Kơdră chĕp pơgơ̆r Kuô̆k hô̆i Vương Đình Huệ akhan, pơma truh đe drŏ kăn, apŭng plĕnh teh adoi nhen Việt Nam jei ‘măn ăn nơ̆r ƀơ̆r pơma ‘lơ̆ng hơ iă hloh. Kơdră chĕp pơgơ̆r Teh đak Hồ Chí Minh sơkơ̆t hơdăh, “Bri kông teh đak Việt Nam kơ yuơ đe drŏ kăn bơ̆n, đe hơ ioh jei nhen đe kră, kơrŭn jơhngơ̆m tơ iung pơjing roi ‘lơ̆ng rŏ hơ ‘lơ̆ng hloh dơ̆ng”. Đơ̆ng kră sơ̆ khơ̆ dang ei, bơngai drŏ kăn ling lang đei hơnăp jang kăl hloh lơ̆m tơgop ăn tơpôl atŏk tơ iung păng tơ iung pơjing ŭnh hnam hơrih sa tơƀĕ dang dŏng tơƀŏng dang dan; mă đơ̆ng lơ̆m tơdrong lơ liơ, oei tơ̆ yơ, bơngai drŏ kăn gơ̆h găt-tơyăng hơbĕch hơbak” nhen 8 chư măih Ƀok Hô hlôi pôk ăn. Atŭm hăm tơdrong atŏk tơ iung kơ tơdrong hơrih sa chăl hle, dôm jơhngơ̆m đon ‘lơ̆ng hơ iă ‘noh ling lang đei atŏk tơ iung, pơm hơtŏk dôm trong pơkăp ‘lơ̆ng lơ̆m chăl hle ‘noh: Lui kơjăp-Mơmĕng-Gơ̆h găt-tơyăng hơbĕch hơbal.

Kơdră chĕp pơgơ̆r Kuô̆k hô̆i pơma hơdăh, rim jăl jang Kuô̆k hô̆i păng đơ̆ng blŭng jăl jang Kuô̆k hô̆i jăl 15 truh dang ei, Kuô̆k hô̆i ling lang, hơlen, tơplih ‘nao iŏk đei jơnei tôm tong. Lơ̆m jơnei ‘noh, jei đei hơnăp jang gĭt kăl đơ̆ng rim drŏ kăn Kơdră tang măt Kuô̆k hô̆i, rim pơmai oh rim hơnih bơ̆ jang kơ Kuô̆k hô̆i. Mă kăl, jăl jang Kuô̆k hô̆i jăl 15 đei bơngai drŏ kăn pơm Kơdră tang măt Kuô̆k hôi lơ hloh lơ̆m 10 jăl jang tơjê̆ au, tơmơ̆t 30,26%, kơsô̆ au đei nghĭ viên rim teh đak hôn bơnê kơtang. Lơ̆m au đei 3 ‘nu drŏ kăn ‘noh kơdră jang lơ̆m Trung ương Đảng, Kơdră jang lơ̆m Khul kơdră chĕp pơgơ̆r Kuô̆k hô̆i, 32 ‘nu kơdră ‘noh Kơ iĕng Kơdră chĕp pơgơ̆r/ Kơ iĕng kơdră Hơnih jang, kơdră jang kơpal, kơdră jang lơ̆m Jơnŭm vei lăng kon kông, rim Hơnih jang, kơdră chĕp pơgơ̆r Hơnih bơ̆ jang ăn Kuô̆k hô̆i, kơdră chĕp pơgơ̆r rim hơnih bơ̆ jang găh Hơnih chĕp pơgơ̆r Kuô̆k hô̆i.

Rim kơdră tang măt Kuô̆k hô̆i hlôi kơrŭn jơhngơ̆m chă tơchĕng hơlen rim hla bơar jang, hlôh vao kơtang, tơgop nơ̆r trŏ lăp tơ̆ rim ‘măng hop akŏm, tơgop lơ ăn Kuô̆k hô̆i, Hơnih jang kơ Kuô̆k hô̆i , hơnih bơ̆ jang găh Hơnih bơ̆ jang chĕp pơgơ̆r Kuô̆k hô̆i; iung jang ‘lơ̆ng tơdrong rơvơn vă jang kiơ̆ keh đang trong jang hơtŏ hơnơ̆ng drŏ nglo drŏ kăn. Khul drŏ kăn Kơdră tang măt Kuô̆k hô̆i hlôi pơgơ̆r lơ tơdrong jang trŏ lăp, ‘lơ̆ng hơ iă, hlôi jing ‘măng pơgơ̆r ‘lơ̆ng, trŏ lăp vă rim drŏ kăn tang măt chă pơma dơnuh dih băl dôm trong jang ‘lơ̆ng kơ bơ̆ jang tang măt adoi nhen hŏk pơhrăm dôm tơdrong jang ‘lơ̆ng hơ iă đơ̆ng rim khul drŏ kăn nghĭ si teh đak đe tơ̆ rim ‘măng hop akŏm lơ pang păng ƀar pang.

