Chă yak tơ̆ trong man ƀĕnh ƀang pơkao chôh rang ƀrông ƀrang ƀar păh jih trong pơlei, yă Kpuih Hạnh-Bí thư Chi bộ jang hloi thôn trơng pơlei Neh Xo, tơring Ia Tôr, apŭng Chư Prông tơbăt, trong pơkapo au đei kon pơlei chă pơtăm lơ̆m tŏk bok sơnăm sơ̆ păng jĭ mĭnh lơ̆m dôm tơdrong jơnei kơ tơdrong jang tơ iung pơjing tơring tơrang ‘nao tơ̆ tơring.

Atŭm hăm pơlei pơla rơgoh ‘lơ̆ng, gơ̆h găt băt ‘mêm kơ eng dih băl, mưh jang keh đang tơdrong jang tơ iung pơjing tơring tơrang ‘nao, tơdrong hơrih sa kơ kon pơlei oei lơ̆m pơlei Neh Xo jei đei tŏk kơtang, lăp pă 6 ŭnh hnam lơ̆m 150 ŭnh hnam oei ŭnh hnam dơnuh. Kiơ̆ đơ̆ng yă Kpuih Hạnh, hăm mĭnh pơlei đĭ đăng ŭnh hnam ‘noh bơngai kon kông nhen Neh Xo, vă chă pơrô̆ hơvơn kon pơlei vang iung jang ‘noh tơdrong mă blŭng pơm hơtŏk jơhngơ̆m đon yŭk hơlau kơ kang ƀô̆, đang viên ‘noh kăl hloh:“Đảng viên pơm jŭk yuk trong hơdrol, kon pơlei ‘moi kiơ̆ đơ̆ng rŏng. Mă blŭng ‘noh dôm đang viên kăl pơm kiơ̆ hơdrol pơm dur pơgar cham, pơtăm pơkao jih trong, sir sơlŭng tuh rơ̆m rĕk, pơm hnam chă pơyơ̆ng ‘lơ̆ng hơ iă, pơm kiơ̆ kơjăp trong bơ̆ jang, khôi luơ̆t kơ teh đak; pơrô̆ pơrôp kon pơlei hơdrin jang sa hơgei, atŏk jang sa iŏk yua kơjăp, tơplih jơhngơ̆m đon tơchĕng, trong jang sa hle; ưh kơ lê̆ đei kon hơ ‘lơ̆p iŏk ŭnh om hrôih, ăn kôn mon kon sau hŏk pơhrăm truh tơ̆p truh troch".

          Jei lei lăi, tơ̆ pơlei Bang, tơring Ia Tôr, 11 ‘nu đảng viên lơ̆m chi ƀô̆ chă pơtho khan ăn ŭnh hnam, kơtum kơtŏng ‘nhŏng oh vang tơra kon jên, năr jang pơm trong nơnăm păng jang kiơ̆ rim tơdrong pơkăp găh vei lăng rơgoh cham char, jang pơgang, pơtho pơhrăm. Chi ƀô̆ thôn atŭm hăm kơdră tơring, măt trân tơpôl tơ̆ tơring Ia Tôr chă pơrô̆ hơvơn kon pơlei hơdrin jang chehphe, ưh kơ koh hŭt ‘long pơtăm gĭt kăl, hŏk pơhrăm dih băl chă tơruih đak pơkom păng jang sa hăm kmăi kmŏk. Đơ̆ng tŏk bŏk sơnăm 2023,lơ ‘long pơtăm kăp gĭt đei plei ăl, kơjă măt, hlôi tơgŭm ăn rim ŭnh hnam lơ̆m pơlei jang sa iŏk yua kơjăp. Ƀok Puih Pak - kon pơlei oei lơ̆m pơlei Bang tơbăt:“Sơ̆ mơmat tat dêh, dang ei pôm păi ƀiơ̆ bơih. Mĭnh ƀar ŭnh hnam jang sa hơgei đei gre ngăl bơih, pă đei hnam gia nhen sơ̆ bơih. Tơdrong hơrih sa hrei au hlôi đei ƀôh ƀiơ̆ pơtêng hăm sơ̆".

