Lơ̆m dêh char Dak Lak dang ei đei dang 22.500 hek tar sầu riêng, lơ̆m noh vă jê̆ 11.000 hek tar tŏk bŏk ăn phĕ tĕch. Sầu riêng đei pơtăm găh lơ tơ̆ dôm apŭng Krông Pắk, Krông Năng, Krông Búk, Ea H’leo, Cư M’gar, Cư Kuin păng pơlei tơm Buôn Ma Thuột.

Ƀok Vũ Đức Côn, phŏ Kơdră Anih vei lăng găh choh jang sa păng hơtŏk tơiung tơring tơrang dêh char Dak Lak - Kơdră Khŭl jang Sầu Riêng dêh char Dak Lak hơlen lăng, sơnăm ‘nâu sầu riêng kơ dêh char đei plei lơ, iŏk yua lơ ƀơ̆t iŏk đei kơ sô̆ 18 – 20 tấn plei 1 hek tar. Akŏp kơ sô̆ tơmam sầu riêng sơnăm 2023 âu iŏk đei hloh 214.000 tấn, yak hloh kơ sô̆ tơdra hơdrol ‘noh 195.000 tấn ƀơ̆t blŭng pơyan. Hăm kơjă tĕch đơ̆ng 55.000 – 75.000 hlak jên 1 kĭ ( mơ̆ng kiơ̆ plei ‘lơ̆ng), iŏk yua đơ̆ng sầu riêng đei kơ sô̆ tôch kơ lơ vă jê̆ 15.000 ti hlak jên. 1 hek tar jô̆ đĭ jên jang bơngai pơtăm đei yua đơ̆ng 800 truh hloh 1 ti hlak jên.