Tŏk bŏk ‘năr tŏ hlơ hlĕng đơ̆ng khei ‘năr tơplih pơyan, lăm hơmet jĭ Khoa ngoại răih jĭ, ƀet pơ gang pơm ưh kơ hơdơ̆r, vei lăng jơhngơ̆m pran rơneh păng tơdrong jĭ găh drŏ kăn - Hnam pơgang apŭng Kon Rẫy, kŭm sa roi ưh kơ hiôk. Vang mơnat hăm tơdrong pơmat đơ̆ng bơngai jĭ, ƀak si đa khoa Y Hồng Nga, pơ ‘lơ̆ng khăm ăn kơ rim bơngai. Mŏ tơroi, vă khăm đei ƀlep tơdrong jĭ, hơmet ƀônh kơ klăih, kŭm hăm joăt jang, mă kăl ‘noh jĭ athei iŏk đei tơdrong lui ngeh đơ̆ng bơngai jĭ:

"Ĭnh ‘noh jĭ 1 ‘nu ƀak si, jĭ bơngai Xơ Đăng tôch kơ hlôh hăm lơ bơngai jĭ năm khăm, hơmet tơ̆ âu tă kơ pơmat ngăl, mă lei ĭnh ling lang hơdrin pơm tơdrong hiôk vă khăm hơmet mă ‘lơ̆ng ăn bơngai jĭ ‘noh bơngai kon kông. Jĭ 1 ‘nu ƀak si ĭnh băt hơdăh tơdrong mă blŭng ‘noh athei jang đang hơnăp jang mă kơdră kơpal pơjao, hăm bơngai jĭ ĭnh ling lang đĭ jơhngơ̆m, hơdrin hơmet ‘lơ̆ng ăn kơ đe sư”.

Rơneh lơ̆m ŭnh hnam đei ƀă ‘noh bơngai Xơ Đăng, mĕ ‘noh yuăn, ƀak si Y Hồng Nga đei tơdrong vang mơnat gĭt kăl hăm dôm bơngai jĭ bơngai kon kông. Vă tơgŭm bơngai jĭ lơ̆m kơplăh hơmet jĭ, hăm hơnăp jang ‘noh jĭ Bí thư Chi đoàn Hnam pơgang apŭng Kon Rẫy, Y Hồng Nga hlôi krao hơvơn đoàn viên hơdruh tơdăm anih jang, đang kơ ‘noh hơvơn đơ̆ng lơ hơnih pơgơ̆r hnam pai gŏ ‘mêm mơnat, hơbăn ao rơgoh asong đĕch... tơgŭm bơngai jĭ. Hơdai hăm ‘noh, dôm ‘măng tơbăt nhen Năr pơjing Khŭl hơdruh tơdăm cộng sản Hồ Chí Minh 26/3, Năr rơngei tơring Pơbăh 30/4, Năr Lĭnh lôch dŏng teh đak 27/7…, Chi đoàn tă kơ pơgơ̆r dôm tơdrong jang ƀlŏk hơdơ̆r, vang tơgŭm tơdrong mơmat tat kŭm hăm kon pơlei tơring. Điều dưỡng Nguyễn Trần Mỹ Hạnh tơbăt, lơ̆m dôm tơdrong jang kơ hơdruh tơdăm Hnam pơgang apŭng Kon Rẫy ling lang đei ƀôh hơiă đơ̆ng bơngai Bí thư chi đoàn:

“Mŏ Nga ‘noh jĭ 1 ‘nu bơngai đei jơhngơ̆m đon ‘lơ̆ng, jang tơnăp hăm tơdrong jang păng bơngai jĭ. ‘Ngoăih tơdrong jang joăt jang mŏ Nga ling lang hŏk pơhrăm tơdrong hlôh vao dôm tơdrong ‘nao plơ̆ng. Mŏ Nga ling lang jang tơnăp, hơdrin vang jang dôm tơdrong jang kơ Đoàn tơlĕch jang. Mŏ Nga ‘noh jĭ 1 ‘nu bơngai pơm jŭk yŭk trong hơlâu ăn đe ‘nhŏng, mŏ oh lơ̆m Chi đoàn Hnam pơgang apŭng lăng kiơ̆”.

Kiơ̆ kơ Ƀak si Nguyễn Luận, Phŏ Kơdră vei lăng Hnam pơgang apŭng Kon Rẫy, yua đơ̆ng oei ưh kơ măh truh 15 ‘nu ƀak si kơna dôm năr trư̆k joăt jang tơ̆ hnam pơgang ling lang kơhret păng tơchĕng lơ. Ƀak si trư̆k jang răh hơmet jĭ tơ̆ lơ̆m, ‘ngoăih, tơdrong jĭ găh drŏ kăn, hơioh, kâp kư̆p, athei pơgơ̆r răh đơ̆ng hơtăih hăm dôm bơngai đei ba năm kâp kư̆u tơ̆ dôm Hnam pơgang xăh. Thoi noh mă lei ƀak si Y Hồng Nga ưh khan lăp jang đang ‘lơ̆ng hơnăp jang joăt jang, mă ling lang năm hơdrol lơ̆m dôm tơdrong jang đơ̆ng hnam pơgang. Ƀak si Nguyễn Luận, tơbăt:

“Ƀak si Y Hồng Nga ling lang bơngơ̆t truh vei lăng jơhngơ̆m pran, khăm hơmet ăn bơngai jĭ, pơtho tơƀôh ăn bơngai jĭ găh trong chă vei lăng jơhngơ̆m pran kơdih lơ̆m jơ năr ƀĭch tơ̆ hnam pơgang păng đơ̆ng rŏng mưh ƀrŏk tơ̆ hnam. Găh tơdrong jang khŭl ‘noh ƀak si Y Hồng Nga jĭ 1 ‘nu  Bí thư chi đoàn kơ anih jang tôch kơ pơnam lơ̆m dôm tơdrong jang, mă loi ‘noh jĭ lơ̆m plang song pham tơgŭm, tơdrong jang khăm, hơmet jĭ tơgŭm ăn kon pơlei”.

Ƀak si Y Hồng Nga hlôi sơkơ̆t hơdăh đei tơdrong kĕ jang păng iŏk đei tơdrong ‘mêm đơ̆ng bơngai jĭ păng bôl buăl jang hơdai tơ̆ Hnam pơgang apŭng Kon Rẫy, dêh char Kon Tum. Mŏ ‘meh vă gô đei tơdrong hiôk năm hŏk chuyên khoa I - hơmet jĭ găh drŏ kăn vă hơtŏk ‘lơ̆ng tơdrong joăt jang, pơyua ăn bơngai jĭ tơ̆ Hnam pơgang apŭng Kon Rẫy ‘lơ̆ng hloh.