Sơnăm 2012, ŭnh hnam ƀok Ksor Dría, oei tơ̆ Plei Tal, xăh Ia Sol, apŭng Phú Thiện găh ŭnh hnam dơnuh hin, đei jang kiơ̆ trong jang tơgŭm đơ̆ng teh đak. Jĭ 1 đảng viên, ƀok ƀôh ưh kơ hơiă ƀơ̆t athei iŏk tơgŭm, đơ̆ng noh, hơdrin tơplih đon tơchĕng, trong jang. Thoi noh tơdrong hiôk hlôi truh ƀơ̆t apŭng tơlĕch jang tơdrong tơchơ̆t đơ̆ng Anih jang Đảng apŭng găh tŭn pran iŏk yua khoa hŏk kơmăy kơmŏk lơ̆m jang sa yak truh pơjing hơnăn “Phe Phú Thiện”. Lơ ‘măng hop akŏm đei tơlĕch jang, rim tơdrong bơngơ̆t, apĭnh găh trong jang, iŏk yua, đei yua hơnhăk ăn hlôi đei tơblang rơđăh, hơđăl.  Đảng viên, bơngai pơgơ̆r pơlei, kră pơlei, bơngai đei đe lui yom năm hơdrol vă kon pơlei kiơ̆ đơ̆ng rŏng. Ƀok Ksor Dría hlôi tơtĕnh tŏk iŏk jên, iŏk yua ki thuơ̆t jang ƀa 2 pơyan lơ̆m chŭn să 1 héc ta kơ ŭnh hnam. Đơ̆ng rŏng lơ sơnăm hơdrin tơklep hăm chŭn na, tơdrong arih sa kơ ŭnh hnam hlôi đei trong lĕch:

 “Vă klăih đơ̆ng tơdrong pơngot dơnuh hin, tơplih ‘lơ̆ng mŭk drăm ŭnh hnam, hơdrin yak tŏk lơ̆m tơdrong arih sa ‘noh lơ̆m rim ŭnh hnam kăl athei lăp đon tơgŭm băl ưh kơ gơh pơmơ̆ng, răp gô tơdrong tơgŭm mă athei hơdrin kơdih lơ̆m jang sa thoi noh bơ̆n mă đei tơmam sa, tơmam pơđom, man hnam oei ‘lơ̆ng. Mă lei kŭm bơnê kơ teh đak hlôi bơngơ̆t truh tơgŭm vă kon pơlei tơplih đon tơchĕng trong jang, vă bơ̆jang pơm tơlĕch hơnhăk ăn đei yua hloh, đơ̆ng noh tơgŭm kon pơlei hơdrin hơtŏk tơiung mŭk drăm.”

Vă jê̆ 70 sơnăm tơklep hăm pơlei pơla, ƀa mir, ƀum ƀlang hlôi tơgŭm ŭnh hnam ƀok A Nghiêm, xăh Ia Yeng, apŭng Phú Thiện, Gia Lai đei tơmam sa, hơbăn ao hrŭk. Mă lei hloh jĭt sơnăm kơ âu, mir roh so hlôi jing dôm jơ̆ng chŭn ƀa 2 pơyan plei hơ kriu hơ krau, mŭk drăm ŭnh hnam tơplih ƀôh rơđăh, ƀok A Nghiêm ƀrư̆ ƀrư̆ joăt hăm tơdrong chih jô̆ hơlen kon jên păng iŏk yua:

“Hơdrol sơ̆ jang ƀa plei tôch kơ tŏ sĕt yua kơ kon pơlei pơtăm răh rai, tam mă băt iŏk yua khoa hŏk ki thuơ̆t păng rơih hơdrĕch, păng blă kơ ‘noh dơ̆ng tĕch tơmam ưh kơ sơđơ̆ng. Mă lei dang ei rim tơdrong hiôk hloh, đei pơtăm tơ̆ 1 kơ dơ chŭn să, iŏk yua khoa hŏk ki thuơ̆t, păng đei lơ hơdrĕch ‘nao kơna plei đei tơplih rơđăh ‘lơ̆ng.”

