Năm truh ‘măng tơbăt 76 sơnăm Năr linh jĭ rơka, linh lôch tang tĕh đak, Công ty 715 (Binh đoàn 15) pơgơ̆r khăm jơhngâm pran kiơ̆ khei păng ƀơk đĕch pơgang hơmet jĭ ăn công nhân, bơngai jang păng dôm bơngai đei kŏng tơ̆ dôm xăh sơlam kơ dêh char Gia Lai.

Pơgơ̆r đơ̆ng ‘năr 20 - 27/7, Hnam pơgang Khul linh hăm kon pơlei - Công ty 715 khăm hơlen ăn 1200 ‘nu công nhân, bí thư pơlei, kră pơlei, ƀok pơgơ̆r pơlei, bơngai đei kon pơlei lui yom, linh jĭ rơka, linh jĭ jăn, dôm unh hnam đei kŏng tơ̆ dôm xăh Ia O, Ia Khai, Ia Chía (apŭng Ia Grai, dêh char Gia Lai) vă gơ̆h băt hrôih tơdrong jĭ hăm dôm tơdrong jĭ krê hơmơt vă tơtom năm hơmet.

Đơ̆ng rŏng kơ khăm păng roi tơbăt găh jơhngâm pran, Công ty ƀơk pơgang ăn rim unh hnam. Tơdrong khăm, ƀơk pơgang hơmet jĭ đei Công ty 715 pơgơ̆r rim sơnăm hăm tơdrong tơm ‘nŏh bơ̆ jang ‘lơ̆ng tơdrong khăm hơlen jơhngâm pran công nhân, bơngai jang kiơ̆ tơdrong hơgăt. Atŭm hăm ‘nŏh roi tơbăt, khăm hơlen jơhngâm pran, hơmet jĭ ăn đe linh jĭ rơka, linh jĭ jăn, dôm bơngai đei kŏng, bơngai đei grih, ƀok pơgơ̆r pơlei, kră pơlei vă vei lăng ‘lơ̆ng jơhngâm pran, pơm hơtŏk tơdrong arih xa. Ƀlep ƀât ‘măng mă âu, Công ty 715 oei pơgơ̆r hơpăh 300 tơpu tơmam ăn dôm bơngai đei kŏng tơ̆ apŭng Ia Grai.