Tơmam drăm plei măk ka tĕch mơdro kơtă blŭng a năm tơ̆ teh đak Hàn Quốc đei 10 tân đei pơtăm tơ̆ dêh char Dak Lăk. Tơmam drăm au hlôi yak hloh kơ trong jang lăng hơlen đơ̆ng hơnih bơ̆ jang găh dăr lăng sơdrông pơrăm, rơgoh ‘lơ̆ng tơmam drăm, trong tăh ‘nŭng păng tơbăt hơnih pơtăm.

Tơchĕng hơlau, dôm tơmam drăm au gô tech mơdro tơ̆ rim hơnih siêu thĭ tih tơ̆ teh đak Hàn Quốc. Iung pơma tơ̆ pơm lêh, ƀok Huỳnh Ngọc Dương, Kơ iĕng Kơdră chĕp pơgơ̆r Hơnih vei lăng Mơdro sa dêh char Dak Lăk tơbăt: tơdrong plei măk ka đei tĕch mơdro kơtă năm tơ̆ teh đak Hàn Quốc ( đơ̆ng rŏng tĕch tơ̆ Nhật Bản) mĭnh ‘măng dơ̆ng pơih trong rơvơn ăn plei ‘long git kăl au kơ Đăk Lăk tĕch mơdro tơ̆ rim teh đak châu Á păng apŭng plĕnh teh.