Jô̆ đơ̆ng blŭng sơnăm truh dang ei, lơ̆m dêh char đei 283 ‘nu bơngai jĭ pơlŏ lĕch đe, lơ̆m au đei 280 ‘nu bơngai jĭ pơlŏ lĕch đe Dengue, 3 ‘nu bơngai jĭ pơlŏ lĕch đe Dengue jĭ ăl. Pơtêng hăm khei hơdrol kơ ‘noh tŏk hloh 40 ‘nu bơngai jĭ păng đei ƀôh dơ̆ng 3 tơring đei jĭ tơ̆ rim apŭng Buôn Đôn, Krông Năng păng Krông Ana.  

Vă jang ‘lơ̆ng tang găn jĭ pơlŏ lĕch đe, ưh lơ lê̆ tơpoh lang să, Hơnih tơm Dăr lăng hơlen jĭ jăn dêh char Đak Lăk hlôi pơrô̆ athei rim hơnih bơ̆ jang găh au atok kơtang dăr lăng, lăng hơlen dôm tơdrong pơm ăn tơpoh jĭ, dăr lăng kơjăp, ƀôh hrôih, hơmet pơ ‘lơ̆ng hơnih đei jĭ vă dă ƀiơ̆ chă tơpoh lơ̆m kon pơlei; sơkơ̆t hơdăh tơring hơmơt tơpoh kơtang vă iung jang pruih pơgang pơlôch mŭr măih (hơngĕnh) iung jang tang găn tơpoh pơlŏ lĕch đe. Adoi pơrô̆ pơrôp, pơtho tơbăt kon pơlei pơm kiơ̆ vei lăng rơgoh cham char, pơlôch mŭr măih (hơngĕnh), klanh tang găn pơlŏ lĕch đe tơ̆ ŭnh hnam păng lơ̆m pơlei.