Kơplăh dang ei, truh tơ̆ dôm xăh hơtăih yăih Đạ Sar, Đa Nhim, apŭng Lạc Dương, dêh char Lâm Đồng lăng ƀôh lơ pơgar atiso jing ‘lơ̆ng tơter krang đơ̆ng kon pơlei kon ông pơtăm. Lơ unh hnam tơ̆ âu klăih đơ̆ng tơnuh hin gơnơm đơ̆ng pơtăm ‘long pơm pơgang. Mŏ Liêng Jrang K’Sáu, tơ̆ thôn 6, xăh Đạ Sar, apŭng Lạc Dương tơroi, adrol sơ̆ lăp pơm juăt pơtăm ‘long chĕh phe păng pơtăm ‘nhot đĕch, kơna iŏk yoa ưh đei sơđơ̆ng. Đei tơdrong tơgŭm păng pơtho tơƀôh đơ̆ng khul kơdră tơring, unh hnam mŏ mât jang lơ̆m Grŭp jang atiso păng iŏk hlŏh 3 sao teh vă pơtăm pơlong năng. Đei tơdrong tơgŭm găh hơdrĕch ‘lơ̆ng, phŏng păng ki thuơ̆t pơtăm, đơ̆ng rŏng 4 khei pơtăm, mŏ kăt tĕch đei hlŏh 10 triu hlak jên.

Mŏ Liêng Jrang K’Sáu tơroi: “Trong pơtăm hăm phŏng vi sinh, ich rơmo, ưh đei iŏk phŏng ka vă tuh ăn tơm atiso. ‘Long ‘nâu kăt tĕch hla, vă pơm đak tra nhă păng pơm pơgang kơna ưh kơ đei yoa pơgang sơdrông kiơ. Công ty chih hơnăn pơgang kiơ ‘nŏh athei pơm kiơ̆ mă trŏ”

Khei ‘năr âu ki, lơ kon pơlei bơngai kon kông tơ̆ xăh Đạ Sar, xăh Đa Nhim, apŭng Lạc Dương, dêh char Lâm Đồng klăih đơ̆ng tơnuh hin gơnơm pơtăm atisô, jang hơdai tơpăt hăm anih tĕch mơdro. Mih ma duch nă kŏh phă pơgar cheh phe kră, ưh kơ đei plei vă pơtăm dơ̆ng atisô. Đơ̆ng rŏng 4 khei, pơtơm gơ̆h kăt tĕch hla păng đei công ty răt iŏk pơđĭ. Rim giĕng, khul jang ki thuơ̆t đơ̆ng anih tĕch mơdro jur năng pơgar ‘long kŭm hăm kon pơlei chă hơlen năng ‘long pơtăm, pơtho tơƀôh ki thuơ̆t vei rong. Hơdai hăm ‘nŏh, kon pơlei đei tơgŭm bơ̆n phŏng, ki thuơ̆t vei rong păng kăt tĕch. Truh dang ei, lơ̆m apŭng Lạc Dương tưk tơiung 3 trong jang hơdoi đơ̆ng pơtăm truh kăt tĕch atiso.

Ƀok Sử Thanh Hoài, Bí thư Đảng apŭng Lạc Dương ăn tơbăt, dôm trong jang xa tơ̆ apŭng hơnơ̆ng hue lăng truh tơdrong sơng kon pơlei vang mât jang hăm anih tĕch mơdro, đơ̆ng choh pơtăm truh răt iŏk tơmam jang đei: “Hrei ‘nâu nhôn chă hơlen năng tơ̆ dang 1.000 m2 lơ̆m 1 sơnăm, trư tôm jên jang ‘nŏh iŏk đei đơ̆ng 25 truh 30 triu. ‘Nâu jĭ kơloăi ‘long tôch lăp hăm tĕh, tŏ ‘mi kial kŭm nhen tơdrong juăt choh jang xa đơ̆ng kon pơlei hrei ‘nâu, nhôn oei pơih xă trong jang ‘nâu. Gơ̆h pơma trong jang ‘nâu gô chă đei lơ tơdrong jang ăn kon pơlei. Anih tĕch mơdro vei lăng trong pơtăm, vei rong păng răt iŏk pơđĭ tơmam jang đei. ‘Nâu kŭm jing 1 trong jang mă Lạc Dương hơmĕng gô pơm hơtŏk đei tơdrong arih xa ăn kon pơlei.”

