Chĭng chêng re djơ djrĭng tơ̆ hơla ‘long tih pơm ăn pơđĭ jăl trong Trần Quang Khải, păih Cham să 10/3, pơlei tơm Buôn Ma Thuột, dêh char Dak Lak sa roi rơngơp hê̆ tŏk bŏk ‘năr pơyan tŏ tôch kơ dêh lơ̆m dôm năr lêh âu ki. Tơdra hơsoang rơ huĭn rơ hoăn păng boa hơri brông hơbôn nhen đei tơmam hyup pơm ăn kon pơlei păng tơmoi tơmang lăng năm brih tă kơ pơdơh jơ̆ng dơ̆ng lăng ngăl. Yă Nguyễn Thị Oanh, tơmoi tơmang lăng tơ̆ dêh char Nam Định tơroi:

“Năm tơ̆ âu chă ngôi ưh kơ ê tơƀơ̆p đe tôn chĭng chêng Tây Nguyên kơna ĭnh lăng hloi, Chĭng chêng Tây Nguyên ‘noh dêh bơih, lơ̆m teh đak đei hơdrô̆ tơ̆ Tây Nguyên đei chĭng chêng. Chĭng chêng Tây Nguyên ƀơ̆t yơ kŭm chơt hơiă.”

Tơdrong tôn chĭng chêng păng hơri hơsoang hăm hơnăn “Teh đak ƀĕnh tơdrong hiôk chơt” ‘noh jĭ tơdrong jang đơ̆ng Anih vei lăng Joh ayŏ - Tơplŏng kơdâu pơlei tơm  Buôn Ma Thuột pơgơ̆r tơ̆ Cham să anih kơdrơ̆m pơlei tơm ƀlep ƀơ̆t năr pơdơh lêh 30/4 păng 1/5 sơnăm ‘nâu. Hăm tơdrong tôn chĭng chêng, tơmam tôn teh kon kông đơ̆ng dôm khŭl tôn reh mơlôh kơ plei Ky, plei Ko Tam, Grŭp Hơri then pơlei tơm Buôn Ma Thuột, vang hơsoang lơ bơngai đơ̆ng Grŭp ao tai Việt Nam dêh char Dak Lak, Khŭl hơsoang Doremi Kid... hlôi pơm đei 1 tơdrong joh ayŏ kơdŏ soang ‘lơ̆ng hơiă. Ƀok Trương Ngọc Bảy, oei tơ̆ xăh Ea Kuăng, apŭng Krông Pắk, dêh char Dak Lak truh lăng tơdrong joh hơri hơsoang tơroi:

“Đei dôm hơdrĕch kon kông, bơngai Ê Đê, bơngai Tày păng dôm hơdrĕch hơdrŭng nai tă kơ đei tơdrong hơiă hơdrô̆ kơ đe sư. Tơdrong joăt so ‘noh jĭ tơdrong chhôk ‘nă đơ̆ng kon pơlei, kơna pơgơ̆r dôm tơdrong joh ayŏ vă kơ kon pơlei nhôn roi ‘năr roi gơh băt tơdrong joăt so đei lơ ƀiơ̆.”

Ưh khan lăp tơ̆ Cham să 10/3, lơ̆m năr pơdơh lêh 30/4 păng 1/5 âu ki, lơ hơnih tơmang lăng tơ̆ Dak Lak tă kơ pơgơ̆r lơ tơdrong joh hơri hơsoang ƀĕnh tơdrong joăt hơiă Tây Nguyên, nhen: tôn chĭng chêng, hơri then đàn tính, pơm tơmam tôn reh hlôm, et tơdrô ge, sa rơmam sa dôm bơngai Ê Đê, M’nông, Lào,… hlôi pơm ăn tơmoi lăng, sa ‘lơ̆ng păng hơiă.

‘Nhŏng Lý Thế Quân, tơmoi oei tơ̆ pơlei tơm Hồ Chí Minh tơbăt, sư tôch kơ hiă hăm tơdrong teh chĭng tơmo păng tơmam tôn reh kon kông mưh truh tơ̆ Trong hla ar cheh phe Buôn Ma Thuột lơ̆m ‘măng năm tơmang lăng tơ̆ Dak Lak ‘măng âu.

 "Ĭnh ƀôh ƀai teh chĭng tơmo hrâu hăm dôm kơloăi pơm jing tơdrong hơiă, tơƀôh tơdrong joăt ‘lơ̆ng tơring tôch kơ rơđăh, mă loi ‘noh jĭ tơdrong joăt kơ bơngai Ê Đê. Kiơ̆ đơ̆ng dôm ƀơ̆r hơri, nơ̆r hơri ‘noh ƀôh hơdăh jĭ dôm ƀơ̆r hơri đơ̆ng đe buăl tôch kơ jăng, tôch kơ jơva, tôch kơ bri kông. Tơdrong ‘nâu ĭnh ƀôh thoi âu tơ̆ dôm tơring nai ưh kơ đei.”

Ưh khan lăp tơmoi đơ̆ng dôm tơring nai mă kơdih dôm kon pơlei tŏk bŏk arih sa tơ̆ Dak Lak kŭm ƀôh ưh kơ ê păng hơiă hăm dôm tơdrong jang joh hơri hơsoang ƀĕnh tơdrong hơiă Tây Nguyên đei pơgơ̆r lơ̆m dôm năr âu ki. Mŏ Trần Thị Đan Phương, tơ̆ phường Tân Lập, pơlei tơm Buôn Ma Thuột tơbăt:

“Mĭnh ‘măng pơdơh đunh năr mă lei ŭnh hnam nhôn oei kơtă tơ̆ Buôn Ma Thuột, oei kơtă lơ̆m hnam kơdih păng lăng dôm tơdrong joăt jum dăr. Păng ƀôh thoi âu jum dăr bơ̆n đei tôch kơ lơ tơdrong hơiă thoi noh. ‘Meh akhan ‘noh Dak Lak bơ̆n gô đei dôm tơdrong jang hơiă thoi noh hloh dơ̆ng ăn lơ ŭnh hnam, đei dôm ŭnh hnam ưh kơ đei tơdrong hiôk păng đei dôm ŭnh hnam đe sư ‘meh chă lăng dơ̆ng ‘noh kŭm ƀôh hơiă păng, hiôk chơt.”

Jĭ 1 tơring teh đei lơ tơdrong joăt so hăm 49 hơdrĕch hơdrŭng vang arih sa, hơdai hăm dôm tơdrong đei yua ‘lơ̆ng găh cham char ‘noh ƀôh hơiă tơdrong joăt đơ̆ng dôm hơdrĕch hơdrŭng kơtă anih ‘noh jĭ tơdrong hơiă pơm đei ‘lơ̆ng hơdrô̆ đơ̆ng tơmang lăng Dak Lak. Iŏk jang dôm tơdrong ‘lơ̆ng ‘noh, ưh khan lăp lơ̆m năr lêh âu ki, mă dôm anih jang tơmang lăng tơ̆ Dak Lak khei ‘năr âu ki hlôi pơ̆n pơm đei dôm tơdrong chă lăng hơiă vă sơng iŏk păng gơ̆t jơ̆ng tơmoi mưh truh hăm tơmang lăng tơ̆ tơring. Đơ̆ng dôm tơdrong jang âu pơih ăn dôm tơdrong hiôk ăn tơmang lăng Tây Nguyên chă iŏk tơdrong joăt so lơ̆m tơpôl pơm hơnih hơiă hơdrô̆ hăm dôm tơring pơlei tơ̆ Groi Kông tŏ kial.