Tơ̆ Pơm lêh tơbăt 30 sơnăm Năr pơjing apŭng, kơdră apŭng Đak Ha, dêh char Kon Tum sơkơ̆t hơdăh, hơnơ̆ng tơ iung pơjing pơlei pơla Đak Ha roi năr roi pơdrŏng pran kơtang, gơ̆h hơgei, kon bơngai Đak Ha “Tơgoăt mĭnh ƀơ̆r đon, hơbĕch hơbal, tơchăr hơgei, phăl hơlăng”;tơ iung pơjing apŭng iŏk đei Tơring tơrang ‘nao lơ̆m sơnăm 2025 vă tơgăl hăm hơnăn Hơnih Nuih mơng pran kơtang chăl tơplih ‘nao mă sơnăm 2008, Đảng, Teh đak hlôi pôk ăn.

Vă đei jing apŭng Tơring tơrang ‘nao mă blŭng kơ dêh char Kon Tum lơ̆m sơnăm 2025, apŭng Đak Ha jang kiơ̆ lơ tơdrong, lơ̆m au akŏm iung jang jơnei dôm tơdrong đei, tơdrong rơvơn vă atŏk tơ iung mơdro sa-tĕch mơdro tơklep hăm tơ iung pơjing tơmam drăm kăl; atŏk tơ iung tơmang pơhiơ̆ pơlei pơla, tơmang pơhiơ̆ cham char, tơmam pơhiơ̆ choh jang sa jing tơdrong jang atŏk tơ iung mŭk drăm kăl hloh.