Tơ̆ Cần Thơ, ah pơgê năr 3/11, Jơnŭm jang gah Phe xa ƀa sŏng Việt Nam păng BizLIVE jang atŭm pơgơ̆r pơma đam rim sơnăm “Trong jang hơtŏk đei jơnei kơjă phe Việt Nam”. Pơma đam đei pơgơ̆r lơ̆m khei năr phe, ƀa Việt Nam tŏk bŏk ưh đei sơđơ̆ng. Lơ̆m lơ khei kơ âu kơjă tơmam drăm âu hơnơ̆ng tŏk kăp.

Kiơ̆ jô̆ hơlen đơ̆ng Anih tơm Kŏng thương, lơ̆m khei 10 âu ki, phe tĕch ăn teh đak đe đei jê̆ 700.000 tâ̆n, hơtŏ 433 trĭu đôlar. Jô̆ lơ̆m 10 khei sơnăm âu, Việt Nam tĕch ăn teh đak đe pơhlom 7,1 trĭu tâ̆n phe, đei kơjă jê̆ 4 tih đôlar, tŏk 17% gah kơsô̆ păng tŏk 35% gah kơjă pơtêng hăm khei năr âu sơnăm 2022. Tơ̆ pơma đam, rim bơngai juăt jang păng tang măt ăn anih jang mŭk drăm hlôi ‘măn lơ jơ vă pơđăp gah trong jang ‘nao păng jên jang gah phe ƀa vă hơtŏk kơjă tơmam drăm.