Bơ̆jang kiơ̆ pơtho đơ̆ng khŭl kơdră păng anih vei lăng choh jang apŭng Kon Plông lơ̆m dôm năr ngiĕt jur, đei tŭk dom, ‘mi tơ ngiĕt, 145 ŭnh hnam kon pơlei Xơ Đăng tơ̆ plei Kon Vơng Kia, thị trấn Măng Đen hlôi bơ̆jang kiơ̆ lơ trong jang vă vei lăng kơpô rơmo. Kŭm hăm tơdrong pơtôch tơdrong hơchăng kư̆ kă kơpô, rơmo lơ̆m bri dôm ŭnh hnam athei băl pơm 35 tŏ hơdrong rong chĭt kơpô rơmo akŏm vă ƀônh kơ vei lăng.

‘Nhŏng A Ka Riắc mĭnh ‘nu kon pơlei lơ̆m pơlei, tơbăt rim năr dôm ŭnh hnam kon pơlei klăih song băl jang vei sơđơ̆ng tơdrong tang găn pơngot, tơngiĕt ăn kơpô tơmo:

“Năr hơyơ ŭnh hnam hơyơ năm vei ŭnh hnam ‘noh năm yuă ‘nhĕt tơ̆ mir ăn kơ pô rơmo sa. Jô̆ hloi ĭch rơmo kŭm thoi noh năr hơyơ ŭnh hnam năm vei hơchăng kơpô đơ̆ng rŏng ‘noh hơmet rơgoh ĭch lơ̆m hơdrong, lai yơ hơdrong rong kŭm rơgoh ‘yâu. Pĕng hơdrong, soh hơnong, hơkam ƀa vă vei tơnŏ ăn kơpô rơmo ƀĭch tep”.

Jĭ tơring hơnơ̆ng pŭ ƀơm ưh kơ ‘lơ̆ng kơtang đơ̆ng ‘năr tơngiĕt lơ̆m pơyan yă Rak, dôm sơnăm tơjê̆ âu apŭng Kon Plông, dêh char Kon Tum hơnơ̆ng tŭn pran tơdrong tơroi tơbăt, krao hơvơn kon pơlei kon kông bơngơ̆t truh tơdrong tang găn pơngot, tơngiĕt ăn kơpô rơmo. Gơnang đơ̆ng găn đei tơdrong hơchăng kư̆ kă kơpô rơmo lơ̆m bri, lơ̆m apŭng ưh pă đei kơpô, rơmo lôch lơ lơ̆m dôm năr tơngiĕt găng, kơpô, rơmo kơ apŭng tŏk hrĕnh hăm akŏp dang ei đei vă jê̆ 24.000 tŏ.

Ƀok Võ Đình Tân, Phŏ Kơdră Anih vei lăng choh jang sa păng hơtŏkt ơiung tơring tơrang apŭng Kon Plông, tơbăt lăp hơdrol kơ pơyan yă Rak sơnăm ‘nâu anih jang hlôi asong 1.000 hla ar pơtho kon pơlei tang găn pơngot, tơngiĕt păng tang găn jĭ ăn kơpô rơmo:

“Pơyan yă Rak truh, kial tơngiĕt ‘nohkon pơlei kŭm chă pơm kơdih pĕng hơmet kơjăp hơdrong rong. Găh tơmam hiĕm kon pơlei kŭm băt iŏk yua hơnong ƀa đơ̆ng rŏng yuă. ‘Ngoăih kơ ‘noh oei băt pơtăm ‘nhĕt, đang kơ ‘noh pơtăm tơm prit ăn kơpô rơmo sa thim. Mưh ‘năr tơngiĕt chĭt kơpô rơmo lơ̆m hơdrong. Đei lơ kon pơlei hrei ‘nâu băt rong chông păng tơ̆ gơmăng puh kơpô rơmo brŏk tơ̆ hơdrong chĭt, hơnơ̆ng jang tơdrong jang pơm rơgoh hơdrong rong, pruih pơgang pơlôch pơrang hơnơ̆ng”.