Ƀơ̆t iŏk yua ƀôh rơđăh, ƀa plei hơ kriu hơ krau tơ̆ kơdơ chŭn na, kon pơlei pơtơm lui păng vang hơdai băl pơtăm ƀa, đơ̆ng noh dôm kơ dơ chŭn na ƀa să đei pơjing. Dôm ŭnh hnam kơ pơlei, xăh hlôi phă bơnơ̆, akŏm na, iŏk yua khoa hŏk ki thuơ̆t lơ̆m pơtăm ƀa đak. Ưh pă đei tơdrong mơ̆ng kơ bu jang kơdih. Gơnang đơ̆ng noh, plei ƀa ưh kơ đei pơdơh tŏk, lơ ŭnh hnam đei 7,5 truh 8 tấn/héc ta. Ƀok Rmah Dmeo plei RBai, xăh Ia Piar, apŭng Phú Thiện, tơbăt:

 “Hrei ‘nâu jang pha kơ sơ̆ bơih, tơdrong jang chŭn na tă kơ yua kơmăy kơmŏk ngăl, păng dơnâu đak vei sơđơ̆ng đak ăn kơ chŭn na, thoi sơ̆ jang hăm jơ̆ng ti gleh dêh, dang ei kơdâu hăm kơmăy kơmŏk ngăl kơna tơdrong jang kŭm hơ iơch ƀiơ̆, lăp kăl pơnam bơ̆jang đĕch, ƀlă kơ ‘noh dơ̆ng hrei ‘nâu đei lơ hơdrĕch ‘nao hơnhăk ăn plei lơ, yua thoi noh bơ̆n gơh kơ pơtăm kiơ̆ pơyan iŏk yua hơdrĕch ƀa pha ra băl, hơdrol sơ̆ ‘noh jang 1 pơyan, dang ei tơplih jing 2 pơyan bơih”.

Bơ̆jang kiơ̆ Tơdrong tơchơ̆t kơ sô̆ 05/2012 đơ̆ng Anih jang Đảng apŭng Phú Thiện găh tŭn pran iŏk yua khoa hŏk - kơmăy kơmŏk lơ̆m jang sa, yak truh pơjing hơnăn “Phe Phú Thiện”, rim sơnăm tơring tơgŭm hơdrol kon jên tơgŭm kon pơlei jang ƀa, mă loi ‘noh jĭ kon pơlei kon kông pơih să hơgăt kơdơ chŭn na să 1 hơdrĕch, hăm ƀa hơdrĕch sơđơ̆ng plei lơ, ‘lơ̆ng. Đơ̆ng rŏng hloh 10 sơnăm tơlĕch jang Tơdrong tơchơ̆t 05 đơ̆ng Anih jang Đảng apŭng, Phú Thiện hlôi pơjing đei 18 kơdơ chŭn na să 1 hơdrĕch, hăm să vă jê̆ 700 héc ta. Sơnăm 2019, hơnăn phe Phú Thiện hlôi đei Anih vei lăng tơdrong gơh hơgei (Anih tơm Khoa hŏk păng Kơmăy kơmŏk) asong ƀăng pơkăp. Đơ̆ng âu, hơnăn phe Phú Thiện pơtơm đei vei lăng jơ̆p lơ̆m teh đak. Kiơ̆ kơ ƀok Vũ Hồng Duy, Phŏ Bí thư Anih jang Đảng apŭng Phú Thiện, tơdrong mong lơ̆m hơnăn âu, ưh khan lăp plei lơ, ‘lơ̆ng, kơjă mŭk drăm, mă jing tơdrong pơvei vang đei yua lơ̆m trong jang hơdai kơjă tơmam:

“Jang hơdai hăm dôm anih mơdro sa, jang hơdai hăm Grŭp jang Lộc Trời lơ̆m pơjing hơnăn phe Phú Thiện, kŭm nhen hơtŏk tơiung dôm hơdrĕch ƀa đei ‘lơ̆ng lơ lơ̆m apŭng. Kiơ̆ đơ̆ng noh kŭm răt pơđĭ tơmam phe ƀa ‘lơ̆ng ăn kơ kon pơlei lơ̆m apŭng, kiơ̆ đơ̆ng noh tơgop pơvei tơdrong hơtŏk tơiung mŭk drăm tơpôl kơ apŭng”.

Hơtŏk tơiung hơnăn phe ƀa tơ̆ apŭng Phú Thiện, dêh char Gia Lại oei jing 1 tơdrong jang đunh. Hơnơ̆ng dôm hơdrĕch ƀa plei lơ, ‘lơ̆ng đei tơmơ̆t lơ̆m pơm tơlĕch. Dôm kơdơ chŭn na să, pơm tơlĕch ‘nao, tŏk bŏk đei pơih să, kơjă tĕch găr phe hơnơ̆ng kơ tŏk... kiơ̆ đơ̆ng noh, hơtŏk iŏk yua ăn kon pơlei rim pơlei pơla.