Lơ̆m tơring teh kơ dăng krăng krăl kơ xăh Ea Nuôl, apŭng Buôn Đôn, dêh char Dak Lak pơgar nhang hloh 1,5 héc ta tŏk bŏk đei ƀok Lý Mạnh Hùng vei lăng, kăt sơdrai pơ ‘lơ̆ng hơmet ăn ăn pơyan plei plơ̆ng. Ƀok Hùng tơbăt, lơ̆m pơyan nhang, mưh truh hăm pơgar, tơmoi tơmang lăng chhôk hơiă đei sa măk ai păng chă hơlen lăng tơdrong pơtăm, vei lăng, phĕ iŏk nhang, tơ ‘ngla pơgar kŭm chhôk ‘nă yua kơ tĕch đei tơmam kơtă anih mă ưh kơ hiong jên thuê bơngai phĕ, ưh kơ hiong jên chơ dơ̆ng. ƀok Lý Mạnh Hùng tơroi:

“Iŏk đơ̆ng hơtŏk tơiung ‘long nhang âu pơyua ăn tơmoi tơmang lăng hai păng pơyua ăn mŭk drăm ŭnh hnam nhôn ƀôh tơ̆ teh kơdăng krăng krăl kơ Buôn Đôn ‘noh tôch kơ lăp hăm ‘long nhang. ‘Long nhang mưh pơtăm lơ̆m Tây Nguyên tôch kơ ƀônh vei lăng pơm pơkao ‘mơ̆ng kơ ‘meh vă. Tơmam ĭnh jang đei gơh tĕch kơtă ăn tơmoi tơmang lăng hơnhăk ăn iŏk yua kŭm tôch kơ sơđơ̆ng ăn ŭnh hnam.”

Ưh khan lăp hơtŏk tơiung dôm ‘long joăt joe, 1,2 ŭnh hnam kon pơlei tơ̆ apŭng Buôn Đôn hlôi pơ̆n tơplih, pơlong lăng hăm dôm kơloăi ‘long pơtăm ‘nao. 1,2 tơdrong jang hlôi hơnhăk ăn kơjă mŭk drăm lơ păng pơm hơtŏk tơdrong ‘meh lăng đơ̆ng tơmoi truh hăm pơgar ‘long. Ƀôh hơdăh ‘noh jĭ pơgar hơmu tơm ‘long, hloh 1.800 tơnơm kơ ƀok Đỗ Trọng Huế, oei tơ̆ xăh Ea Huar, apŭng Buôn Đôn. Ƀok Đỗ Trọng Huế tơbăt, mă đơ̆ng ‘nao lăp đei 100 tơnơm ăn plei, mă lei iŏk yua đơ̆ng ŭnh hnam sư đơ̆ng plei hơmu dang 200 triệu hlak jên 1 sơnăm. Ưh khan lăp thoi noh, đei lơ bơngai krao apĭnh hăm ‘meh vă đei năm kơtă vă lăng, băt....

“Ƀơ̆t ŭnh hnam pơtăm păng hơlen lăng ‘long hơmu âu ƀôh đei yua, kŭm tĕch ăn anih tĕch mơdro đei 1,2 sơnăm tơ jê̆ âu. Hnam nhôn đei tăh lơ̆m dôm trang mạng tơpôl, đei lơ bơngai tơchă truh păng ‘meh đei lăng vă kơbăt....Yua thoi noh hnam nhôn kŭm đei trong jang tơplih jing jang tơmang lăng choh jang sa kơna tŏk bŏk apĭnh hla ar ăn phep”.

Đơ̆ng tơmam pran ‘lơ̆ng kơ tơring păng lăng ƀôh ‘meh vă tơmang lăng vă kơbăt đơ̆ng tơmoi roi ‘năr roi lơ. Ƀok Trần Văn Toàn, Kơdră vei lăng Hơp tak xăh pơvih pơvăn tơmang lăng choh jang sa Phú Nông – Buôn Đôn tơbăt, Hơp tak xăh hlôi jang hơdai dôm ŭnh hnam jang chŭn mir akŏm hơtŏk tơiung dôm tơdrong jang vei rong kon tơrong, choh pơtăm đei tơmam pran kơ tơring nhen: rong tơpai, rong iĕr, rong ka, pơtăm kam, kuich, krô̆i, ka kao, nhang.... vă pơyua ăn tơmoi tơmang lăng.

“Ba athei kơchăng păng pơm lăp kơdih yua kơ tơdăh bơ̆n lăp lăng hơdrô̆ găh tơmang lăng mă hŭt lê̆ choh jang sa ‘noh tơdrong lăng vă kơbăt gô ưh kơ đei. Hrei ‘nâu, tơmoi kŭm ƀrư̆ ƀrư̆ tơplih kiơ̆ trong lăng vă kơbăt păng chă lăng lơ̆m kơplăh sơng iŏk dôm tơdrong jang.”

Ƀok Y Si Thắt Ksơr, Phŏ Kơdră Anih vei lăng kon pơlei apŭng Buôn Đôn tơbăt: Apŭng tôch kơ bơngơ̆t truh tơdrong hơtŏk tơiung tơmang lăng tơklep hăm choh jang sa, tơring tơrang. Lơ̆m Tơdrong tơchơ̆t đảng bộ apŭng jăl jang 2020-2025 đei sơkơ̆t hơdăh tơdrong ‘nâu. Khei ‘năr âu ki, Anih vei lăng kon pơlei apŭng hlôi pơjao ăn kơ Anih vei lăng Choh jang sa hơtŏk tơiung tơring tơrang jang hơdai hăm Anih vei lăng Joh ayŏ - kơtơ̆ng ang kiơ̆ lơ̆m trong vă jang tơmam pran kơ apŭng rơih dôm tơdrong jang trŏ lăp vă bơ̆jang. Hơdai hăm ‘noh, apŭng Buôn Đôn kŭm bơngơ̆t truh hơtŏk tơiung hơp tak xăh. Truh dang ei, lơ̆m apŭng đei 19 hơp tak xăh tŏk bŏk bơ̆jang, lơ̆m noh đei lơ hơp tak xăh bơ̆jang kiơ̆ tơdrong jang tơmang lăng - choh jang sa. Ƀok Y Si Thắt Ksơr tơbăt dơ̆ng:

“Vă jê̆ truh âu kơnh nhôn kŭm lăng kiơ̆ tơdrong tơchơ̆t 88 đơ̆ng Kuôk hô̆i vă tơgŭm ăn dôm ŭnh hnam đei kĕ hơtŏk tơiung. Hơdai hăm ‘noh, jang hơdai hăm dôm hơp tak xăh, mă loi ‘noh jĭ tơ̆ tơring kon pơlei kon kông vă ƀrư̆ ƀrư̆ tơplih trong tơchĕng, trong jang găh hơtŏk tơiung tơmang lăng tơklep hăm choh jang sa, tơring tơrang... Tơchă ăn tơdrong jang ăn kon pơlei kon kông hai, hơdai hăm tơgop tơplih ‘nao hơtŏk tơiung trŏ lăp hăm tơdrong tơring hai.”

Hăm dôm trong năm hơdăh, apŭng Buôn Đôn, dêh char Dak Lak tŏk bŏk yak truh jang lơ dôm tơmam tơmang lăng, iŏk jang tôch ai tơdrong pran choh jang sa, bơ̆jang kiơ̆ đei yua tơdrong jang tơmang lăng tơklep hăm choh jang sa vă sơng đei tơmoi lơ̆m teh đak păng apŭng plĕnh teh, tơgop hơtŏk tơiung mŭk drăm tơring tơrang kơ tơring sơlam.