- Ơ ƀok Vũ Đức Côn, Kơ iĕng Kơdră chĕp pơgơ̆r Hơnih vei lăng Choh jang sa păng Atŏk tơ iung tơring tơrang, Kơdră chĕp pơgơ̆r Khul jang Sâu riêng Dak Lăk, truh dang ei Đak Lăk hlôi pơtôch pơyan sâu riêng 2023, ih tơroi năng găh trong iŏk đei jơnei kơ pơyan au ‘noh yă kiơ?

-Ƀok Vũ Đức Côn: Mă kăl hloh hơgăt teh ‘long sâu riêng hlôi đei plei să truh 3.000ha. Kơjă jei tŏk măt tôch kơtang păng plei jei đei truh 200.000 tân. Mă ƀar kon pơlei pơtăm sâu riêng đei plei iŏk yua tôch kơ lơ, lơ ưh kơ măh ê tơpă mơ̆n.

-Nhen ih hlôi tơroi, sơnăm au kon pơlei iŏk yua tôch kơ lơ ưh kơ măh ê, mă lei hơdrơ̆ch dơ̆ng, rim hơnih mơdro ‘noh tă tơƀơ̆p tơnap tap. Tơdrong mă au ‘nŏh kơ yuơ kă kiơ hŏ ƀok?

-Ƀok Vũ Đức Côn: Rŏ năng kơ yuơ kơjă tŏk măt kơna tơdrong mă blŭng pơm ăn tơdrong chă tơgar dih băl răt, tĕch tôch kơtang ... Đơ̆ng noh vă răt iŏk đei lơ kơna rim hơnih mơdro hlôi hơtŏk kơjă măt dêh hnang. Mă ƀar ‘noh lơ bơngai vang druh kiơ̆ tĕch mơdro tơ̆ teh đak đe mă lei tim mă băt tôm tơdrong mơdro sa au to.

- Mưh lei, lơ̆m tơdrong mơ̆t lĕch lơ̆m tơdrong rơvơn păng tơnap tap lơ lau, ‘noh lơ̆m sơnăm blŭng bơ̆ jang, Khul jang sâu riêng Dak Lăk hlôi iung jang lơ liơ găh tơmam drăm au?

- Ƀok Vũ Đức Côn: Khul ‘nao pơjing đơ̆ng khei 3 sơnăm 2023 truh dang ei, kơna lăp đơ̆ng rŏng ‘noh hlôi iung jang hloi mĭnh ƀar tơdrong păng đei ƀơm hơ iă truh tơmam drăm au. Nhôn jei hlôi pơgơ̆r hop akŏm tơƀơ̆p pơma dơnuh ƀar păh hơnih mơdro sa răt iŏk pơm tơlĕch tơmam drăm hăm kon pơlei pơtăm; ‘ngoăih kơ ‘noh păh hơnih bơ̆ jang teh đak, rim hơnih bơ̆ jang ƀơm truh. Nhôn jei tơbăt tôch kơ lơ tơdrong kơtơ̆ng ang găh tơmam drăm, tơlĕch đei trong vă iung jang, tơdrong rơvơn, tơdrong tơnap tap hăm tơmam drăm sâu riêng kơ Dak Lăk.

- Ih hăm đei tơdra yă kiơ găh pơyan sâu riêng Dak Lăk sơnăm 2024? Mĭnh ƀar hơnih mơdro sa akhan, rŏ năng pă đunh bơih, plei sâu riêng gô iŏk đei truh pơđăm hrĕng tân păng lăp tĕch răt lơ̆m khei năr hloh 2 khei, mưh lei Dak Lăk gô tơlĕch jang lơ liơ hŏ ƀok?

- Ƀok Vũ Đức Côn: Rŏ năng Dak Lăk ‘noh jĭ dêh char atŏk tơ iung kơtang hloh lơ̆m rim dêh char găh tơmam drăm au. Mă lei tơdrong tŏk lơ kơ Dak Lăk jei tim mă đei ƀơm kơtang truh tơdrong tŏk lơ kơ lơ̆m teh đak pơma hơdrô̆ păng rim teh đak đei pơtăm tĕch mơdro sâu riêng pơma hơtŭm. Păng lơ lau jei đei ƀơm truh tơdrong au to mơ̆n mă lei kiơ̆ kơ ĭnh jei hoei pơm kơnê̆ kơtang kơ yuơ păh Trung Quốc ‘meh vă chă răt tôch kơ lơ. ‘Ngoăih kơ ‘noh, bơ̆n jei lăng truh chă tĕch mơdro tơ̆ mĭnh ƀar teh đak hơnai hai.

- Găh tơdrong jang tĕch mơdro tơmam drăm au, mă kăl găh trong jang logistics kơ Dak Lăk, hăm rŏ gô trŏ lăp hăm dôm tơdrong đei plei roi lơ dăh mă ưh?

- Ƀok Vũ Đức Côn: Tơpă mơ̆n, ‘nau jĭ mĭnh tơdrong tơtăm hloh. Sâu riêng kơ Dak Lăk ‘nao hơtŏk tơ iung pơđăm tơdrau sơnăm kơ au đĕch. Rim tơdrong tơgoăt jang hơdoi ƀar păh bơngai pơtăm dih băl jei tim mă kơjăp păng ƀar păh bơngai pơtăm hăm dôm hơnih mơdro sa răt iŏk jei tim mă kơjăp. Tơdrong hơnai dơ̆ng ‘nŏh rim hơnih pơm tơlĕch tơmam drăm kơ bơ̆n tim mă atŏk tơ iung. Đunh kơ au 2 sơnăm ‘noh dêh char hlôi ƀôh tơmam drăm sâu riêng ‘noh jĭ tơmam drăm kăl hloh hăm dêh char, Hơnih Đảng, Hơnih vei lăng kon pơlei dêh char hlôi pơrô̆ athei Hơnih vei lăng Choh jang sa păng Atŏk tơ iung tơring tơrang atŏk tơ iung mĭnh tơdrong vă jang atŏk tơ iung kăl kơ kơ Tơdrong jang au ‘noh mă blŭng kăl hơlen mă brĕ pơđĭ trong choh jang sa đơ̆ng hơdrĕch dơđăh truh tơdrong tơgoăt jang hơdoi păng mă pêng ‘noh hơtŏk kơtang pơm tơlĕch tĕch mơdro tơ̆ teh đak đe păng mă puăn dơ̆ng ‘noh hơtŏk hơnăp jang kơ Khul păng hơnih bơ̆ jang vei lăng choh jang sa hăm trong jang tơdra hơdrol, đơ̆ng rŏng ‘noh athei rim hơnih bơ̆ jang pơjing tơdrong pơkăp ‘lơ̆ng vă vei lăng năng tông kơjăp hloh dơ̆ng.

- Ĭ ah, bơnê kơ ih ƀok hơ!