Kiơ̆ đơ̆ng Hơnih vei lăng Rong kon tơrong păng Jang pơgang vei lăng kon tơrong dêh char Đak Lăk chih jô̆ đei ƀôh, lơ̆m dêh char hrei au đei dang 180.000 tŏ kŏ, meo rong kơ rim ŭnh hnam. Đơ̆ng blŭng sơnăm truh dang ei, lơ̆m dêh char đei 2 ‘nu bơngai lôch kơ yuơ kŏ vơnh kăp, kơ mơjĭt ‘nu bơngai anai đei ƀet bơ̆ng ming hơmet tơtom.

Hơnih bơ̆ jang hlôi ƀôh, pơlôch hŭt kơ mơjĭt tŏ kŏ vơnh. Dang 64.000 tŏ kŏ, meo hlôi đei ƀet vaccine bơ̆ng jĭ vơnh lơ̆m mĭnh poăt sơnăm au. Ƀok Trần Ngọc Sơn, Kơ iĕng Kơdră chĕp pơgơ̆r Hơnih vei lăng Rong kon tơrong păng Jang pơgang vei lăng kon tơrong dêh char Đak Lăk tơbăt, atŭm hăm atŏk kơtang bơ̆ jang ƀet bơ̆ng vaccine ăn kơ kŏ, meo, hơnih au hơdrin iung jang hơdoi hăm rim tơring chă pơrô̆ hơvơn, pơtho tơbăt vă kon pơlei atŏk jơhngơ̆m đon kơchăng, iung jang tang găn jĭ vơnh, jang kiơ̆ rong kron kŏ meo.