ƀok Trần Thanh Hải đei nơ̆r athei, Khul kơdră pơgơ̆r dêh char Gia Lai hơnơ̆ng tơchĕng hơlen, hlôh vao kơjăp dôm đon tơchĕng, trong jang lơ̆m Tơdrong tơchơ̆t 163 đơ̆ng Khul kơdră tĕh đak găh atŏk tơiung tơdrong jang logistics Việt Nam păng dôm tơdrong tơchơ̆t, tơdrong tơgŭm, trong jang atŏk tơiung đơ̆ng Đảng, tĕh đak, khul kơdră tĕh đak đei ƀơm truh tơ̆ tơring Tây Nguyên vă pơih trong păng pơgơ̆r bơ̆ jang đei yoa dôm tơdrong jang, trong jang đei tơlĕch găh atŏk tơiung tơdrong pơvih pơvăn logistics pơm lăp hăm tơdrong jang tơ̆ yăn âu păng iŏk yoa đei dôm tơdrong pran ‘lơ̆ng đơ̆ng tơring.