Tơ̆ gơmăng, 1 grŭp năm jang tơgŭm tơ̆ Gia Lai hăt hot hăm tơdrong jang man pơklĕp trong. ‘Nhŏng Lê Tuấn Thành, kơdră grŭp năm jang tơgŭm tơroi, hơdrol kơ man pơklĕp dôm hơnih trong hư, grŭp hlôi năm hơlen lăng păng apĭnh khŭl kơdră tơring, krao hơvơn kon jên pơm hơmet ming. Tơdrong pơm hơmet trong jang tơ̆ kơmăng vă hoei kơ pơgăn yak vih vơ̆t tơ̆ trong. “Jang 1 tơdrong kiơ ‘noh đei yua ăn tơpôl vă păr ang dôm tơdrong ‘lơ̆ng truh rim bơngai, mă loi ‘noh jĭ bơngai mơlôh. Bơ̆ jang kiơ̆ păng tơlĕch jang “Trong sơđơ̆ng” ‘noh man pơklĕp hơnih puh lŭng, trong glung iĕ đei kơ nê̆ vă tơgŭm kon pơlei năm vih vơ̆t đei ‘lơ̆ng hloh.”

Ƀơ̆t khŭl jang tơgŭm pơtơm lơ̆m tơdrong jang, kon pơlei hlôi tơgŭm hăm trong chô̆ ŭnh điên hơdăh, ƀôm đak pơyua ăn tơdrong tuh hrâu chuơh xi măng, păng asong đak nhă, tơmam sa ăn kơ dôm bơngai jang ƀơ̆t kơplăh pơdơh ngôi. Ƀok Nguyễn Văn Thuyết, bơngai pơgơ̆r kueng kơphô̆ 10, phường Ia Kring pơma. “Kon pơlei tơ̆ tơring ‘nâu đei lơ hơnih puh lŭng, năm tôch kơ mơmat, năr ‘nâu hơdruh tơdăm jang tơgŭm truh vă tơgŭm kon pơlei păng man pơklĕp dôm hơnih puh lŭng kon pơlei tôch kơ chhôk hơiă. ‘Meh hơdruh tơdăm hơnơ̆ng hơtŏk tơdrong tơgŭm ăn kon pơlei năm vih vơ̆t sơđơ̆ng ƀiơ̆.”

Ưh khan lăp pơm hơmet ming trong tơ̆ Pleiku, grŭp jang tơgŭm oei bơ̆jang tơ̆ lơ trong tơ̆ dôm apŭng kơ dêh char Gia Lai. Chhôk hơiă yua kơ trong đei pơm hơmet pơbrơ̆ng, ‘nhŏng Trần Trọng Trung, kon pơlei tơ̆ xăh Ia Yok, apŭng Ia Grai tơbăt. “Trong kơnê̆ tôch kơ lơ, nơ năm tôch kơ mơmat, kŭm đei ‘măng đei bơngai đĭ pơ̆k huŏng tơ̆ tơ nglăng. Khŭl jang tơgŭm jur pơm kon pơlei tôch kơ hiôk chơt, păng kŭm lĕch tơgŭm hăm ‘nhŏng oh.”

Tơdrong jang “Trong sơđơ̆ng” đei tơlĕch jang đơ̆ng khei 9/2023, truh dang ei đĭ bơ̆jang 19 ‘măng, man pơklĕp trong lơ̆m pơlei hăm akŏp kơjung 30km tơ̆ dôm apŭng Ia Grai, Đak Đoa păng pơlei tơm Pleiku, dêh char Gia Lai. Tơdrong jang hlôi sơng đei kơhrĕng bơngai jang tơgŭm vang jang. Yă Lê Kiều Thị Minh Thư (oei tơ̆ xăh Tân Sơn, pơlei tơm Pleiku)-bơngai jang lơ̆m khŭl tơgŭm, pơma: “Ĭnh hăm kon drŏ nglo ĭnh vang jang pơm “Trong sơđơ̆ng” tơgŭm pơm ‘lơ̆ng dôm trong nơnăm vă rim bơngai năm vih vơ̆t hiôk ƀiơ̆, tơgŭm păr ang dôm tơdrong jang ‘lơ̆ng hơiă hăm tơpôl, hăm jơhngơ̆m đon plang ăn păng vang tơgŭm”.

Mă đơ̆ng ƀơ̆t lăp tơdrong man pơklĕp trong tă kơ lơ̆m pơgê hrôih, dôm bơngai jang tơgŭm tă kơ ƀôh hơiă păng hiôk chơt. Tơdrong jang ‘Trong sơđơ̆ng” ưh khan lăp pơm ‘lơ̆ng dôm trong pơlei, vei sơđơ̆ng trong nơnăm, mă oei tơƀôh tơdrong hơiă arih ‘lơ̆ng, tơgop pơjing 1 tơpôl tơklep hơdai.