   Tang măt ăn Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang dôm tơdrong hơdrin, tơdrong iŏk jơnei kơtang đơ̆ng rim bơngai drŏ kăn pơm Kơdră tang măt Kuô̆k hô̆i tơ̆ Trung ương păng drŏ kăn chĕp pơgơ̆r, vei lăng Hơnih bơ̆ jang Kuô̆k hô̆i, Hơnih tơm chă tơchĕng hơlen khôi luơ̆t; sơkơ̆t hơdăh Kuô̆k hô̆i ling lang tơlĕch kơtang trong jang đơ̆ng Đảng găh vei lăng năng tông drŏ kăn:“Kăl tơlĕch jang kiơ̆ kơtang Tơdrong tơchơ̆t kơsô̆ 11 kơ Hơnih tơm Chinh trĭ găh bơ̆ jang vei lăng drŏ kăn chăl jang atŏk tơ iung jang kmăi kmŏk gơ̆h hơgei kơ teh đak, Nơ̆r athei jang kiơ̆ kơsô̆ 21 kơ Ban Bí thư găh hơnơ̆ng atŏk kơtang bơ̆jang vei lăng năng tông drŏ kăn lơ̆m chăl hle; tơlĕch jang kiơ̆ ‘lơ̆ng tơdrong jang, trong vă jang găh jang kiơ̆ trong pơkăp ‘lơ̆ng hơtŏ hơnơ̆ng drŏ nglo drŏ kăn, tơgop kơtang iŏk đei jơnei rim trong tơlĕch jang atŏk tơ iung kơjăp ‘lơ̆ng truh sơnăm 2030, jang kiơ̆ jơnei Trong jang tơm Teh đak găh hơtŏ hơnơ̆ng drŏ nglo drŏ kăn jăl jang 2021-2030. Mă đơ̆ng tơdrong hơtŏ hơnơ̆ng drŏ nglo drŏ kăn dĭng truh dang ei jang kiơ̆ đĭ ‘lơ̆ng, mă lei tơ̆ au tơ̆ to bơ̆n oei kăl tơlĕch jang kơtang hloh dơ̆ng, ‘lơ̆ng hloh dơ̆ng. Ĭnh athei rim hơnih jang, rim kơdră ling lang pơm kiơ̆ ‘lơ̆ng jơhngơ̆m đon trong jang, trŏ lăp hăm tơdrong jang đei pơjao ăn”. 

Kơdră chĕp pơgơ̆r Kuôk hô̆i tơbăt, truh au kơnh Đảng khul Kuô̆k hô̆i pơrô̆ jang trong vă jang, hơmet ming, hơnơ̆ng pơm hơtŏk măt bơngai drŏ kăn, mă kăl drŏ kăn pơm Kơdră tang măt Kuô̆k hô̆i kơpal. Dĭng truh dang ei, Kuô̆k hô̆i hlôi jang ‘lơ̆ng bơ̆ jang pơprŏ Kơdră tang măt Kuô̆k hô̆i, kang ƀô̆ drŏ kăn rim hơnih jang hăm măt bơngai đei lơ; hơnơ̆ng pơm hơtŏk jang ‘lơ̆ng jơnei tơdrong jang kơ bơngai drŏ kăn pơm Kơdră tang măt Kuô̆k hô̆i.

Kơdră chĕp pơgơ̆r Kuô̆k hô̆i jei athei hơnơ̆ng iung jang hơdoi hăm rim khul kŏng đoàn vă atŏk kơtang pơgơ̆r dơ̆ng rim tơdrong jang năm tơmang lăng, chă tơchĕng hơlen, dăr lăng… ‘Ngoăih kơ ‘nŏh, Đảng khul Kuô̆k hô̆i jei kăl lăng ba bơ̆ jang vei lăng kang ƀô̆ drŏ kăn, vei lăng năng tông hơrih sa ăn đe drŏ kăn, lơ̆m au trong tơgŭm kon jên khei, đei trong pơprŏ atŏk jang ‘lơ̆ng, jơnei kơ Khul drŏ kăn nghĭ si.

Kơdră chĕp pơgơ̆r Kuô̆k hô̆i pơma tơbăt jơhngơ̆m đon lui akhan, rim drŏ kăn pơm Kơdră tang măt Kuô̆k hô̆i gô hơnơ̆ng jang kiơ̆ dôm tơdrong hlôi iŏk đei jơneui, tơgop kơtang hloh dơ̆ng lơ̆m bơ̆ jang Kuô̆k hô̆i, vang iung jang iŏk đei jơnei tĭh tên ‘lơ̆ng liĕm păng lăng truh tơbăt 80 sơnăm Kuô̆k hô̆i Việt Nam.