Kơsô̆ hơioh lôch yua đơ̆ng dôm tơdrong jĭ gơh tang găn đei hăm pơgang vắc xin hlôi jur lơ iŏk đơ̆ng Việt Nam pơtơm tơlĕch jang Tơdrong jang ƀet bơ̆ng pơih să teh đak lơ̆m sơnăm 1981, hăm tơdrong tơm vei sơđơ̆ng đĭ đăng hơioh tơ̆ rim tơring lơ̆m teh đak đei ƀet vắc xin bơ̆ng lơ tơdrong jĭ. Ƀet bơ̆ng hlôi vei lăng kơ triê̆u hơioh tơ̆ Việt Nam hoei kơ đei tơdrong jĭ jăn lơ̆m prăt hloh 40 sơnăm âu ki. ‘Nâu jĭ kơtơ̆ng ang yua đơ̆ng Anih jang pơgang Apŭng plĕnh teh (WHO) păng Anih mong jên Hơioh Liên Hợp Quốc (UNICEF) tơbăt ƀlep ƀơ̆t tơbăt Giĕng lêh Ƀet bơ̆ng Apŭng plĕnh teh (24-30/4).

Rim sơnăm Việt Nam đei dang 1,7 triệu ‘nu hơioh rơneh păng hloh 95% hơioh lơ̆m kơsô̆ âu đei ƀet vaccine đĕch bơ̆ng 10 kơ loăi jĭ tơpoh krê hơmơt. Giĕng lêh ƀet bơ̆ng sơnăm ‘nâu pơgơ̆r đơ̆ng ‘năr 24-30/4/2024 kŭm hăm khei ‘năr tơbăt 50 sơnăm pơjing Tơdrong jang Ƀet bơ̆ng pơih să jơ̆p plĕnh teh, ‘nâu jĭ ‘măng vă pôk pơ ư jơnei đơ̆ng Ƀet bơ̆ng pơih să, tơroi hơdăh tơdrong đei ƀơm ‘lơ̆ng đơ̆ng Tơdrong jang Ƀet bơ̆ng pơih să lơ̆m dŏng hơrih, vei lăng jơhngơ̆m pran kon bơngai, pơtrŭt pơcheh tơplih ‘nao vă hơtŏk loi dơ̆ng tơdrong jang ƀet bơ̆ng gĭt kăl âu.