Tơ̆ hơnăp tơdrong jĭ măt ƀrê tơpoh lanh hrĕnh lơ̆m tơpôl, mă loi ‘noh tơ̆ lơ hnam trưng hŏk, ‘năr (12/9) Anih vei lăng jang pơgang dêh char Kon Tum đei hla ar gơih kơ dôm anih jang ƀơm truh, Anih vei lăng kon pơlei  10 apŭng pơlei tơm lơ̆m dêh char, dôm anih jang găh pơgang păng hnam pơgang lơ̆m tơring athei kơchăng, hơtŏk loi dơ̆ng tang găn jĭ măt ƀrê. Kiơ̆ kơ ‘noh hăm dôm anih jang ƀơm truh, Anih vei lăng găh jang pơgang dêh char Kon Tum athei hơtŏk loi dơ̆ng dăr hơlen, chă ƀôh hrôih dôm bơngai jĭ măt ƀrê, mă loi ‘noh jĭ tơ̆ dôm hnam trưng, anih jang tơlĕch jang kơtang vă dôm trong jang tang găn ưh kơ lê̆ jĭ hơbuh đei ƀôh, tơpoh lanh să jĭ măt ƀrê kiơ̆ nơ̆r pơtho tơtă đơ̆ng Anih vei lăng jang pơgang tang găn jĭ hơdrol - Anih tơm vei lăng găh jang pơgang.

Anih vei lăng găh jang pơgang dêh char Kon Tum kŭm athei Anih vei lăng găh pơtho pơhrăm, Anih vei lăng kon pơlei 10  apŭng, pơlei tơm kơ dêh char mưh chă ƀôh hŏk tro đei dôm tơdrong jĭ nhen: yuh lăp ai, lap rơmơ̆n, jĭ hơlŏng, đei hlak măt klep pơ yar măt ưh kơ gơh, lĕch kơ nol tơ̆ hơnăp đon dăh mă hơla tơ ‘ngam kăl kơ pơtho hơioh năm tơ̆ dôm anih khăm hơmet jĭ vă đei khăm, pơtho tơbăt, hơmet tơtom.