Jĭ ƀok thây pơtho đei pơjao năm pơtho tơ̆ tơring kon kông Đầm Ròn, apŭng Dăm Rông, dêh char Lâm Đồng đơ̆ng sơnăm 1980, đơ̆ng rŏng vă jê̆ 40 sơnăm jang ‘lơ̆ng tơdrong jang pơtho pơhrăm, sơnăm 2018, ƀok Liêng Jrang Ha Tương, oei tơ̆ pơlei Đa Tế, tơring Dă Mrông pơdơ̆h jang păng đei pơjao jang Ƀĭ thư Chi ƀô̆ thôn.

Hăm tơdrong jang hle au, ƀok Liêng Jrang Ha Tương hlôi jang ‘lơ̆ng hơnăp jang kơ bơngai đảng viên, atŭm hăm rim đảng viên anai lơ̆m chi ƀô̆ hơnơ̆ng hop akŏm pơma dơnuh, tơlĕch jang kiơ̆ jơnei rim tơdrong tơchơ̆t găh atŏk tơ iung mŭk drăm, oei sa, tơpôl, atŏk ‘lơ̆ng tơdrong hơrih sa, jang sa kơ kon pơlei. Ƀok Liêng Jrang Ha Tương tơbăt, vă kon pơlei hơdrin choh jang sa, tơplih ‘long pơtăm, hơtŏk jang sa iŏk yua kơjăp, kơdih ƀok păng rim bơngai đảng viên lơ̆m chi ƀô̆ jei kăl pơm jŭk yŭk trong hơlau lơ̆m jang kiơ̆. Mă kăl ‘nŏh kăl jang kiơ̆ tơnăp ‘lơ̆ng hơnăp jang kơ bơngai đảng viên, hơdrin hŏk pơhrăm păng pơm kiơ̆ jơhngơ̆m đon, trong jang kơ Ƀok Hô hăm dôm tơdrong jang hơdăh, trŏ lăp."Hăm bơngai đảng viên ‘nŏh kăl pơm jŭk yŭk trong hơlau, đơ̆ng noh kon pơlei mă ƀôh pơm kiơ̆, ƀôh bơ̆n jang sa đei ‘noh mă pơm kiơ̆. Nhen khei năr au ki, nhôn tơlĕch ăn rim trong pơprŏ jang tôch hơdăh, găh tơdrong pơtăm ‘nhot adoi nhen rong dơ̆ng iĕr, bip, nhŭng ... vă pơm ăn tơdrong hơrih sa sơđơ̆ng ƀiơ̆. Hăm dôm tơdrong jang hlôi jang kĕ, nhôn hlôi pơrô̆ pơrôp kon pơlei păng đe sư vang jang kiơ̆, pơm ăn tơdrong jang sa đei iŏk yua sơđơ̆ng, pơm dă ƀiơ̆ tơhoach kon jên răt sa kơ ‘năr ăn ŭnh hnam. ‘Nau jĭ tơdrong mă ĭnh ƀôh hăm bơngai đảng viên kăl hŏk pơhrăm jang kiơ̆ kơna nhôn iung jang hloi”.

Đơ̆ng rŏng 5 sơnăm pơm Ƀĭ thư chi ƀô̆, ƀok Liêng Jrang Ha Tương hlôi pơm đei păng tôch lăp đon yom kiơ̆ lơ̆m rim kang ƀô̆, đảng viên păng kon pơlei lơ̆m pơlei. Hăm dôm tơdrong jang hơdăh lơ̆m pơm jŭk yŭk trong hơlau atŏk tơ iung choh jang sa, tơplih hơdrĕch ‘long pơtăm pơm hơtŏk jang sa iŏk yua kơjăp, lơ kon pơlei hlôi vang jang kiơ̆ tôch tơnăp. Mă hơdăh, hlôi đei vă jê̆ 50 ŭnh nam kon kông pơ̆n tơplih chŭn mir jang ƀa mĭnh pơyan ưh kơ gan đei iŏk yua lơ vă pơtăm ‘long pơmur rong sơdrông pơm brai, lơ ŭnh hnam chă pơtăm hloi ‘nhot, rong kon tơrong, kon kơlap vă ưh khan đei ‘nhot sa ăn kơ dih mă lei oei chă tĕch ăn kơ đe kiơ̆ pơkăp dih băl dơ̆ng. Đơ̆ng noh tơdrong hơrih sa, jang sa kơ kon pơlei roi năr roi sơđơ̆ng dơ̆ng kơjăp. Dôm tơdrong joăt pă gan trŏ lăp sơ̆ ki lơ̆m pơkong ŭnh hnam, lơ̆m nê̆ kau jei hŭt, tơdrong oei sa ‘lơ̆ng hơ iă rim hơdrĕch hơdrung đei vei răk tơƀăk mong. Trong pơlei pơla rơgoh ‘lơ̆ng, trŏ lăp hăm tơdrong pơkăp găh pơlei pơla hơrih sa ‘lơ̆ng. Ƀok Liêng Hót Ha Phương, bơngai kon kông K’ho oei tơ̆ pơlei Đa Tế, tơring Đạ Mrông tơbăt:“Lơ̆m pơlei Đa Tế bơ̆n dau đei Ƀĭ thư chi ƀô̆ chĕp pơgơ̆r ‘noh pơlei pơla bơ̆n tôch rơgoh ‘lơ̆ng, dôm tơdrong lơ̆m pơlei sơđơ̆ng ‘lơ̆ng hơ iă ‘ngăl”.

