Thôn Đoàn Kết, xah A Yun Hạ, apŭng Phú Thiện tŏk bŏk jing tơring ƀơm răm kơtang hloh kơyuơ tŏ pơđang. Đei hloh 80 ha ƀa na kro honh păng ưh đei plei. Hăm tơdrong đei ƀôh âu, Anih jang vei lăng kon pơlei xah A Yun Hạ hlôi akŏm khul jang vă tơjră tenh kuăng, atŭm hăm kon pơlei kơchăng thuê kơmăi kôch hơbong thong đak glung Ia Ake păng iŏk yua 21 hơlŭng đak kuai vă ƀôm đak ruih ăn ‘long pơtăm.

Anih jang vei lăng kon pơlei apŭng Phú Thiện adoi pơtruh hla bar ăn Anih jang vei lăng kon pơlei dêh char Gia Lai păng dôm anih jang đei tơrĕk chă tơgŭm jên ăn tơring tơjră hăm tŏ pơđang, atŭm hăm noh pơkăl ning nai kơnh asong man anih ƀôm đak hăm unh hơyuh vă pơchoh đak ăn na ƀa kơ Đoàn Kết.  Ƀok Nguyễn Anh Tuấn, Phŏ Kơdră Anih jang vei lăng kon pơlei apŭng Phú Thiện ăn tơbăt: “Hăm tŏ pơđang lơ̆m tơring noh apŭng hlôi pơgơ̆r rim anih juăt jang hơlen dôm hơgăt teh mă ƀơm tŏ pơđang vă pơtho ăn kon pơlei iŏk yua đak oei đei chă ruih ăn ‘long pơtăm oei ƀơm tŏ pơrăm. Pơgơ̆r dôm tơring hơlen, chih akŏm dôm tơdrong răm kiơ̆ đơ̆ng noh đei trong jang tơgŭm răm kơyuơ đơ̆ng tŏ pơđang pơm đei hăm kon pơlei”

Tŏ pơđang adoi pơm ăn kơ rơbâu unh hnam kon pơlei hơrih rok kiơ̆ tơring sơlam Ia Nan, apŭng Đức Cơ, dêh char Gia Lai ưh đei đak sŏ nhă. Ƀok Nguyễn Thanh Kiên, tơ̆ thôn Đức Hưng, xah Ia Nan ăn tơbăt, kon pơlei athei năm hơtaih vă chơ đak, răt đak đơ̆ng tơring nai vih ‘măn sŏ nhă hăm kơjă kăp kơ jên: “Gah đak sŏ nhă rim năr kơ unh hnam inh pơma hơdrô̆ păng kon pơlei lơ̆m tơring pơma hơtŭm noh tơnap tap, pơyan phang noh lơ̆m 3 khei ưh đei đak sŏ nhă. Đak iŏk đei ‘măn ôp phe, dah mă ôp ‘nhot noh athei ôp hơlơ̆k hăm đak kơƀĭn, minh năr adoi huach truh 3 kơƀĭn đak”

Hăm tơdrong tŏ pơđang tơnap tap thoi âu, ƀok Nguyễn Chúc, Phŏ Kơdră Anih jang gah Pơnơ̆ đak Gia Lai ăn tơbăt dôm trong jang kơ tơring: “Vă tơjră hăm tŏ phang pơđang păng ưh kơ mah đak ruih ăn ‘long pơtăm noh đơ̆ng dêh char truh tơ̆ tơring adoi tơlĕch dôm trong jang vă tơjră hăm tŏ pơđang pơtrŏ hăm tơdrong đei ƀôh vă tơjur ƀiơ̆ răm hăm ‘long pơtăm,  asong đak hơdrol hloh noh hăm ‘long pơtăm đei kơjă kăp gah mŭk drăm vă tơjur ƀiơ̆ răm, pơm kiơ̆ trong tơlĕch ruih đak pơlơh băl, hơ-uh ah tơm vă dŏng dôm ‘long pơtăm vă jê̆ pơyua. Tơgenh iŏk đak ruih đơ̆ng dôm thong hơbong hlôi đei vă pơm jang tơnăp hloh ăn kon pơlei chă ruih ‘long pơtăm”

Ƀok Lưu Trung Nghĩa, Kơdră Anih Choh jang xa păng Hơtŏk tơring tơrang dêh char Gia Lai tơroi, hăm tŏ pơđang lang să lơ tơring thoi âu, anih jang gô pơkăl dôm dơnâu đak hnam kơmăi unh hơyuh pơro đak vă mong đak ruih ăn ‘long pơtăm: “Lơ̆m khei 4 âu noh khei tơm kơ tŏ pơđang, nhôn jang hơtŭm hăm Anih tơm Tơlĕch unh hơyuh 2 păng Kŏng ti Unh hơyuh An Khê Ka Nak pơro đak ro jur gah bah đak krong Pa vă dôm tơring kơchăng đei thong đak ro vă ƀôm đak ruih. Nhôn adoi pơtruh nơ̆r hăm Anih tơm Choh jang xa păng Hơtŏk tơring tơrang, Anih jang vei lăng kon pơlei dêh char kiơ̆ tơdrong đei ƀôh tơ̆ tơring noh asong ming man thong hơbong đak mong đei đak đơ̆ng thong hơbong tơ̆ dôm dơnâu đak tŏk bŏk oei tŏ sĕt. Pơtoi tơdrong âu noh athei asong jên jang vă keh đang man thong hơbong đak vă vei mah đak ruih mong ƀiơ̆ noh pơtơm jang keh tơdrong tơnăp tang găn tŏ pơđang lơ̆m tơring teh kơ dêh char păng pơih să choh jang”