Kŭm hăm jang kiơ̆ trong pơtăm, vei rong đei tơlĕch ‘nŏh tơdrong jang hơdoi âu roi đunh roi đei pơih xă vă pơm ‘lơ̆ng ăn tơdrong tĕch tơmam ăn kon pơlei jang đei kŭm nhen chă đei tơmam ‘lơ̆ng ăn dôm anih tĕch mơdro vă pơm tơlĕch tĕch mơdro. Ƀok Hoàng Sỹ Bích, Kơdră vei lăng choh jang xa păng atŏk tơiung tơring tơrang dêh char Lâm Đồng ăn tơbăt, trong jang tơm đơ̆ng dang ei truh sơnăm 2030 ‘nŏh akŏm jơhngâm tơmât tơdrong rei pơtăm hăm tĕch mơdro tơmam atiso pơma hơdrô̆ păng dôm kơloăi ‘long pơgang tơ̆ apŭng pơma atŭm. Akŏm jơhngâm jang kiơ̆ kơmăy kơmŏk ‘nao lơ̆m tơdrong tơchĕng hơlen, chă rơih hơdrĕch păng ki thuơ̆t pơtăm, vei rong, hơtŏk tơdrong ‘lơ̆ng đơ̆ng jang xa, pơm tơlĕch tơmam vă pơm đei tơmam ‘lơ̆ng, kĕ pơjei tơ̆ anih tĕch mơdro. Hơdai hăm ‘nŏh, hơtŏk tơdrong iŏk yoa kơmăy kơmŏk vă vei lăng, pơgơ̆r jang đơ̆ng pơtăm truh kăt iŏk, pơm tơmam pơgang; tơgŭm chih tơbăt hơnăn tơmam, kơsô̆ tơring pơtăm, pơm tơlĕch păng tĕch mơdro pơgang, lăp hăm dôm tơdrong hơgăt đơ̆ng teh đak păng lơ̆m apŭng plenh tĕh mưh tĕch tơmam lơ̆m teh đak păng tĕch tơ̆ teh đak đe:

“Ngoăih kơ tơdrong roi tơbăt, vei lăng, iŏk yoa ‘nŏh tơdrong bơ̆ jang hơlen năng tơdrong ‘lơ̆ng ăn tơmam kŭm tôch kơ tơrĕk ‘năi. Thoi noh mă nhôn kŭm đei hloi 1 trong jang đơ̆ng Anih choh jang xa păng atŏk tơiung tơring tơrang vă tơlĕch trong pơgơ̆r vei lăng, hơlen năng tơdrong ‘lơ̆ng ăn tơmam đơ̆ng choh jang lơ̆m khei ‘năr pơjing, tưk tơiung păng vei lăng hơnăn tơmam.”

Mă tơpă tơ̆ lơ tơring ăn ƀôh, kơjă mŭk drăm đơ̆ng pơ tăm ‘long pơgang lơ ƀiơ̆ kơ pơtăm dôm kơ loăi ‘long nai ‘lơ ‘lŏ. Tơ̆ lơ xăh, ‘long pơgang atiso ưh lăp jing ‘long tơm vă sut pơđĭ pơngot, tơjur tơnuh hin đĕch mă oei tơgŭm ăn lơ unh hnam tơ̆ Lâm Đồng jang xa đei iŏk yoa kơjăp, tŏk jing pơdrŏng đei ƀôh.