Pơlei Đa Tế, tơring Đạ Mrông, apŭng Đam Rông đei vă jê̆ 220 ŭnh hnam, vă jê̆ 1.000 ‘nu bơngai, găh lơ ‘noh bơngai kon kông, ŭnh hnam dơnuh vă jê̆ mĭnh poăt. Gơnơm tơplih jơhngơ̆m đon trong jang sa, roi năr tơplih ‘nao hơdrech ‘long pơtăm, jang sa kiơ̆ khoa hŏk kih thuơ̆t ... ŭnh hnam dơnuh hlôi tơjur kơtang lê̆ pă 20%. Lơ̆m pơlei hlôi ƀôh mĭnh ƀar ŭnh hnam jang sa iŏk đei kơ hrĕng triu hlak jên lơ̆m 1 sơnăm.

Mă kăl, vă jang ‘lơ̆ng bơ̆ jang chĕp pơgơ̆r pơlei, vei lăng sơđơ̆ng păng rơvơn lơ̆m pơrô̆ pơrôp kon pơlei jang kiơ̆ rim trong jang đơ̆ng Đảng, Khôi luơ̆t Teh đak, ƀok Liêng Jrang Ha Tương oei pơrô̆ athei rim đảng viên lơ̆m chi ƀô̆, Khul chĕp pơgơ̆r pơlei pơm hla kak pơlei, chih hơdăh dôm tơdrong lơ̆m pơlei, trong nơnăm, hnam hop akŏm pơlei, hnam hơkŭm păng hơnih hnam kơ rim ŭnh hnam. Hla kak au đei hơtol tơ̆ hnam hop akŏm pơlei vă rim kon pơlei, tơmoi năm ngôi, hŏk pơhrăm păng tơmang pơhiơ̆ ƀôh hơdăh. Adoi vă sơđơ̆ng ăn tơdrong vei lăng ‘lơ̆ng hơ iă pơlei pơla, măt bơngai mơ̆t lĕch ... hlôi jing trong hle lơ̆m tơdrong vei lăng pơlei tŏk bŏk lang să lơ̆m tơring Đạ Mrông pơma hơdrô̆ păng apŭng Đam Rông pơma hơdrô̆.

Kiơ̆ đơ̆ng ƀok Nguyễn Hoàng Mai, Bĭ thư Đảng, kơdră chĕp pơgơ̆r Hơnih vei lăng kon pơlei tơring Đạ Mrông, ƀok Liêng Jrang Ha Tương ‘noh jĭ bơngai đei kon pơlei yom kơtang păng bơngai đảng viên ‘lơ̆ng. Hăm hơnăp jang Ƀĭ thư chi ƀô̆ pơlei, ƀok hlôi tơgop kơtang lơ̆m bơ̆ jang tơ iung pơjing đảng, tơ iung pơjing khul kơdră tơring, pơrô̆ pơrôp kon pơlei kơrŭn đĭ jơhngơ̆m atŏk tơ iung mŭk drăm-tơpôl, tơjur dơnuh kơjăp ‘lơ̆ng păng vang tơ iung pơjing tơring tơrang ‘nao, jĭ bơngai pơm jŭk yŭk trong hơlau vă rim đang viên kiơ̆ yok rok jơ̆ng.“Đa Tế dang ei ‘noh pơlei đei lơ tơdrong ‘lơ̆ng. Păng lơ̆m hnam hop akŏm pơlei hlôi đei chă hơtol kơƀang chih tơbăt jơ ‘năr bơ̆ jang kơ Chi ƀô̆, khul chĕp pơgơ̆r pơlei, kơ rim khul jang vă chih tơbăt dôm tơdrong jang kơ rim khul au, rim khei đei hơlen lăng păng chih tơbăt hơdăh tơ̆ kơƀang au jang ‘lơ̆ng kơnê̆ lơ liơ hloi vă đơ̆ng noh pơrô̆ dih băl iung jang kơtang hloh dơ̆ng. Hăm hơnăp jang Ƀĭ thư chi ƀô̆, ƀok Liêng Jrang Ha Tương hlôi bơ̆ jang ‘lơ̆ng tôm tơdrong, đei Kơdră Đảng, kơdră chĕp pơgơ̆r tơring pôk ăn hla bơar hôn bơnê păng ‘meh vă lơ̆m khei năr kơnh, ƀok Tương kăl hơnơ̆ng jang ‘lơ̆ng hloh dơ̆ng vă chi ƀô̆ Đa Tế roi năr roi atŏk tơ iung pran kơtang. Đei jing mĭnh chi ƀô̆ ‘lơ̆ng kơ  Đạ Mrông, păng đei lơ tơring anai năm lăng hŏk kiơ̆ păng pơm kiơ̆”.

Jĭ đơ̆ng jơhngơ̆m đon hơnăp, hơbĕch hơbal, ling lang pơm jŭk yŭk trong hơlau lơ̆m jang kiơ̆ rim tơdrong jang kơ yuơ kơdră tơring tơlĕch ăn, pơm jŭk yŭk trong hơlau vă đảng viên sơnăm mơlôh păng kon pơlei kiơ̆ yok rok jơ̆ng, đảng viên Liêng Jrang Ha Tương, Bĭ thư Chi ƀô̆ Đa Tế hlôi jing bơngai ‘lơ̆ng yŭk trong hơlau kơ pơlei, iŏk đei lơ hla bơar pôk bơnê đơ̆ng apŭng Đam Rông, dêh char Lâm Đồng.