Hơdrao rong ka kơ ƀok Đinh Văn Thắng pơm hlom tŏk bŏk hơnih đak hlăng hlơ hlơr tơ̆ lơ̆m dơnâu mong đak hnam kơmăy ŭnh điên Đắk R’Tih tơ̆ jih pơlei tơm Gia Nghĩa, dêh char Dak Nông. Ƀok tơbăt, đak dơnâu hnam kơmăy ŭnh điên tôch kơ rơgoh, lăp vă rong lơ kơ loăi ka nhen: chép, trắm, diêu hồng, cá koi… Jô̆ păh lăp 1 sơnăm, ŭnh hnam ƀok iŏk đei sơđơ̆ng 500 -700 triệu hlak jên đơ̆ng 2 hơdrao ka:

Cham char ‘nâu tôch kơ rơgoh yua tơ̆ âu đak hnam kơmăy ŭnh điên ro ‘lơ̆ng ưh kơ đei ‘mê̆ ‘mach kiơ hloi. Rong ka ‘noh lăp hiong jơ năr blŭng, ‘noh ba athei hơmet pơ ‘lơ̆ng blŭng a, hloh jơ năr dang 10 - 15 năr, mưh ka joăt hăm cham char bơ̆ih ‘noh sư gô ưh kơ đei lôch.

Hơtăih kơ Gia Nghĩa dang 100 km, tơ̆ đak krong Krông Nô, đơ̆ng lơ sơnăm kơ âu, ŭnh hnam ƀok Bùi Văn Xô, oei tơ̆ xăh Buôn Choáh, apŭng Krông Nô rong 15 hơdrao ka diêu hồng. Ƀok tơroi, rim sơnăm ŭnh hnam iŏk đei dang 120 tấn ka, đơ̆ng rŏng kơ jô̆ đĭ jên jang oei đei lơi vă jê̆ 400 triệu hlak jên. Tơring âu đak să, đak ro lăp ‘lơ̆ng vă hơtŏk tơiung tơdrong rong ka, mă đơ̆ng oei đei dôm tơdrong ưh kơ pŭn ai.

Mơmat tat ‘noh pơyan ‘mi đak ro lơ ‘noh ka ƀônh kơ lôch; mă 2 ‘noh pơyan tŏ ‘noh đak jur tŏ sĕt ka kŭm hoach. Rong ka ‘noh dang ei yŏng tôch kơ khăi.

Dêh char Dak Nông đei hơgăt đak să kĕ rong ka dang 17.500 hek tar, hăm lơ dâu mong đak hnam kơmăy ŭnh điên tih nhen Buôn Tua Srah, Buôn Kuốp, Đồng Nai 3, Đồng Nai 4, Đăk R’tih, kŭm hăm hloh 250 dơnâu mong đak păng 1,2 đak krong đak glung tih. Truh dang ei, hơgăt rong ka tơ̆ dêh char đei vă jê̆ 2000 hek tar, hăm dang 1.200 hơdrao, ka hloh 7.300 tấn rim sơnăm. Kiơ̆ kơ ƀok Ngô Xuân Đông, Phŏ Kơdră Anih vei lăng găh choh jang sa păng hơtŏk tơiung tơring tơrang dêh char Dak Nông, dang ei oei lơ tơdrong trŏ luơ̆t vă rong ka lơ̆m dôm dơnâu mong đak păng tam mă đei dôm hơnih pơtruh yŏng ‘lơ̆ng. Anih vei lăng găh choh jang sa tŏk bŏk tơchă trong hơmet pơ ‘lơ̆ng mơmat tat vă pơtrŭt rong ka kiơ̆ trong đei yua, kơjăp, vei lăng cham char bri brăh, vei lăng dôm kơ loăi ka đei kơjă kăp gĭt.

Mă mônh ‘noh jĭ dăr hơlen lăng dơ̆ng tơdrong trŏ luơ̆t păng tơchĕng hơlen dôm trong jang tơgŭm vă kơ pơm tơdrong hiôk pơtrŭt rong ka tơ̆ dôm dơnâu mong đak, đak krông lơ̆m Dak Nông nhen tơ̆ dôm dơnâu mong đak hnam kơmăy ŭnh điên dăh mă tơ̆ đak krong Krông Nô. Mă 2 ‘noh jĭ hơtŏk loi dơ̆ng pơhrăm găh ki thuơ̆t păng pơih să dôm tơdrong jang rong ka đei iŏk yua vă pơtrŭt hơtŏk tơiung tơdrong jang tơmam ‘nâu.

Hăm lơ dơnâu mong đak tih, cham char đak hlăng ‘lơ̆ng, Dak Nông oei lơ hơnih đak vă hơtŏk tơiung rong ka. Dêh char tơlĕch tơdrong hơgăt hơdrin truh sơnăm 2030, akŏp hơnih đak rong ka iŏk đei dang 4.500 hek tar, tơmam hloh 20.000 tấn./.