           Hrei au, tơring Ia Tôr, apŭng Chư Prông đei hloh 1.100 ŭnh hnam, hăm 5.079 ‘nu bơngai. Lơ̆m au kon pơlei kon kông tơmơ̆t vă jê̆ 50%. Lơm lơ sơnăm tơ iung pơjing tơring tơrang ‘nao, Khul kơdră Đảng tơring chĕp pơgơ̆r, pơrô̆ khul jang chinh trĭ đơ̆ng tơring truh rim pơlei pơla, tơplih ‘nao trong bơ̆ jang; akŏm pơrô̆ pơrôp, pơtho khan ăn kon pơlei hơdrin vang jang kiơ̆, roi năr roi jang keh đang trong tơlĕch jang. 

Hơtuch sơnăm 2023, tơring jang keh đang 19 lơ̆m 19 trong tơlĕch jang tơ iung pơjing tơring tơrang ‘nao. Dôm tơdrong hơrih sa kơ kon pơlei đei tơplih hơdăh. Hrei au, ŭnh hnam dơnuh păng vă jê̆ dơnuh lơ̆m tơring tơjur lê̆ pă tim mă truh 8%; jang sa iŏk đei jô̆ hơtŏ măt bơngai đei truh 47 triu hlak jên lơ̆m 1 sơnăm; Bơ̆ jang pơtho pơhrăm, jang pơgang, vei lăng năng tông jơhngơ̆m jăn, vei lăng cham char, lăng ba dôm bơngai đei iŏk yua ăn teh đak, tơ iung pơjing hơrih sa ‘lơ̆ng tơ̆ pơlei pơla đei tơlĕch jang kiơ̆ kơtang. Tơdrong sơđơ̆ng chinh trĭ, sơđơ̆ng tơpôl đei vei lăng kơjăp iăp kơtang. 

Ƀok Nguyễn Quang Phương-Kơ iĕng Kơdră chĕp pơgơ̆r Đảng tơring Ia Tôr tơbăt, Đang ƀô̆ tơring gô hơnơ̆ng chĕp pơgơ̆r khul jang chinh trŏ đơ̆ng tơring truh tơ̆ pơlei pơla vă vei kơjăp păng atŏk kơtang tơdrong pơkăp ‘lơ̆ng hloh dơ̆ng tơdrong jang tơ iung pơjing tơring tơrang ‘nao. Lơ̆m au, gô hơnơ̆ng pơm hơtŏk jơhngơ̆m đon pơm jŭk yŭk trong hơlau kơ đang viên vă yak hơdoi hăm kon pơlei atŏk kơtang jang sa iŏk yua kơjăp: “Khul kơdră chĕp pơgơ̆r đảng tơring hlôi pơjing trong vă jang pơrô̆ pơrôp, pơtho tơbăt trong hŏk pơhrăm kiơ̆ rim tơdrong tơchơ̆t nơ̆r athei jang kiơ̆ ăn kơ đang viên, kang ƀô̆ păng kon pơlei lơ̆m tơring. Hlŏh đơ̆ng tơdrong hŏk pơhrăm, pơm kiơ̆ jơhngơ̆m đon ‘lơ̆ng, trong jang hơ iă kơ Ƀok Hô ‘noh đang viên ling lang tơjê̆, tơklep hloh dơ̆ng hăm kon pơlei, ling lang chă mơ̆ng nơ̆r tơgop, jơhngơ̆m đon hơpơi ‘meh vă đơ̆ng kon pơlei, đơ̆ng noh tơroi tơbăt ăn kơdră chĕp pơgơ̆r đang, kơdră chĕp pơgơ̆r kon pơlei kơ tơring. ”

Hăm tơdrong tơgoăt tơgoăl pôm nơ̆r ƀơ̆r đon lơ̆m tơlĕch jang kiơ̆ rim tơdrong tơchơ̆t, tơdrong jang, trong pơprŏ jang, khul kơdră chĕp pơgơ̆r đảng, kơdră chĕp pơgơ̆r tơring păng kon pơlei lơ̆m tơring tŏk bok atŭm dih băl tơ iung pơjing hơrih sa roi năr roi ‘lơ̆ng rŏ hơmŏ nhen hloh dơ̆ng tơ̆ tơring sơlam teh đak kơ dêh char Gia Lai.